السلام عليكم راح اقولكم قصتي من البداية عشان تفهمونها عدل,, انا الحين عمري 20 تزوجت وانا عمري 17شخص عمره 30 زواج تم سنه وحده ويبت منه ولد وانفصلنا بعد الولادةيعني بالنفاس ولدي مايعرف ابوه لان ماشافه الا مره صارلي الحين سنتين مطلقة وولدي ألحين عمره سنتين طليقي كان انسان بارد وعنيد لابعد الحدود مو محترم لا معاي ولا مع اهلي يصرخ عليهم ويسبهم ويسبني انا جدام الناس ويصرخ علي يبيني بس احمل واييب عيال وفوق هذا دراستي الي ماكملتها بسبب الضغط الي علي وضغوطات البيت واهو شايل ايده من كل شي انسان مايحب يتحمل المسؤولية انا اروح وايي واسوي كل شي بروحي واكثر الاشياء ابوي كان يسويلي اياها كان موظف بالاسم بس يعني ينزله المعاش اخر الشهر اما يداوم لا فوق هذا من اول يوم شفته ماحبيته بس كان همي اني اتزوج وبس ماحبه يابنات ماحس ان اهو الشخص الي ابيه ماحب اطلع معاه ولا اخلي الناس تشوفني معاه انفصلنا بعد سنة وصارلي سنتين مطلقة وبالهسنتين الحزن كان اكثر من الفرح مشاكل مع اهلي واخوي خصوصا امي اخ بس شنو اقول بعد الطلاق بسنه صارتلي مشكلة كبيره مع اهلي واتصلت على طليقي اكثر من مره ودزيتله مسج منو انا وفهمته اني ابيه وشاريته بس رفض يرد علي,,, وبعد شهرين انصدمت بامي تقولي ترا انا اتصلت على امه وقتلها ان نبيكم تردون حق بعض وامه قالت يصير خير عقبها مادقت ولا عطتنا خبر والحين بعد مرور سنة ثانية تقدملي شخص مطلق بدون اطفال عمره 24 وقبل اني اخذ ولدي ترددت حيل وكانت اسبابي: -خايفة لايصير شي مايخليني اكمل دراستي -ولدي شراح يكون مصيره -السبب الاخير وهو اهم سبب اني كنت افكر وايد بطليقي اقترحت على ابوي افتراح ان نحاول للمره الاخيره وقتله يتصل بطليقي ويقوله يا فلان ترا فلانه تقدملها شخص بس احنا بديناك انت لان ابو الولد تبيها ولالا؟ وكان رد طليقي (انا مافكر بالزواج الحين والله يهني الجميع) ابوي قاله خلاص مع السلامه طبعا يا بنات انا مانصدمت من ردة فعله بالعكس ادري ومثل ماقلت قبل اني دقيت عليه اترجاه عشان يرد علي مارضى يرد,,فكانت ردي فعلي عادية مانصدمت بالهلحظه قلت لابوي خلاص انا بريت ذمتي وسويت الي علي الله مو كاتب اردله وقلت لابوي يتصل على الشخص الي متقدملي ويقوله اني موافقة واتصل ابوي يومها ماقدرت انام وكنت احاتي وافكر بولدي الشخص هذا وافق عليه بس الله يعلم لما يتزوجني واخذ ولدي معاي شنو المشاكل الي بتصير ممكن يقولي يا ولدج يا انا ,, وولدي وين راح اوديه اهلي ماراح يتحملونه علطول خصوصا انه توه صغير عمره سنتين وقلت حق اهلي عن الي قاعدع افكر فيه قالولي خلاص فكري عدل للحين ماصار شي عادي فكري بنفس اليوم الفير قعدت ولا طليقي دازلي مسج (الصبح بكلم ابوج واذا تبين تكلميني دقي) انصدمت من المسج بس مارديت عليه ولا اتصلت نطرت لي الصبح ودق على ابوي قاله انا ابي ام فلان وابي ولدي وبفتح صفحه يديده وقاله ان يبي يكلمني يوم رجع البيت ابوي قالي اكلمه وكلمته وتفاهمنا بس يابنات انا مو مرتاحتله كلش انا اقولكم ليش -اول شي انا قبل شكثر دقيت عليه وترجيته يابنات ترجيته ان يرد علي واني شاريته وابيه مارد علي حتى ماكلف نفسه يرفع يقولي يابنت الناس انتهى الي بينا او على الاقل مسج يقولي مابيج ماكلف نفسه يرد علي طنشني ولا رد علي !!!! وامه لما امي دقت عليها تقولها قالتلي يصير خير ووماردت علينا بعدها!!!! ليش الحين يوم ابوي دق عليه قاله ان واحد متقدملي اول شي قال انا مافكر بالزواج والله يهنيهم وبعد يومين غير رايه !!!! -وثاني شي اهو قبل لا ننفصل بجم يوم استقال من وظيفته وطول هالسنتين كان قاعد بطالي بدون وظيفه مع ان مقدم على وظايف ويتله جم وحده بس رفض لان شخص لا مبالي بس ياكل وينام ويسهر ولما كلمته ذاك اليوم قالي انا ابوج لما كلمني فكرت عدل ورحت قدمت مره ثانيه على الوظيفه الي يتني قبل بس رفضتها وبعدين تكلمنا عن الملجه والشقه والاثاث قال ان مارح نملج الا بعد ماتوظف وينزلي معاش ,,قلنا ميخالف بس موراضي يشد حيله باي شي لا راضي يدور على شقه ولا راضي يشوف الاثاث ولا راضي يطلب الخدامه يقول كل شي بعد ما نملج وفوق هذا امس فتحلي موضوع شرايج نسكن في بيت اهلي انا انصدمت بيتهم صغير مايصلح ومالي خلق مشاكل مع احد وحسيت لما اكلمته ان اهو نفسه ماتغير اهو نفسه الشخص العنيد الغير محترم الا مبالي واكثر شي خلاني اشك انه صادق لحد الحين اهله مادقوا !!!يعني قالي اني قلت حق اهلي اني ابيج وبردج بس اهله مادقوا وامه مادقت احس غريبه ؟ انا يا بنات محتاره حيل شسوي احس ان بيغدر فيني بس كان همه ان يدش بالموضوع ويعطيني امل عشان ارفض الشخص الي متقدملي بعدين يتركني مره ثانيه وثاني شي خايفه لانملج وبعدين يلعب فيني على كيفه يغصبني اني اسكن عند اهله واذا فجيت حلجي يقولي اذا تبين طلاق تنازلي عن الولد لان باول طلاق رفض يطلق الا لما اتنازل عن نفقة المتعه والزوجيه عندي حلين,, يا ارفض ارجعله وانساه واكمل حياتي واخلص دراستي وولدي يكبر انشالله ممكن الله يعوضني بشخص احسن,بس بالمقابل مضطرة اني اتحمل ظلم امي ومعاملتها القاسية او الحل الثاني,ارد حق طليقي واتحمل معاملته وعناده وبخله واحاتي صحتي الي بتروح بس ماحاتي ولدي لان مايعرف ابوه بس مثل ماقتلكم ماني عارفه للحين شنو نيته سيئه ولا زينه ؟ الهم ذبحني يابنات ساعدوني
هلا وغلا اختي الغااليه الله يفرج همج ويكون بالعووون نصيحتي طليقج هذا انسيه مافي شي من اللي قلتيه يشفع له انج تردينه وهو شافج قاطه نفسج عليه وماتستغنين عنه قال خل اعطيها امل وبعدين اخليهاا انتي تقولين بطول السنه اللي كنتي ويااه ماارتحتي ولا حستي برااحه ويااه وحياته مو مستقره ليش ترجعين له اذا جذي تفكيره وانسان لامبااالي .. من رايي توافقين على الشاب اللي متقدم لج وولدج ماراح يضيع يمكن يطلع عليه احن من ابووه صدقيني ربج كريم وماينسى عبده .. وحده من جماعتنا نفس حالتج تزوجت وهي عندها ولد من طليقها اول سنه زواجها الثاني كان عايش عند امهاا بعدها اقنعته انه تجيبه عندها وهو ماشاء الله عليه كان متفهم والحين مربيته عندهاا نصيحتي لج تزوجي وخلي طليقج انسيه وابدي حياة جديده وكملي دراستج وانتي متزوجه واستعيني بالصبر والصلااه والله ماراح ينسااج .. والاهم من كلامي هذا كله قبل تنامين بالليل صلي صلاة استخااره وماخاب من استخار ربه .. اتمنى اني فدتج وان شاء الله البنات مايقصرون وياج ..
حبيبتي ابدي حياه جديده مع الزوج اللي يستاهلج وطليقج انسيه لانه يلعب عليج صدقيني ماراح يتغير واستخيري ربج
استخيري ربج اول وشوفي عقلج شقولج مو تمشين ورا قلبج .. فكري مستقبلا شنو بصير يمكن يتكرر هالشي اللي صار قبل وتتحسفين ... الله يوفقج
مساء الخير حبيبتي توج صغيره ةالقرار الي تبين تاخذينه سواء تردين لطليقج او تتزوجين من جديد؟؟؟ حبيبتي انا عن تجربه شخصيه صدقيني المهم توظفي ورجعي كملي دراستج اوكي وربي ولدج يعني بختصار اسسي حياتج من جديد بشكل صحيح صدقيني ماوقفت الدنيا على زواج ولا رجال وانا من وجهة نظري لاتحتارين عشان توج صغيره ولا عندج خبره بالحياة موعارفه تاخذين قرار حبيبتي توظفي وكملي دراسه وارتاحي صدقيني لا اهلج دايمين لج والحين الحياة حتى الاخ ينشغل بحياته يعني عزي نفسج عشان ماتحتاجين لاي احد هذا رايي وصدقيني لو سويته اخر شي تبين ترتاحين والزواج موالحين اسسي نفسج لانه الحين الزواج قرار متسرع وبتعيشين نفسه المشكله مره ثانيه ربي يوفقج وهذا قراري او تاخذين وعد من الي تبينه تتزوجينه انج تكملين دراسه وشوفي لو قال الي خلاص وافقي لو لا سوي الي قلت لج عليه:wink_smile::wink_smile::wink_smile:
هلا أختي . . . ربي يعينج ووفضي امرج لله دائما . . . أنتي ما فكرتي بطليقج إلا علشان ولدج وإلا شنو مميزاته ؟ أختي عندج ورقة وقلم : سجلي مميزاته وعيوبه وتوقعاتج لما تردين له شنو بيصير . . . وشوفي النقاط اللي سجلتيها . . . لا تخلين سبب رجوعج لطليقج ولدج ودمرين نفسج وحياتج من جديد ان شاء الله عندج العمر كله وسنوات طويلة قادمة بتعيشينها مع هالطليق وانتي جربتي الحياة وياه سنة وما في اي بوادر انه تسنع . . . حبيبتي عليج بقيام الليل والصلاة والدعاء وربج كريم . . . ولا تقولين عن امج ظالمة اكثر وحدة تحبج وتخاف عليج وتبي مصلحتج امج يمكن من كثر ما تحاتيج وتشوف ترددج ومحاتاتج تلاقينها معصبة ومتوترة ع طووول ترى ترددج واضح وعدم اتخاذج قرار لمصلحتج واضح وشي يضايقها . . .
هلا حبيبتي الله يوفقج وطليقج احسن لج انسيه جربتي العله مره وحده بعدبتجربينها مره ثانيه ؟والرسول قال في معناه(لاينلدغ المؤمن من الجحر مرتان) وانتي تقولين قسوه امي مافي ام تكره عيالها او تقسو الا للمصلحه وبعدين امج بكلمتين ترضا ولا غثا الزوج انا اقول انتي صغيره وفكري بدراستج ووظيفتج عشان تعيشين ولدج بأحسن عيشه الله يوفقج00000000
