السلام عليييكم شحالكم بنات؟ انا مسجلة عندكم بس اقرا المواضيع وبس ماعندي مشاركات ابد واليوم بيكون عندي سالفة هي هب سالفتية ولا تخصني هي سالفة وحده اعرفها كانت ودها تشارك في المنتدى وتحطي بنفسها بس حاليا التسجيل موقف طلبت مني احطي القصه وعقب ان شاءالله يوم بتروم تسجل بتكمل وياكم هي نكها ( يا سيدهم وينك) والقصة الي بكتبه نقلته حرفيا كوبي بيست مثل ماطرشتلي وهي تراها متابعتكم من خلف الكواليس يعني كزائرة وبتقرا كل شي تكتبونه ,وندخل بالموضوع,, قصتي ياجماعة بدت وانا عمري 14 سنه قالولي انتي محيره لولد عمج طبعا الاتفاق كان من ابوي وعمي انا يوم قالولي جي استحييت وتعرفون في هالعمر ماكان في بالي سوالف الحب والخرابيط بس تقبلت الفكره وخلاص وولد عمي وقته كان عمره 19 سنة كان توه اول سنة له بالكليه دخل كليه الشرطه المهم كبرت وكل ما اكبر كل ماصرت اتعلق بولد عمي واشووفه غيير كل الشباب كنت اتعلق فييه وايد رغم انه ماشي حوارات امبينا غير السلام عليكم لو شافني بالصدفه ولا يوم العييد وكنت استحي وتعرفون بعد حركات بنات العم يوم يعلقون على كل شي المهم دخلت 17 سنة وكنت ثانويه عامه وحددو الملجة كان في الفصل الثاني والعرس في الصيف طبعا كنت مستاااانسه طايره من الوناسه غير جي قبلوني بالجامعه وحسيت عمري صدق محظوظه ريل وجامعه وربيعات وكل شي شو ابا اكثر عن جي؟ المهم ملجت وطبعا عندنا عادي الريال يرمس حرمته وقت المجلة بس الي استغربته هو في البدايه ماطلب يرمسني كملنا اسبوعين وانا كنت افكر ليش يوم ربيعاتي يسالوني كنت استحي اقولهم هو مادقلي كنت اجاوب عليهم واقول استحي ارررمسه مابا , وانا من الصوب الثاني خاطري اعييش اللحظات الحلوة ايام الملجة وبعد اسبوعين طرشلي مسج وكان مسج جمعه وانا كان عندي رقمه ومسجلتنه بعد( سيدهم) واستاانست بس سويت عمري اوني ماعرفته طرشت مسج وكتبت منو الرقم هب مسيف عندي رد بكل برود انا فلان بدون اي اضافات كان ينهي اي حوار بيصير بينا , سكت ومارديت عليه لاني ماعرفت اصلا شو ارد علييه ؟ المهم كان بين فتره وفتره يطرش مسج واحيانا يدق ويطمن وانا بديت العب دور الزوجة من الحينه يعني يوم اطلع استاذن منه وكان يطرشلي مسسج بكل برود اوكي براحتج عمره ماقالي لا تتاخريين , ويين بتسيرين , مع منو؟ ابد ابد تمنييت يوم يقولي لا بس مره طنشت وخلصت الثانويه وطلعت نسبتيه وانقبلت بالجامعه كنت فرحااانه بدرس وعندي رييل والحياه حلوة جدامي , ويوم المنتظر يوم الموعود يوم العرس وانا مستاانسه بفستاني الابيض زفونا انا وهو وكان ابوه حاجز لنا ماليزيا هديه زواجنا , المهم بنفس الليله ونحن بالغرفه كنت بعدني بفستاني الابيض كنت مقهوره لان قوم امي خلوني ماساعدوني افصخ ثيابي ولا ابطل شعري يعني كله بسوييه اروحي؟ هو كان ياالس وساااااكت وانا كنت مستحيه ماكنت متعوده علييه ولا اعرفه ولا شي بعد ماكنا ساكتين قالي في موضوع ابا اقولج اياه قبل لا نبتدي حياتنا , انا ززغت والله وبطني عوورني حسيته واايد جاد طالعت بعينه شفته جدي صدق ,مارمت ارد علييه من الحيا , قالي انا ماكنت ابا اخذج واظلمج وياي بس الوالد حلف عليه اخذج وانتي هب في خاطريه وانا يابنت عمي احب فلانه وابيها من كل قلبي وان شاءالله راح اخذها الحينه ولا بعدين وانتي بتميين بنت عمي ولج كل الاحترام , انا يالسه اسمع كل كلمه احس بسيووووف في قلبي , محتترقة متققطعه وكنت اشوفه سيد كل الشباب ليش جي انا شو سويت ماعرفت شو اقول ولا شو اعبر حتى تم يطالعني عشان ارد عليييه بس مارمت عيوني غرقت بالدموع وتبى اطييح بس عقلي هب راضي انها اطييح حسيت بسكاكييين يالسه تقطعني كل الي سويته نشيت من مكاني وقفت جدام المنظره اشوف نفسي اتامل عمري انا حلوة؟ فيني شي غلط؟ لفيت ويهي صوبه وسالته وانا احس عقلي هب وياي انا حلوة؟ ماتوقع هالسؤال حسيته مصدوم شفته يطالعني قالي انتي هب حلوة بس انتي قطعه يوم قالي هالكلمه صحت ومابغيت اشوفه دخلت الحمام ويلست اشاهق في الحمام مابغيته يشوف دموعي ولا يشوف انكساري ولا شي تميت مادري كم ساعه في الحمام مكياجي اخترب وحتى مطيت شعري وانا اصييح ويوم شفت شكلي في المنظره حسيت عمري ازييغ يلست امسح مكيااجي وطلعت وانا ماريد اشوفه لاني ابا مزيل مال المكياج بس الحمدالله ماشفته سرت صوب الشنطه وشليت المزيل يلست اخوز المكيااج وبطلت شعري وانا مشغوله بشعري سمعت صوت الاذان من سمعت الاذان يلست اصييييح طبعا الاذان الي اطري اذان الفون حاطه الساعه ع الجرس وصوت المقرئ خلاص احس اني اختنقت من الصياح ويلست احاول افصخ ثيابي كااان معاااااناااه جدا خخصوصا محد يساعدني خلصت وسرت توضيت وصلييت ركعتين ويلست اصييح من خاطري على بداية زواجي , الي بدايتها جي يلست ادعي واستغفر ربي نشييت ورحت انسدحت ع السرير ويلست افكر شو اسوي اقوله يطلقني بس الناس شو بتقول عني ماتمت وياه ليله اكييد فيها شي ؟ ولا اكمل حياتي , انا في خاطريه ابااه والله بس مارمت اتحمل كلامه يرررن في اذني انت هب في خاطريه شو اقوى من هالرمسه يوم ريال يرفض المرآة اكيد بتقوليون في خاطركم اكيد فيني شي ؟ كل وحده جي بتقول لو ريلها جي قالها ومن بين هالافكار اخيرا غفت عيني ورقدت ونشييت الساعه 10 الصبح وشفت حولي كل شي مثل ماهو وطلعت في الصاله ومالقيته . اصلا مادري اذا هو تم بالصاله امس ولا طلع ماكان له حس ابد ومرت ساعه تقريبا سمعت الباب ينفج شفته جدامي حسيت اني ابا اصيح بعد كاني ماشبعت صياح بس زخيت عمري وسويت اعمري اوني ارتب سماني دش وقالي جهزي اغراضج بنسير انسلم ع الاهل وبنسافر قتله بانفعال ماريد اسلم على حد طالعته ابا اسافر قالي الطياره الساعه 1 فليل ؟ لو الساعه 5 الفير ماريد اشوف حد ممكن؟ حسيت نفسي هب رايمه اتحمل ابا اصييح اباه يطلع عشان اصييح قالي بس شو اقولهم قتله قولهم الي قلته لي امس؟ انصددم وتم يطالعني وقالي وانا سكته وقتله الي قلته امس كفى ووفى وانا ماريد اسلم لا على اهلي ولا على اهلك ممكن طالعني قالي اوكي براحتج وطلع وسكر الباب بعد واو ماطلع قفلت باب الحجره ويلسست اصيييييح واصيييح والله تصدقون ماتريقت وتمييت في الغرفه ليين الساعه 2 ونص وتلفوني اغلقته وسمعته يدق الباب يقولي ظهري يابو الغدى طالعت شكلي بالمنظره شفت عيوني مورماات من الصياح اكييد بيعرف اني كنت اصيح حاولت اعدل شكلي مارمت طلعت عشان اتغدى شفته يالس ويلست الصوب الثاني محد رمس وكل واحد مشغول باكله كنت يوعاانه وكنت بنفس الوقت شبعانه هب عارفه شو اسوي وكيف بتكون حياتي خصوصا اني احبه اريد اكرهه بس مارمت يلست اكل وهو نش يغسل ايده رن مبايله ياني فضول شفت الاسم ( my love ) حسييت بطعنه تميت زاخه الفون اطالع الاسم وهو شافني طالعته قتله تتصل فييك مانشيت من مكاني ولا غيره عطيته الفون وكملت اكلي اسوي عمري عااديه ولا كان صار شي اصلا حتى هو ماهتم شل الفون وطلع يرمسها بررع ,نشييت غسلت ايدي ويلست اصييح في الحمام احس هب عرس هذا جحييم ولا عقاب ولا شو بالضبط طلعت من الحمام واحس الوقت مايمر ياني وقالي الاهل يتصلون وتلفونج مغلق وايد يحاتون . رديت عليه طزز انصدم بردي طالعني قتله مب هم سبب في اللي نحن فيه اليوم؟سكت قتله ها ضريبة العادات والتقاليد خلهم يدقون ويفجرون الفون انا مابا ارمس ولا واحد فيهم , المهم مرر الوقت وسرنا بوظبي عشان نسير مطار ويلسنا هناك وعقب طارت طيارتنا وكنا حاجزين بالفندق وكان الجناح الي حاجزنه في غرفتين طعني واايد يوم سمعته يقولي هذا غرفتج وهذا غرفتي وشل سامانه وراح والله والله حسيت سكاكييين تقطعني قلت لهدرجة يعني؟ كل يتحراه شهر العسل والله لا عسل ولا غيره طوول الوقت هو بررع يحوط بروحه وانا بالغرفه بس يطلبلي الاكل ويروح ماكنت اشوفه غيير بالنادر وكنت يوم امل امشي حولين الفندق دقيت لاهلي ورمستهم وحسستهم باني مستتاانسه والعروس السعييده وهم فرحانين والمهم رجعنا البلاد وسرت بيت عمي واهني شفته غير معاملته معاي استوى اطيب شوي ماعرفت ليش اصلا تغيير يوم حسيته تغير حطيت في بالي ليش ماحارب واكسبه؟ يمكن يحن علي ويحبني انا وينسى هاييج وتكون هي نزوة في حياته وبسامحه بس بشروطي المهم بدييت اغير معاملتي له بدييت احسسه بالحب وشرات مال الحريم يسوون وصار الحينه مايرمسها جدامي ولا يحسسني ان اصلا يرمسها قلت ها امل كبيير ان يرجعلي وان يحبني بس كنت اجااهد واجااهد مره كان يالس يطالع التلفزيون في قسمنا في بيت عمي وشكله رقد ورن فونه وكان مسيف ا( الغالي) شكييت بالوضع ضغطت ع لاخضر وسمعت صوتها وهي تقول الو الو حبيبي حسييييييييت بطععنه شليييت الفون لا شعوريا وكسسرته ونش من نومه وطالعني وطالع الفون مستغرب ويسالني شو صاير قتله انت مااتحس ماتخيييييل ماتستحي الساعه 2 مخلي الصايعه الضايعه الي لا لها ولي ولا حسيب يراقبها تتصل بك هالحزة قالي اسكتي واقصري الشرر وسيري الحجره قتله ماابا هب ساااكته عن شي انا هب طمه يالسه جدامك وهاااييج الصايعه الكلبه يبالها ابوها يربيها من اول ويديد ماحسيت غير صفعني ومطني من شعري وقالي هاييج اشررف منج وفرني ع الارض وسار يلست اصييح في مكااني متقطعه منقهرره محتررقه يضربني عشانها؟ حدرت الحجره شفته منسدح وراقد رقدت حذاله وماقلت اي شي ومن خلال المعاشرة عرفت ان ابووه مهددنه اذا ماخذني بيتبرا منه لانه مواعد ابوي , تمنييته ياني وقالي قبل الملجة يمكن ساعدته وماوصلت للامور هاي كملنا سنه ع العرس وطبعا من خلال هالسنه كان يضرربني كل اغلط عليها وعممره ماعتذرلي وعمره ماقالي حبيبي ولا حياتي ولا من هالامور كان يناديني باسمي وحتى بتلفونه اسمي عنده ( ام زايد) لانه يتمنى ولد اسمه زاايد ومره احييد قالي انا بسيير دبي كل عاده يوم يقولي بسير مكاني كم يووم مااااطمن اتم اضارب وياه واقوله ويا منو؟ يقولي مع ربعي وانا اقوله جذااب ماعندي ثقة فييه ولا شي ماروم اثق فييه ابدا ويتم يقنعني ونضارب وجي ليين مايروح ولا يهتم بكلامي يوم سار كمل يوميين هو ع اساس اسبوع , حلمت حلم ان كان راقد مع وحده وجي زغغت وفي اليوم الثاني اتصلت به ورمسسته قتله ويا منو انت في دبي انصدم من سؤالي المفاجا قالي قتلج مع ربعي قتله جذااب قالي شوفيج انتي ؟ قتله انت هب ويا ربععك وانا متاكده ., قالي شو قالولج عرفت اهني بيعترف قتله شافوك تتمشى مع وحده قالي انزين ساير دبي بروحي واتلاقى معاها ارتحتي قتله اسمع وقسم عظما مارديت اليوم البيت والله انزل لابوك واخبببببره كل شي من اول ماخذتني ليييين اليوم والله وانا حلفت سكرررت الفون وتم يدق ويدق وغلقته يلسسست اصيييييح اصييييح مارمت اوقف عن الصياح ليين متى اتحمل واصببر ليش هب رايمه اكسسبه ليييش؟ بس هاللي وصلني منها للحينه قالت اذا لقت حد يتابع سالفتها بتكمله^^ وترى شي جزء ثاني لانه السالفه هب لين هني وبس منقووووووووووووووووووووووووووووووووووووول
الله يعين .. مشكلة العادات والتقاليد وسالفه محيرها تسبب مشاكل بين الاهل الله المستعاان ننتظر بقية القصة ..
ماقول الا الله يعينك والله يساعدك شنو تبون من الدنيا غير مشاكل وعوار راس دنيا اختبار ومتحان من الله عز وجل مافي احد خالي من المشاكل وشيء اهون من شيء ما اقول غير يالله يالله انصر المظلوم ولاتنصر الظالم هدا شعاري من اليوم ورايح لان دنيا هل يوميان كل مشاكل الي في اليبيا ان شاء الله ينتصرون والي في البحرين ان شاء الله ينصرهم والله يمهل ولايهمل مثل ماصر حق حسني رئيس مصر ان شاء الله عقبال الباقي
الله يعينها انا وانا اقرا القصه حترق لبي شلون اهي الله يكوون بعوونج ويسخره لج يااارب ويحط حيله بينه وبين هالخايسه الي يعرفها يارب وانا معاااج ياقلبي كملي القصه عفيه لاتتئخرين
اذا صج الله يعينها ويصبرها ربي لايحط احد موقفها بس خبوبة تقريبا نفس موضوعي بس انا على سوال وانتي قصة اتمنى انها صج مو منقووولة كمممممممممممممممممممملي ناطرتج شنو صار فيها بس احس راح يحبها وينسيها كل اللي صار ناطرتج احر من الجمر تقبلي مروري
اوووووووووووووف يقهر وربي بصراحه هي ماعندها سالفه جان من ثاني يوم راحت لاهلها وانهت الموضوع عشان بكره مايطلعون فيها العيب
حبايبي تري القصه واااااقعيه انا نقلته من منتدي ثاني اسمحولي بس اتكمل البنت قصتها بحط لكم فاااااااااااااااااااااااااااااالكم طيب بس تعرفون سالفة العادات والتقاليد هااااااي واااااايد تستوي انا اعرف وحده والله نفس الموضووووع وكل يوم اتصيح بدل الدمووووع دم بس انا احاول اصبرها لان مااااافي غير الصبر لنا احنا الحريم ومشكوووووووووووووووووووووووووووووووووووورين حبايبي على ردكم والسموووووووووحه
بناااااااااااااااااااااااااااااااات اخيرا كملت القصه الان البنااااات فى المنتدي واااااااااااااااااااايد اتضايقو هااااااااااااااااااااااااااااااااااااااااااااااااااااااااااااااااااااااي القصه والسموووووووووووووووووووووووووووووووووووووووووووووووووووووحه -------------------------------------------------------------------------------- ياجماعه شوي شوي علي , تراني انا بس مطراش هب راعيه القصه انا ,انا اعرف السالفه بمختصر بس قريت السالفه ويااكم يعني لاتلوموني , بعديين هي قالت ان ايدها عورها يوم تمت تكتب عشان جي وقفت ومن حماستها طلبت اني انزله قبل لا تخلصه ماتوقعت جي يستوي ^^ والبعض تضايق , بخصوص ان الموضوع تكرر انتو تتحرون الامارات صغيره؟ وماشي غير ريال واحد جي يسوي؟ لا والله لو اييب سوالف البنات بتعرفون ان واايدين غيرهم يعانون جي بس في الذكيه الي قدرت تنسيه وفيه الي مارامت تسوي شي, ع العموم انا رمستها اليوم بخصوص تكمله القصه قالتلي فليل بطررشه صوبي بس يوم قرت الردود خافت خخخخ طرشتلي اتقولي طرشت القصه ع الايميل وخلصته كامل خخخ خفوا عليها , يوم رجع من دبي كنت حاطة ريل على ريل اشوف التلفزيون واول مادش الحجره حسييته الشياطين كلهم ع راسه وده يذبحني وعلى طول قالي انتي تهدديني قتله انا ماهددك انا اباك تستحي على ويهك هب تسير تتصيع في دبي مع ربيعتك اسبوع كامل , والله لو ماكنت راد سالوني اهلك وينك بقول في دبي مع ربيعته قالي انتي ماتفهمين مافيج مخ ياخي كيفي اسوي الي اباه انتي زوجة لقوم امي وابوي وبس طالعته قتله صدق زين خبرتني يالله برقد انا طنشته ورقدت وانا من داخلي مييته من القهر وابا اصيح بس مابا اصييح جدامه وطبعا انا اداوم في الجامعه من بعد ماعرست بعد شهر تقريبا كان دوامي الكل طلب مني اوقف اونه عشان توني عروس يديده بس انا ماطعت حبيت اكمل والهي نفسي شوي كنت اداوم بالجامعه وكنت اسمع ربيعاتي بالجامعه معرسات الي تقولي ريلي والي تقول ريلي كنت افكر شو اقولهم عن ريلي ومره كنا يالسين قالت وحده كل وحده تقول متى قالت حق ريلها احبك ومتى هو قالج انا ماعرفت كيف اتهرب من الموضوع بصراحة ولا مره انا قتله ولا هو حتى قالي ليش هو في حب بينا اصلا؟ انا تعذرت ان كلاسي نص ساعه بيبدا وطبعا دررب من المطاعم لين الكلاس انا ادرس في جامعه الامارات وكنت ايام المباني الجديمه وعاد تعرفون كيف المباني الجديمه درب طوييل وهالشي عطاني عذر اني انش من الورطه , اختيه الي اكبر مني كانت تدري بالموضوع بس ماخبرتها ان كان يمد ايده عليه كانت دوم تقولي دلليه ودلعيه وقال يوم زواجكم قررب ويوم ميلاده بعد شهر من عرسنا يعني سويله سربرايز , طبعا يلست انا وهي نسير من مكان لمكان نتشرا حق يوم عرسنا واشتريتله بلستيشن هو مدمن ع البلستييشن وااايد يحبه خذتله اليديد لانه ماكان عنده خفت يرد البيت اليوم من وقت وانا اريد اسوي ترتيباني خليت خواته يساعدني وخبروا اخوهم الصغير الي عمره 14 سنه يمثل ان تعبان ويسير مع ريلي المستشفى ريلي في البدايه ماطاع قال قول للدريول عاد مني مناك اخر شي وداه ونحن يلسنا نررتب الغرفه ونزينها وسرت هاليوم الصالون شعري طوييل لين اخر ظهري قصيته على طوله مدرج وسويت مكياج خفيف وااااايد اصلا هم كثروه بس انا خففته في البيت وتكشخت وجي محد في البيت يدري شو مسويه بالغرفه غير خواته وامه قسمنا فووق والحمدالله مجابل غرف خواته هاللي مريحني يعني , دخل ريلي الحجره وكان مطفر بس انصدم من الي شافه وانا كنت مستحييه واايد اول مره اسويله هالحركات بس كنت سايعه اني انسيه البنت ويوم شافني قالي شو السالفه ؟ قتله وانا كنت خايفه من ردة فعله خفته يضحك عليه ولا شي جي قتله اليوم يوم زواجنا قالي والله ؟تضايقت يوم عرفت ان ناسي بس قلت ماعلييه هو اساسا ماكان زواج , قتله هييه وشاف الاكل شفته استانس قالي صبر بسيير اتسبح عييل ريحتي ادويه ومستشفى استانست ع ردة فعله حسيته نفس اليهال يوم يشوفون شي يديد ويعيبهم دخل وتسبح وعشنا جو عجيب بس تعشينا وجي وكان سوالف عاديه ضحك وغشمره وكان يقولي سوالف ربعه يعني ماكان سوالف رومنسيه وجي المهم عطيته الهديه وليتني ماعطيته والله شل البلستييشن متشقق وشغله ويلس يلعب وعقب قالي تعالي تعالي ببارييج بس ويت بيب شريط المباراه وبيي سار تحت ياب الشريط وياه ويلسنا نلعب بلستيشن كوره قدم طبعا مصخرني واايد الصراحة حسيت اني هب خسرانه لو تميت اكسبه صوبي وانسييه البنت , علاقتنا شوي بدت تتحسن شويه بس ماقولكم ان ماتضارب اتضارب وياه يوم امسكه يرمس هاييج بس الحمدالله في تحسن وكنت اكل حبوب منع الحمل من ورااه قبل وماكشفني يوم شفت علاقتنا بدت تتحسن ودرت الحبوب وكل شي قلت مافي ضرر لو حملت يمكن كملت سنتين بدون حمل والاهل طبعا يسالون ليش وليش كنت اقولهم بعده نحن نبى نستانس بحياتنا انا ماكنت ابا اييب عيال عشان مانتوهق عقب طبعا ودرت الحبوب وكل شي وحملت السنه الي طافت 2010 وكنت مستانسه وخبرته وهو استانس بعد يعني حسيت حياتنا بدت تمشي صح وانا في الشهر السادس ياني وحسيت قلبي وقف يوم قالي انا اسبوع الياي بملج ع البنت كل الي اذكره اني فلعته بالابجوره بس مايه فيه كنت افلعه واطرده من الحجره وكنت ابا اطيح الياهل الي في بطني كنت مقهوووره والله مقهووره وفليل يوم رجع شافني هاديه ماقتله شي وحاول يرمسني بهدوء قتله مزاجي متعكر خلاني وررقد وشليت فونه وشليت رقم البنت واليوم الثاني اتصلت فيها قتلها انتي شو من بشر تخربين بيت ريال وحرمته حامل وجي قالت والله انتي الي دشيتي حياتنا قبل لا يكون ريلج كان يباني , المهم تضاربت شوي وياها ع الفون بس اظاهر ماخبرته اني اتصلت ابدا يوم سار الدوام شليت ساماني وام ريلي تشوفني قالتي شوفيج قتلها ولدج بيعرس وانا ماريد اتم ع ذمته تمت تحلف ان مابياخذها ابوه مابخليه قتلها عموه الله يخليج خلوه ياخذها والله اذا تبين ولدج يستانس بحياته خلوه ياخذها انا من صوبي والله ماريده عفته هالريال ماريده قالتلي كان ملعوزنج قتلها شو فايده الرمسه اقنعي عمي لو ماقتنع انا برمسه سرت بيت هلي هو يوم درى ياني وحاول يرجعني البيت قتله ماباه ارد المهم قالي بيخليني لين ماربي اكيد بهدا وبعقل واقنعت عمي يخطبله ملج ع البنت وانا ربيت بعد ماطلعت من الاربعين بشهرين عرس وحاول ان يردني هب عشاني لا عشان بنتي ^^ بس انا ماطعت وقتله والله اذا ماطلقتني بسوي بلاوي بين عايلتنا وعايلتكم والله وانت تدري اقدر افرق الاهل عن بعض خلنا نطلع بالمعروف وافق وطلقني وخذ البنت الي يباها , وانا ربيت بنتي والحينه بنتي عمرها 7 شهور , وبين فتره وفتره يطرشلي مسجات تتوقعون شو.؟ مسجات فيها رمسه حلوة والله يوم اقرى مسجاته تيني غصه اقول ليش ماكان يطرشه قبل؟ وبس هاي السالفه كلها والسمووحة من الجميع ^^ السموحة جماعه الخيير
حبيبتي الله يعينج والله عورتي قلبي .... بس قولي حسبي الله ونعم الوكيل ... والله يخليليج بنتج يارب ويعوضج خير انشاءالله .... وهذا نصيبج ماتدرين يمكن خيره
الحمدالله علي كل حال خيره ان شاء الله والله يعوضج بلي اجسن منه ومايندرى يمكن تردون حق بعض ويكره الثانيه
