سلام عليكم ’’ انا عارفه ان العنوان قاسي بس والله يابنات أنا اعاني من مشاعري الي مو عارفه احط لها حد انا كنت مع علاقه بشخص احبه ويحبني وكان ناوي يي يخطبني بس انا الي كنت ارفض لان كانت عنده ضروف صعب اهلي يوافقون عليه قلت انتظر شوي لمن اصير ناضجه اكثر واقعد بجبدهم لين يملون مني ويوافقون عليه والله يابنات هذي نيتي معاه كنت ابيه حيل ومااتخيل نفسي مع غيره ,,من فتره انخطبت وسبحان الله بسرعه صارت الملجه ومن غير مااحس لمن استوعبت قعدت ابجي واقولهم ماابيه ومحد فاهمني من اهلي قالوا خلاص ودينا الموافقه يعني الله كاتب لج هالنصيب طبعا أكيد عارفين شصار فيني النفسيه صارت صفر عالشمال وزني نزل يمكن بأسبوع جم كيلو من القهر بعدين رضيت بقسمه ربي وقاع أجهز بس عشان مااخلي امي تنحرم من الفرحه وخواتي والا انا والله العظيم ميته بداخلي كل تفكيري مع الشخص الي احبه واحاول اشيله من بالي بأي طريقه بس انا الي خايفه منه هذا يأثر ع زواجي وأقعد بس أتذكره والله حيييييييييل متضايقه ابي احد يحس فيني؟!
هلا فيج اختي .. شوفي نصيحتي لج انج تشسلينه من تفكيرج خلااص حبيبج انسييييييييييه لانه حتى لو لا سمح الله تطلقتي ماراح يتزوجج ولا يبيج هذا اولاا .. ثانياا فكري بزوجج وبس هذا حلالج والتفكير فيه حلال .. عندي لج طريقه سهله وعمليه وماراح تكلفج شي .. اول مايطري عليج حبيبج روحي توضي وصلي ركعتين واقري قرأن ترى حتى وانتي تقرين قرأن ابليس بيذكرج فيه لان ابليس يزين لابن ادم المعااصي وينغااض اذا شافه ذااكر ربه .. واذا لجأتي لله واستعنتي فيه صدقيني ربي ماراح يخيب رجااج .. والزوااج امان واستقرار وغير عن الحب والخرااابيط مافي حب بزمنا هذا صدقيني الحب الحقيقي يجي بعد الزواااج .. بعدين حطي نفسج مكان زوجج لو انه يحب وحده ويفكر فيهاا بترتاااحين ترى كما تدين تدااااااااااااان .. استغفري ربج وارضي باللي ربي قسمه لج ماتدرين لو انه خير لج وعسى ان تكرهوو شيئا وخير لكم وعسى ان تحبو شيئاا وهو شراا لكم .. وان شاء الله انشوفج بعد جم شهر اهني تدورين مفاجأت لزوجج وذابحتج الغيره عليه وناسيه النااضي اللي ماروااه غير الضيااع والمتاااعب .. ربي يستر عليج ويسخر لج زوجج ويهديج له .. ............................. ينقل للقسم المناسب ..
الله يعينج حبيبتي و يمسح على قلبج .. انتي ما وافقتي الا باراتدج .. ما احس انج انغصبتي!! الحين كل المطلوب منج انج تنسين اللي راح ... و توجهين تفكيرج و مشاعرج لزوجج ان شاءلله الله بيعوضج باللي راح منج بالزوج الصالح اللي احسن منه .. و اخذي نصيحة الاخت عسووله
ماعندي شي اقوله الاخت عسوله كفت ووفت واهم شي كثري من الاستغفار والله انتي ماتدرين بحكمة ربج ترا حبيبتي كل شي خيره وعسى ان تحبو شي فهو شر لكم وعسى ان تكرهو شي فهو خير لكم
الله كريم وانا اختج المهم مو بحبيبج اللي راح المهم انج تدعين ربج انه زوجج هذا ينسيج حبيبج وماتدرين ترا مع العشره والقعدات الحلوة والمتعه اللي بتشوفينها بالزواج راح تنسيج حبيبج ويمكن اهلج بعد ههههههههه ربج قادر على كل شي
هلا نونهـ عسوله كويتيه ماقصرت وكلامها ميه على ميه جزاها الله خير .... وسالفه حبيبي وما حبيبي * حب قبل الزواج ماله وجود * يعني تهيئات يا عمري انتي وادعي الله يطلع زوجج رجل صالح يحبج و ما يقصر وياج وينسيج الدنيا بحبه وحنانه وانا وخواتج بالمنتدى راح ندعي لج بالتوفيق والسعاده الابديه : )
دي دي كيوت والله فيج الخير انتي والبنات بس صعب احس يعرف الي بقلبي بس مع هذا ادعي ربي ان يسهل ونفس ماقلتي راح يصير انشالله بدعواتكم لي
الله يشيل حبه من قلبج ويسخرلج ريلج ياارب وماتدرين رب ضارة نافعه مع اني موشايفه الزواج مضره بالعكس امان واستقراار ودايمن ادعي ربج ان يحببج بريلج ومع العشره بتحبينه ان شاءالله حووبي
ياقلبي إنتي الحين على ذمة رجاال وغلط اللي قاعده تسوينه كل مآطرى على بالج تعوذي من ابليس ديري بالج لادمرين حياتج بإيدج هذا نصيبج ومكتووب لج وأكيد مع الايام راح تنسينه والله يوفقج إن شاءالله بحياتج ويهنيج
حبيبتي زووجج خيره لج من علاقه ما كنتي تدرين شنو نهايتها اكتفي بالذكرى والتفتي لوجج اللي مقدرج ويحبج وابو عيالج واللي يستاهل تفكيرج
اختي اضمنج مليوون بالمييييييه رااح تنسينه و بتقوولين اماراتيه قاالت .. مسالة وقت ليس الا بوصف لج اللي بيصير ويااج .. مثلا دخلتي مدرسه و حبيتي مدرسه 3 سنيين و سيرتي مدرسه 2 و شفتي مدرسه فالبداايه ما اتقبلتيهاا و بعديين عيبتج في شي و بعدين انعجبتي و بعدين حبيتيهاا و نسيتي الاولى و طواايفهاا .. هاا اللي بيصير معااج نفس افلانه اللي حبت مدرساات خخ
صاجه اختي دي دي كيوت حب قبل الزواج ماله وجود ويمكن للحين ما نسيته عشان للحين مارحتي عند زوجج وعاشرتيه وقعدتي معاه يمكن اول ما تدخلين عنده وتشوفين معاملته الطيبه راح تنسين بس اهم شي تنسينه وادري صعب عليج بس صدقيني زواجج وبيتج وزوجج راح يخلونج تنسينه والبنت ما تبي غير الستر لعلها خيره خذيتي واحد غيره يمكن لو انج ما خذته كله مشاكل وشك ومايصبر عليج ولا سمح الله تردين متطلقه صدقيني خيره فيما اختارها الله
الحب مشكلة .. بس قلبي يدعيلج نفس اختي غرور الورد .. الله يشيل حبه من قلبج ويسخرلج ريلج ياارب اللهم امين ويصبر قلبج ..
شلونكم بنوتات وقفتكم معاي ماراح انساها انا الحمدلله نسيت كل الخرابيط وبديت حياه جديده واشكر ربي عليها صحيح ان زوجي فيه عيوب بس الحمدلله الي سخره لي وانصح كل بنت لاتخطي الي خطيته ترى النهايه معروفه
أنا رأيي إنك خلاص تنسينه وماتفكري فيه وأبدي حياة جديده مع زوجك صدقيني إن الحب بعد الزواج أحلي من الحب قبل الزواج يعني إلي أقصده إن الحب يجي بالعشره والمعامله الحسنه والإحترام أما بالنسبه لوبدك تنسي حبيبك ماعليك إلا الإستغفارو قرأه صوره البقره كل ماتجيك لحضه إنك تفكري فيه إستغفري أو إمسكي المصحف وإقرإي صوره البقره صدقيني رح تنسينه وربنا يوفقك
