بسم الله الرحمن الرحيم شلونكم بنات ؟ انا بقول لكم معناتي مع ابو عيالي ، اللي كان حبيبي ، وصار زوجي ، والحين شبه انه يكون طليقي حبيته من سنة 98 ، وتزوجنا ويبنا ولدين مثل الورد ، وقرر يكمل دراسته بالخارج ، وانا استقريت بديرتي الكويت مع عيالي اربيهم ، لغاية ما يتخرج ويرجع لنا بالسلامة ، وكان في سبب من ضمن الاسباب اللي تمنعني اني اروح معاه ، انه يمد ايده علي ، ووعدني اول ما يرجع يوفر لي بيت لي ولعيالي ، مرت الايام والسنين ، وولدنا دخل الروضة ، وخلص منها ، ودخل الابتدائية ، وتخرج زوجي ، نكر كل وعوده لي ، حسيته كأنه واحد يماطل مع بنت مراهقة ، مو زوجته ، وبدا يزهقني ويمللني فبيت اهله ، ويقوللي اهلي ما يبونج ، ليحد ما يه يوم ، وما كنت حاطه في بالي ، انه بيكون هذا اخر يوم لنا في هالغرفة ، اني قلت له اييب ولدي من المدرسة ، للعلم اني دايما انا اللي اييبه ، لأن على قولته انا فتحت لج سيارة عشان تخدميني ، وانصدمت من هالكلمة هذي بالاخير ، بس لمجرد طلبت منه يرد الولد من المدرسة ، قام وعصب وخذا كلللللللللللللللللللل شي له بالغرفة ، تميت بالغرفة لمدة 6 ايام محد يطل علي غير الخادمة وعيالي ، ليحد ما قررت اترك البيت واطالب بجميع حقوقي ، وقال لاهلي في اللي احسن منها ، قمت استغرب شنو اللي غيره ؟ ليش صار معاي جذيه ؟ وهذا آخرة صبري على حبيبي ؟ وابو عيالي ؟ واللي زاد الطين بله ، ان استغل تعب والدي ، لان والدي فيه مرض الزهايمر ، كان سند لي ، وكان يصبرني عليه ، لكن لما طاح سندي ، اللي اهوه ابوي ، يه ابو عيالي وقا يكسر فيني . الحين ؟ صار لي سنتين تقريبا وانا فبيت اهلي ، اشوف والدي المريض ، وطبعا قاعدة مع والدتي ، واليوم دريت بخبر ثاني ، وكان مثل الصعقة لي ، ان ابو عيالي طلع يكلم طليقة اخوي ، والحين تطلقت منه طلقه رجعية ، وايد امور تدور بتفكيري ، ابي انساه لانه ضرني انا وعيالي نفسيا ، وهم احبه لان العشرة ما تهون ، بس اقول داخل قلبي ياريت يتعدل ، عشاني وعشان عيالي ، ما انكر اني اشتاق له واشتاق لصوته ، ولا انكر اني استغل حاجة عيالي ، اروح سيده ارفع التلفون واكلمه عن عياله ، بس انا من ناحيتي اكابر ، وانا قمت احسه الحين قام يكابر ، كأنه ناطر الموضوع يطلع مني ، في انه نرجع ، انا اقدر اسوي هالاشياء ، بس المشكله انه حط شروط تعجيزية ، وتبين اشكرى انه ما تعدل ، اللي اهيه : اني اطلع من دوامي ، واني اقعد بدون سيارة ، واني بس اربي اليهال . شروطه اكبر دليل انه ما تعدل . كل ما اقول اكرهه ، اقول داخل قلبي بس احبه. صرت انطوائية اكثر ، ما احب اشوف الناس ، كل ما اشوفهم يقولون لي الله يدز لج ولد الحلال اللي يعوضج. ما افكر بالزواج مرة ثانية لعدة امور اللي اهيه : ابي اربي عيالي ، والزوج اليديد ماراح يستحمل عيال مو عياله ، وانا ما افكر اني ادخل على عيالي ريال غريب ، غير ابوهم ، وطبعا الا لما يتعدل لنا ، وما افكر في الزواج مرة ثانية ، لاني حاطته داخل قلبي ولاني احبه ، لانه اهوه حب حياتي وابو عيالي ، اللي اتمنى انه يتعدل ، قبل لا بفوت الفوت ، وليفات الفوت ما ينفع الصوت يا فلان ويا بنات . انا شاريته لسبب واحد بس ، واهوه ان عيالي راح يكبرون وراح احتاج ابوهم . ولا انكر عليكم ، ان بعض المرات اخاف اني ظلمت عيالي بهالظروف . الله يهديك يا فلان ويهديك لعيالي ويهديك لي . ادري ان سالفتي طويله عريضة ، بس قلت بقولها ، لاني بطلع اللي بقلبي ، ومنها اكون عضة وسالفتي تكون عبرة يا بنات . ومشكورين على متابعتكم ....
هلا اختي . . . والله مدري شنو اقولج ! اهم شي لا تقطعين صلتج برب العالمين ادعيه في كل وقت وكل دقيقة واستغفريه وربج كريم . . . ولا تضايقين نفسج وتنطوين عن العالم. . . مافي شي يستاهل . . . وربي يفرجها عليج عاجلا غير آجل يارب . . . وحياج الله اخت غالية وعزيزة بينا
فديت روحج حبيبتي يمكن الي صار لج يكون خير بالنسبه لج ولعيالج .. اكيد مابترضين تعيشين معاه حياه دومها ضرابه وشك وغيره انتي بنفسج قلتي ان ماخذنج عن طريق الحب حطيها في بالج دام انه كلمج قبل الزواج سهل عليه يروح يخونج ويكلم الف بنت غيرج قولي الحمدالله على كل حاااال واعتبري هاالشئ خير لج .. عسى ان تحبو شئا وهو شر لكم وعسى ان تكرهو شيئا وهو خير لكم.. عليج بالدعاء والاستغفار وقيام الليل بتحسين براااااحه كبيره ..سعادتج بالاول والاخير هي قربج من رب العالمين.. الله يوفقج ويسعدج دنيا وآخره ,..
أختي هذا حال أغلب اللي يتزوجون عن حب .. لأنه أول العلاقه تكون حب من غير مسؤوليات وهالشي ما يقدر أحد فيكم يعرف عيوب الثاني .. بس المسؤوليات تصدم اللي خذى الموضوع عن حب والله ما حرم الحب قبل الزواج الا اهو سبحانه أعلم مافي داخل الانسان .. الحين لازم تقوين ايمانج أكثر وادعي ربج يهديه ويصلح مافي بينكم .. وأكيد العشره ماتهون بس في شي اسمه مباديء وفي شي اسمه حقوق وواجبات وفي شي اسمه كرامه .. مثل ما اهو يحط شروط انتي حطي شروط بس حاولي قد ما تقدرين انج ماتسوين مشاكل معاه عشان ما يدور الزله غصب .. سايسيه بس بحدود الله يهديه ويرجع لكم ان شاءالله .. أكثري من الاستغفار لانه مفتاح فرج لكل عله بأذن الله
الله يبعد عنج الحزن ويفرجها عليج حبيبتي ادعي ربج انه يشرح لج صدرج واستخيري ربج بحياتج معاه ولاتبينين ضعفج وحاجتج له جدامة خليج قوية وصدقيني مراح يضيعون اليهال واذا الحب فيه اهانة لج لا والف لالالا دوسي عليه بريلج هذا الشي صعب بالبداية بس بعدين بترتاحين وخليج قريبة من ربج وديري بالج تبينين ضعفج وحاجتج عن ريال تري ما في احد يستاهل والله المستعان
انصحك نصيحة اخت لاتخلين وظيفتك اللي تعزك وصدقيني هو اللي خسران من الناحيتين اما شرط ترك السياقة قولي اوكي بس تحط لي سايق وعن تربية العيال مايحتاج توصي على ضناي ومالك الا الدعاء ولاتحاولي تتصلي فيه عشان مايكبر راسه>>>>>مصيره يرد لك
الله يعوووض صبرج خييييييييييير .. والحياااه ماتتوقف عند رجل صدقيني عيشي لنفسج ولعيااالج لاتنطوين على نفسج اطلعي وواجهي الناس واستانسي .. واكثري من الدعاااء والاستغفاااار وربي ماراح ينساااج .. اسأل الله لكم الهداااايه واذا فيه خير لج يرجع لج ..
تسلمون لي حبايبي على ردودكم الطيبة لأم عبدالله لـــــ : ام عبدالله ضحوك الفجر waiting عمري اللي راح غلا دبي q8 3sola
الله يهديه لج لا تتركين وظيفتج اللي طعنج مره يطعنج الف مره ولا تامنين له وخليج بعيده عنه ولا توصلين له اخبارج لا تدقين واذا عيالج يبون شي اهم يدقون احسن لج عشان يحس شوي
الله يهديه لج ولعيالج ولاضايقين روحج اهم ماعليج صحتج عيالج محتاجينج وماتضيق الاتنفرج والله يعوض صبرج خير
لاحول ولاقوة الا بالله هذا ماينقعد معاها فكري بعقلج مو بقلبج ياقلبي حرام تحرمين نفسج من الساعده والراحه النفسيه والضحكه عشان واحد بايعج ولا يكلم طليقة اخوج انا اقول استخيري ربج وتطلقي منه وربج يعوض صبرج خييييييير
والله عجبني اسلوبج وفعلا ماتهون العشرة الله يهدية وطليقة اخوج الله يوريها بدنيتها شنو استفادت دخلت مكان مو لها ليش ماتكلمينها اذا انتي مو ضارتها بس عشان ترسين على بر وقوليلها شعورج نحوة وشعور عيالة انهم محتاجين الحين لبوهم انا من رايي واعديها بمكان خلي حديثج مباشر معاها يمكن المرا تبي تنتقم منكم كلميها الله يهديها وزوجج لاتجيبين طاري طلاق عليج بالاستخارة اسبوع اكيد ماصليتيها وربج بيشوف لج الخير ويدلج علية صراحة لاتضايقين عمرج عيشي حياتج وهذا مكتوب انج بتزعلين وراح تزوجين وانتي مبين عليج انسانة صابرة اللة يحقق لج منالج وطلبج وردي علينا بعد الاستخارة
اختي بالله مالج الا الدعاء لزوجج بالهداية وان الله يسخره لج ولعيالج ويهديه طريق الصواب وسلمي امرج لله عن طريق الاستخاره والدعاء والخير فيما اختاره الله لج بس حبيبتي نصيحه من اختج اذا رديتي لزوجج انشاءالله لا تتنازلين عن وظيفتج فهي راس مالج ومعاشج باب رزق لج حتى ماتحتاجين حق احد لا قدر الله اذا رد وتخلى عنج ومسألت الطلاق صرفي النظر عنها نهائيا وانج تتزوجين مره ثانيه حاولي تتغاضين عن هالموضوع عشان عيالج صدقيني حبيبتي بهالزمن ماحد يتحمل عيال احد الواحد يدوب يربي عياله والزوج الثاني مو ملزوم يهتم بعيالج اكيد توافقيني الرأي فمالج الا ابو عيالج فصدقيني حبيبتي استخيري مره مرتين انشاءالله عشر ونطري ربج وين يخيرج ونطري هالشهر وحاولي تتغلين اشوي وتحاولين انج ماتدقين عليه واي شي يبونه عيالج خلهم اهما يدقون وبعدين شوفي شيصير وياج اكيد اذا فقد اتصالج ماراح يقدر على فراقج اكثر ويشتاق حق صوتج والله يسخره لج يارب ويسهل امرج ويخليج حق عيالج واسفه حبوبه عالاطاله بس اتمنى اكون فدتج وخففت عليج فتقبلي مروري
بصراحه اختي انتي غلطااااااانه ليش تنطرينه وحاطه ايدج على خدج وتندبين حظج من باعنا بعناه لو كان غاااالي خلاص هو طلقج عيشي حياتج وابتدي صفحه يديده ماله داعي حاطه امال عليه دام معاملته كانت مو حلوه معاج ادعي ربج انه يعوضح بخير منه اللهم اجرني في مصيبتي واخلف لي خيرا منه مووووفقه
يًـ حيآاتي وًآلله عورتيّْ قلبِيّْ ! آلله يفرج همج عآجل غير آجلآآ آن شآءًآلله.. وًآلله يجدم اللي فيه الخير لج يآربّْ , ويعوضج بآلآحسنّْ عِيشي حًيآتجّْ ويومِجّْ ترى مو مآخذين من الدنيآ شيّْ! لآ مال ولآ عيآال ولآ !! شي ! يعني ادعي ربج , ولا تنسيني الله فوقٌ الظآلم والمظلومّْ , يعني ربج ماينسى عبده , عليج بالادعيه والاستغفار .. ,.. صًدقيني يالغلآ وعن تجربه , الزوج اللي يخون مره يخوون مليوون , لانه للآسف ماخاف ربه , تبينه يصون!! بس حسبي الله ونعم الوكيل , حطي بالج ع نفسج وعيالج الله يخليهم لج ان شاءًالله , لآ تفكرين فيه, صدقينيّْ مرده بيتعلمّْ عدل , ويعرف قٌدر الزوجه اللي صانته واحفظة بيتهآ و حبيته واصبرت عً كل شي علشآنه .. لآ تضآيقين , ادعي ربج بس ... حبيبتي انتيّْ .,.....
شوفي اختي وظيفتج سندج لاتتركينها لاسمح الله تركتيها رديتوا لبعض بعدين طلقج شنو بتسوين واذا انتي عندج ديون واقساط لايكون اهو بيدفعهم واذا سالفه السياره ارتاحي وخليه يحطلج سايق مافيها شي انا زوجي مايرضى اسوق دايم وين ماوين بس اهو دايم يوديني واييبني وين ما ابي بالعكس والله راحه وعيالج الحمدالله بحضنج مايحتاي يوصيج والله يهديه لج ولعيالج
