السلام وعليكم بنات انشالله تكونون دوم بخير . انا بجريه وكنت اخاف من الولاده بشكل مو طبيعي وكله بسبت الحجي اللي اسمعه عنها وطقني وحام حسيت انه روحي بتطلع محد كان يقولي شي يخفف علي كانو يقولولي ماياج شي نطري ويزيد خوفي ومن مستشفي لي مستشفي والحمدالله علي كل حال بس خلصت من وحامي زاد وزني بشكل موطبيعي كل ماله يزيد لين صرت مااقدر اصكر ايدي ومااقدر امشي عدل حسيت اني بنفجر ماكنت احس باي عوار او ترجيع او صداع بس انتفخت حييييل ورحت لدكتوري بعد اسبوعين من اخر مراجعه لانه بالاسبوعين خلااااص حالتي حيل موطبيعيه وكنت توني داخله السايع بس يومين من السابع قالي سوي تحاليل سويتهم بنفس الوقت وعطيته قالي علي طول قيصريه وافضل انج تسوينها بالحكومه لان ماعندنا اجهزه للخدج مثل الحكومه رعايتهم احسن منا واهتمامهم افضل منااستغربت من كلامه وكنت مصدومه لانه قالي حدج لي الساعه سبع الصبح تروحين للمستشفي الحكومي تسوين دخول قلتله انا اراجع عندك وحالتي خطره مثل ماتقول انه فيني تسمم حمل ونقص وزن بيبيتي وزلال ومافي ماي بالمشيمه حيل شويه ونبض البنت ضعيف وتبيني اروح للحكومه راح اموت طمني واقنعني انها افضل بألف مره من الخاص وكنت اراجع بدار الشفاء لانه ماعندهم اجهزه نفس الحكومه وصدقته ورحت للحكومه وسويت دخول حاولو ينزلون ضغطي موراضي ينزل ويشهد علي الله انه كانت رعايتهم عجيييبه داخل الوضع مكان الولاده وسولي قيصريه وجبت بنوتي بس طلعت الجناح خلوني فار تجارب بالابر عذبوني جننوني زين مامت بسبتهم وصدموني بعد ماطلعت للجناح بجياس الدم اقول للممرضه ليش قالتلي اي انتي نزفتي بالولاده وتحتاجين جيسين دم بس مالقينالج الا واحد نصدمت شلون مستشفي مافيها جياس دم ولمن سوت مرور دكتوره قالتلي ميخالف تشترين حبوب من بره حق الدم لان نسبت دمج ضعيييفه حيل قلتلها مستشفي حكومي مافيها جياس دم ولاحبوب قالتلي عندنا حبوب بس مونفس اللي بالصيدليه بعد ماعذبوني ومرمروني طلعت وكملت علاجي برا مستشفي الفروانيه اللي خلوني فار تجارب لممرضاتهم اللي بالجناح حسبي الله ونعم وانا اطالع تسجيل فيديو لبتي بتلفوني وهي بالخدج بالحاضنه اشوف شي تحت ريولها يتحرك بشكل سريع اعيد واطالع والا زهيوي قلت يمكن مومستوعبه واعيد في شي يتحرك لمن راويته اهلي قالولي صح زهيوي داخل الحاضنه وخدج خفت علي بنتي اذا اشتكيت يحقدون عليها ويذبحونها بس اختي وزوجي ماقصرو بردو قلبي فيهم والممرضه تقول مستحيل اصلا المكان متعقم شلوووون يوصل زهيوي داخل الحاضنه لمن شافته قالت يمكن دخل من البايب والبايبات من الجهاز لي حلج بنتي وبطنها وبصدرها يعني شلون ومن وين دخل الزهيوي وكل مااروحهم حالت بنتج نفس الشي واقعد عندها فتره لين يدخل عيها الدكتور طبعا في دخاتره شكثر تدخل عليها لان شفتات وكل دختور يدخل عليها يحط السماعه علي صدرها ويطلع يقولي نفس الشي وشاطرين بس يكتبون بملفها ومره من المرات اطالع الممرضات يعابلون فيها انجنيت شنوفيها قالولي والله نحطلها بيبات داخل صدرها موالمفروض دكتور يشق الصدر ويحطلها البايب مخلين الممرضات يحطولها واشوفم يضحكون ويتغشمرون مع بعض واهم يشتغلون بنتي مت من القهر واهي صغييييريه نتفه وماشالله عليهم الوضع عندهم عادي وكل يوم اروحلها صبح وعصر ومغرب لين امس الصبح قعدت من النوم وليتني ماقعدت ادق علي ابوها وطول علي اقوله مابي اتأخر عليها بلحق علي مرور الدكاتره بسرعه يقولي شوي بقوم اتسبح وعلي مايلج مطول قهرني اقوله امي ماخذه السايق ومطوله خل سبوحك بعدين حسيت فيه شي من نبره صوته قلتله بنتي فيها شي قال والله مادري شقول بس عظم الله اجرج توفت مت وحيت ورحت المستشفي بشوفها والا بالحاضنه شايلين الوايرات والابر والزاقات اللي كانو عليها كانها لعبه وماخلوني اقرب منها خايفين لايغمي علي وانا خايفه عليها من الموت وماتت ترجيتهم ترجي اقولهم ماراح اشوفها طول عمري لين خلوني اشوفها دقيقه بس دقيقه بعد سبع شهور شفتها بعد موتها ودقيقه بس اللي تأكدت منه انه مافي الكويت طب لابمستشفي خاص ولاحكومه والله يعوضني بس تسمم الحمل موهين ياليتكم تنتبهون منه لان بغيت اموت منه وبنتي ماتت بسبته الله يرحمها ويرحمنا جميع
عورتي قلبي حبيبتي لاتزعلين ولاشي هذي طير من طيور الجنه وشفيعه لج يوم القيامه واللي صار قضاء وقدر وربي ما كتبها لج وحسبي الله ونعم الوكيل في مستشفي الفروانيه هم اللي ذبحو بنات اخوي ثنتين بالغلط وخداماتهم بعد لا تزعلين والعمر قدامج وربي يعوضج بس جان تفضحينه اذا عندج المقطع اشلون زهيوي بشيشه شي مستحيل نزليها باليوتيوب وفضحيهم علي الملاء
حبيبيتي عظم الله اجرج وربي يرزقج عاجلا غير آجل بالعوض . . . وهذي بتكون شفيعة لج يوم القيامة فكري بهالشي وركزي عليه إنها بتشفع لج . . . انا جربت تسمم الحمل مرتين وبحملي الثاني رحت للحكومة على امل أمور كثيرة ! ولو اكتب شلي صار فيني ما تصدقين يكفي اني ما صحيت الا خامس يوم من العملية ! تسمم الحمل جدا خطر عليج وعلى البيبي واعتقد إنه بسبب تفكيرج بالولادة هذا اللي قاله لي دكتوري وبالنسب لضحك وغشمرة الممرضات طبيعة عملهم وشوفتهم للخدج سنين خلت الوضع جدا عادي لا تحسسين في ناس تدخل المشرحة تشوف جثث يسولفون ويضحكون ويتصورون يمها بعد ! لكن وجود زهيوي عند بنتج هذا شي ثاني ! اغلب مستشفياتهم زهيوية ألمانية !
والله قهر مستشفيات خرطي وحنا اغنى الدول شي يقهر حسبي الله ونعم الوكيل الله يعوضج خير تلقينها عند ربج خير لج
الله يصبر قلبج ويعوضج ان شالله وتكون طير من طيور الجنه وشفيعه لج يوم القيامه باذن الله وبالنسبه للحكومه حسبي الله عليهم بس شاطرين بوق بهالادويه والاغراض الطبيه
والله أن دموعي سيوووول ...حسبي الله ونعم الوكيل ..اساليني أنا اللي مريت فيه مو شوي شسووا في ولدي شققوا ايدينه ورجوله بالمغذيات وآخر شي يبون يحطون المغذي براسه وأقوملش عليهم وأتهاوش معاهم واطلع على مسؤووووليتي لاااااوبعد صارت نسبة دمه ضعيفه ويحطون الدم ويقعدون شوي وبعدين يبدون الجريمه في سحب الدم وعلى هالمنوال ....الله ينتقم منهم بااااارب!!!!! الله يعوظش من عنده يارب...
جزاكم الله الف خير والله يابنات انتبهو من تسمم الحمل صج يخوف ومن شنو صار فيني ماادري بس مقطع الفيديو عندي ومستحيل امسحه وقلت لزوجي بروح اشتكي عليهم وافضجهم موعلشاني والله لو شنو مااسوي ماراح تبرد حرتي علي بنتي بس ابيهم يديرون بالهم علي البيبيات الجايه مابيهم يهملونهم مثل ماهملو بنتي
ياعمري حسبي الله ونعم الوكيل..لا تستغربين مرّه حاشني عوار قوي رحت للعدان سوولي تحاليل وقالو كنتي حامل!!..بس مافي نبض ميت لازم عملية تنظيفات كان يوم خميس ماانساه وقطّوني بالجناح وانا مصدومه وخايفه ومحد اهتم ينطرون السبت وصار السبت فصلت عليهم!! هسترت وعصبت وقلت عيدولي السونار والتحاليل وبأمر الله سبحان الله طلع حي..!!الحمدلله..ياحياتي اهنيه عندنا مافي احساس يعاملونا الله يعزكم بهايم ..ياحبيبتي الله يعوضج بكل خير ويجعلها شفيعه لج ولأبوها..ويصبرج..ويترس حضنج عيال ياااارب
أنا لله و أنا اليه راجعون الله يصبرج يا عمري و يعوضج خيرا منها دائما ادعي اللهم اجرني في مصيبتي و اخلفني خيرا منها
الله يرحمها ان شاء الله ويصبرج يااااااااااااااااارب بس والله قويه وحيل قويه سالفه الزهيوي لاتسكتين واشتكي عليها حسبي الله ونعم الوكيل فيهم والولاده صج تخوف بس تساهيل ودايم اقول مافي وحده خايفه من الولاده كثري وانا سويتها
صاحبة الموضوع ياليت تدشين وتطمنينا عليج والزهيوي صدقيني داش في البمبرز مستحيل يدش مع الوايرات وصخين حسبي الله
عظم الله اجرج وانشاءالله بنتج تشفع لج يوم القيامه الاطفال شفعهم ابرك من نفعهم ولاحول ولاقوة الا بالله الكويت مافيها طب كلهم لو بحلف شهاداتهم تزوير والا دكاتره بياطره الله المستعان
انا من قريت الموضوع وانا فيني حره وكل يوم ادعي عليهم صج بياطره ما فيهم دكتور معاج حق يااااااااااااا ام عبود
الله يرحمها وان شاء الله تكون شفيعتج يوم القيامه وانا معاج روحي اشتكي عليهم وايد نسمع عن اخطاء طبيه بس محد يحاسبهم
الله يعوضج ويصبرج ياحياتي هذي من طيور الجنه وتشفع لكم يوم القيامه انشالله واسألني عن مستشفيات لحكومه تجيب الهم لو تدرين وش سووا في بنتي الله ينتقم منهم تكفين افضحيهم ليش تسكتين؟
