صباح الخير او مساءالخير بنات رفيجتي الله يهداها ابوها عافس حياتها البنيه تعرفت عليها من 2001 كنت بالمستشفى وسبحان الله مرت بظروف نفس ظروفي وتوالمنا على بعض حسيتها بنيه صادقه ومؤمنه بلي ربي كتبه كانت تنزل عند زوجها بالعنايه تقعد عنده تقرا عليه قران وتروح حق زوجي تقرا عليه وتصعد الجناح كانت انا حالتي ماتسمح ان انزل وكانت اهي الله يوفقها تباشره وتقولي احواله المهم زوجي توفى الله يرحمه وقامت اهي بالواجب يت العزا وانا لمن توفى ريلها دقيت عليها لان انا كنت بالعده اهي مشت حياتها تايهه ماتدري شتسوي بدنياها وماتبي تتزوج وانا الحمدالله تزوجت وربي اكرمني بريال على زلاته بس احبه والحمدالله انا الحين حامل هالشي نساني هموم الدنيا نرد حق رفيجتي الي من 2001 لي الحين كانت لي نعم السند وكنت لها اخت عزيزه وغاليه هالبنت ماتشتغل تاخذ معاش زوجها قالها ابوها يابنتي سويلي توكيل بدل لا كل شوي ماخذج وموديج حق الاوراق وسوتله وياريتها ماسوت النذل حط عليها قرض من التسهيلات وحط عليها اجارات محلات مادفعهم وشركات وفتح شركه وهميه حق العماله يعني بالعربي خسبق عيشتها وقام تزوج وطلق ام رفيجتي وطردهم من البيت الحين مايدرون شيسوون وين يروحون الديون تلاحقهم وامها سعوديه ماتقدر تروح وتخلي بنتها هني والبنت صاير عليها الغاء قبض ماتقدر تسافر والحين انا البنت قاعده عندي مع امها ريلي فهمني وفهم العشره الي بينا ورضا بس البنت حالها مو عاجبني البنت كارهه الدنيا كارهه العيشه مافيها ملامح حياة وانا كاسره خاطري ودي اساعدها بس مابيدي والله حيله وانا مو موظفه والله لو اشتغل جان ساعدتها قاعده احاول بشتا الطرق اني اضحكها بس موقادره احسها جنت البنت من الصدمه نكلمها ماترد ومن اليوم مو ماكله شي قطعت قلبي تكفون بنات ادعولها تتيسر امورها وترد مثل قبل (للعلم زوجي الاول وزوجها توفو بحادث بس مومع بعض)
الله يرحم حالها والله اللي فيج الخير متمسكه فيها وضافتها في بيتج بس وين اهلهم ؟؟ لاحول ولاقوه الا بالله شلون ابوها يسوي جذي !! قسم عورني قلبي الله يصبر قليبهم والله اللي فيها كافيها ويزودها ابوها الله يصلحه ويهديه مادري شقولج حتى فشله بينها وبين ابوها المحاكم الله يعوضها يارب
والله حبيبتي انا بعد مايهون علي اقولها روحي اشتكي بس البنت مالها حل وابوها الكبير وماعندها الا عم واحد ومريض يعالج برا الدنيا تطورق فيها يمين ويسار وكاهي قاعده جبالي تقولين طوفه مو ادميه من الصبح على نفس المكان
ياربي الله يصبرها مالومها ومن منو جتها صدمتها من اللي مفروض يكون لهم الامان والسند !!!!! والله بصلي الحين وبدعي لها من كل قلبي ان الله يفتحها في وجهها ويسر امورها هذي الفلوس وصخ دنيا لاتفكر فيها والله لو مو قوانين المنتدى تسمح جان جمعنا تبرعات وسددنا ديونها واموت ابوها من الحره وتسحب وكالتها
مشكوره حبيبتي ماقصرتي على الدعاء بميزان حسناتج انشاالله واليوم انا قاعده بوديها تسحب الوكاله مابي انام اخاف اقوم متاخر
صباح الخير الصراحة اول مره ادش القسم وموضوعج يدل على طيبة قلبج وحب لفعل الخير [اسئل الله ان يسهل ظروف الأم وبنتها ] وان الله يوفقج على قد نيتج.. أختي : خلينا نتكلم بالمختصر بالواقع الان. مانختلف أن الأب قاسي بتصرفة ولايهمه ضياااع بنتــه.. الأم : أمامها الواقع مر لاتستطيع الذهاب لـ بلدها السعودية وترك بنتها في ازمة ماليه ونفسية وفكرية. الوضع سيء جدآآآآآآآآآآآآ الاجتهاد الفكري والبدني مطلوب من الأم وانتي فقط.. هناك عدة طرق لـ تسهيل معاناة البنت من بعد الله., النبي علية الصلاة والسلام يقول: خير الأمور عوازمها.,, لابد من العزيمة والأرادة كما قال المثل الأسباني: لا رأي لـمن لا أرادة له.. ........... بما انها كويتية وعليها ألقا قبض وامها مطلقة : بيت الزكاة هذا واجبه يقدم مساعدة أما تكون شهريآ او كل ثلاث اشهر, ثانيآآ : امها سعودية ونعم فيها اشوف لو تلجيء للسفارة السعودية وتطرح عليهم المشكلة متأكده راح يساعدونها لان السفاره السعودية معروفة بالفزعة للبعيد فما بالج امراءة سعودية وبنتها مديونة تطلب مقابله [السفير او القنصل].. وهناك سيدات ورجال اعمال يحبون فعل الخير اتمنى تجتهدين ومالج إلا أجر يبقى في ميزان حسانتج ازرعي التفاءل داخل البنت وقولي هناك محاولات للتخلص من الأزمة [ خليها تطمئن وترتاح نفسيآ] تبشر بالدعاء الله يسهل امورها ويجزاج خير
انشاالله يارب الله يقدرني واقدر اساعدها والله اني قعدت معاها وخذيت منها اسامي الشركات الي يطالبونها وقيمه المديونيه وبشوف ببدا بالاشياء البسيطه يعني المبالغ السهله والباجي بشوفلها صرفه والله اني ببيع تلفوني وتلفون زوجي ولابتوبي اليديد عشان ببدا بشركتين على ماتخلص اكون انا باديه فبيت الزكاه واشوف فاعلين الخير واضبط امورها والله كريم انشاالله مارد خايب من دعاه
والله وانا اقرا موضوعج من كل قلبي دعيت لها الله يفرج همها وييسر امورها ويطمن قلبها ويحل مشاكلها امين يااااااارب حبيت اقولج انج فعلا ونعم الصديقه اللي مثلج قليل بهالزمن وقفتي معاها وقفت اهل واكثر اتمنى لو كان عندي رفيجه مثلج مشالله عليج الله يسهل عليج ويجعله فميزان حسناتج والله يفرج هم رفيجتج يارب
هلا اختي والله انا الي اسويه مايوفيها حقها بنت وقفت معاي لله لمن كنت بالمستشفى شالتني وهذا دوري اردلها جميلها واشيلها خصوصا ان مرينا بنفس الظروف باول حياتنا والحمدالله اليوم لغينا التوكيل من ابوها ودفعنا شركه مثل ماقلت راح نبدا بالاشياء البسيطه وربي يفرجها انشاالله
ربي يوفقك والله وقفتك معها قليله في زمنا هذا اسال الله ان يوفقك على قد نيتك وان الله ييسر لك كل امورك اختي واسال الله العلي العظيم بان يفرجه على رفيجتك وان يسهل اموره
بارك الله فيج يالغلا بميزان حسناتج انشالله واهم شي تسحب التوكيل كافي جذيه وحاولي تخلينها توظف ممكن لماتبتدي من جديد تنسى شوي وبخصوص القاء القبض في وحده جات لما عندي ونفس مشكلتها وبعد ابوها ولا تبي الفضايح وراح تنسجن لو ماسددت قلت لها روحي حق عضو المنطقة الي عندكم واشرحي له موقفج وصج ساعدها ووقف معاها لانه تدري سالفتها يبي لها واسطة والحين توظفت وقاعده تحاول تسدد قدر ماتقدر وطنيها لو صارت قضيه عادي ممكن تدفع كل شهر مبلغ من الراتب الي عليها وعلى قد معاشها يعني مو سالفه كبيره كل شي وله حل وروحي لمحامي وقولي له السالفه وفهميه ماتبون فضايح وبيقولج الراي القانوني لاتخلينها قاعده جذيه ولاتسوي شي اخذيها للمحامي معاج عشان تشغل بالها موتقعد جذيه بتنجن صج وربي اني قاعده ادعي لها وطمنيني عليها
الله يهون عليها تروح لابوها مرة ثانية ثالثة اكيد بيرق قلبة اكيد بيجي يوم ويحس فيها لاتتركة لاتقطع فيه مهما كان على الاقل تقوله عطني مبلغ مالي اساعد نفسي او اروح لديرة امي واعيش مع خوالي اي شي تحاول فيه المسكينة الله يفرج عنها وتدعي ربها واذا كل الابواب تسكرت تروح ديوان المظاليم وحقوق الانسان يقدرون يوفرون لها السكن ويحلون قضيتها
لاحوول الدنيا كلش مافيها خير من الاقرب النااس لها الله يعينها وربي قطعتي قلبي وربي يووفقج يالغلا وربي اللي مثلج قليل وربي يفرج عنها كربتها
حسبي الله عليه من أبو الظليمه شينه .. ربي ماراح يضيع حقها مثل ما قالوا خواتي لاتخلينها وانتي ربي يجازيج الجنه يارب من فرج كربة مسلم فرج الله كربته في الدنيا والاخره الله يفرجها عليكم ويسهل اموركم يارب .. روحوا اللجان وبيت الزكاة وقولوا لهم المشكله اهم عندهم الحلول ان شاءالله
الله يعينها وربي على الظالم لكن لازم ماتسكت عن حقها وإذا قدرتو تحطولها محامي يمكن يقدر يساعدها وبعدين هي خليجيه وبدوله فيها الخير والبركه وأهل الخير واايد ومايقصروون والله يجزاااج ألف خير على وقفتج الإنسانيه اللي تدل على أصلج الطيب
لااااااااااااااااااااا حول ولا قوة الا بالله العلي العظيم وربي بجيتيني حييييييييييل يمممممممه ليييش جذي شهالزمن الاسود اعوووذ بالله منه ) : حسبي الله ونعم الوكييييييييييييييل فيه من ابوو .. لا آسفه غلطت هذا موو ابووو هذاااااا عدووووووو ) : الله سبحانه .. ((( يمهل ولا يهمل ))) .. وصدقيني راح يجيله يوووووم .. حياااتي طمنيها وبشريها ان كل شي راح ينحل ان شااء الله احنا بديرة خييييييير واللي فيهم خير ماراح يقصروووووون بس اووول شي لااااااااااازم تسوييييييييييه .. (( تتوظف )) لااااااااااازم عشان تحل على الاقل نص مشكلتها .. ثانيا تروووح بيت الزكاة ماااراح يقصرووون معاها صدقيني .. الله يفرج همها وكربتها يااااااااا رب والله دعيتلها من كل قلبي عسى ربي يهون عليها مصيبتها يااااااا رب .. وانتي حبيبتي عسى ربي يجزااااج كل خير ويجعلها في موازين حسناتج قلييييييييل اللي مثلج عسى ربي يوقج ويرزقج من اوسع ابوااابه يااااااا رب ..
هلا قلبي انا بعدد ودي تتوظف بس المشكله المعاش الي تاخذه راح ينقطع انا كلمت محامي قال اوكله واهو يتفاهم مع الشركات ان يخصمون مبلغ شهري منها وان اشتغلت راح ينقطع معاشها والشركات وايد بصراحه كل يوم يطلعلنا شركه يديده تطالبها المشكله الحين القسط الي راح ينخصم منها حق الشركات اكثر من نص راتبها والباجي مايكفيها حق شي يعني حتى لو فكرت تاخذلها شقه ماتكفي الاجار وانتي عارفه الحين الاجارات غاليه بس الحين قاعده ادورلها وظيفه بمكتب او اي مكان مايحتاج تامينات عشان معاش زوجها ماينقطع وتكون الراتب الثاني شي يعيشها والله كريم انشاالله الاقيلها
