تربيه عمليه تناشدكم

السلام عليكم ورحمة الله
شلووونكم بنات؟؟؟

واللي يعافيكم انا تربيه عمليه
تخصص لغه عربيه
محتاجه خبراتكم
ابي اغني مع التلميذات اغاني مثل اذا البنت جاوبت شلون اشجعها
واذا بغينا نروح للمهاره شنو اقووول
يعني ابي ابداعات لان المشرررف دايما يعلق ويبي ابتكارات
الله يجزاها الجنه اللي ترشدني
واللي عندها افكار لوسائل
يعني عطوني كل اللي عندكم
وابي افكار لهمزة الوصل والقطع وكل مهارات اللغه العربيه

بإنتظاركم

هلا أختي

أولا حياج الله بالمنتدى

وثانيا ربي يعينج على تخصص اللغة العربية

ما قلتي لنا أي مرحلة تدرسينها علشان افيدج أكثر

شوفي المكاتب فيها برامج تعليمية مثل برنامج السنبليقرأ لج الدرس بصوته

واهو مسوي اغلب المراحل دروسها كلها .وبانتظار المرحلة علشان افيدج أكثر

الله يجزاج الجنه ياقلبي
انا ادرس المرحله الابتدائيه بنات
الصف الثالث
ووين القى برنامج السنبل؟؟؟

هلا أختي بتحصلينه بأغلب المكتبات ولد اخوي شرى لي السيديات من مكتبة بالجهرة بجانب فطاير القمة

بتحصلين للمرحلة الابتدائية السي دي فيه قراءة للدرس بصور واضح وصحيح نطقا وضبطا

وفيه معاني الكلمات الصعبة - وتدريبات على المهارات المقررة .

وكذلك بتلاقين عندهم بطاقات جاهزة للهمزات بنوعيها

طبعا لازم تسوين بطاقات ثابتة ومغلفة تغليف حراري والبطاقات هي :

1- بسم الله الرحمن الرحيم
2-مادة اللغة العربية
3-عنوان الدرس : تكون صغيرة شوي بالنسبة لبقية البطاقات لأنج بتكتبين يمها اسم الدرس
4-الجملة العلاجية -الجملة الإملائية - المهارة - النظائر .
5-الثروة اللغوية .
6-المهارة الهجائية .
7-6بطاقات فارغة ومغلفة لكتابة النظائر الهجائية والثروة اللغوية .


أهمية البطاقات الجاهزة السابقة :

تساعدك على توفير الوقت والجهد منظر مرتب للسبورة .

وتقدرين تجذبين البنات بملصقات وبرية وبلاستيكية تحصلينها عند مكتبة الاسرة بالفحيحيل >>بنت بطوطة بكل مكان ادور وسائل

كل درس ابحثي من الانترنت عن صورة مناسبة له وغلفيها وثبتيها بجانب عنوان الدرس .

اطلبي من التلميذات أن يثبتن سبورة لاصقة بظهر كتاب اللغة العربية لاستخدامها في كتابة نظائرهن للجملة العلاجية وهذا مهم.

حاولي تألفين نشيدة لكل مهارة هجائية من مثل :

أنا التاء المربوطة انطق عند الوقف هاء وعند الوصل تاء

برتقالة برتقالةُ .

المرحلة الابتدائية تحتاج تبسيط وتجسيد يعني :

لما تشرحين لهم مهارة لغوية عن ضمائر المخاطب قولي للتلميذات هؤلاء عائلة واحدة مكونة من الاكبر سنا أنتم وأنتن والاوسط انتما والاصغر انت وانتِ

وعلى فكرة أبسط وأسهل وأخف منهج هو منهج ثالثة ابتدائي

ودائما وأنتِ تحضرين افتحي الكتاب المدرسي وكتاب الالعاب اللغوية وشوفي التمارين المناسبة للمهارة اللي بتعطينها للتلميذات

وثبتي بتحضيرج إنج بتنتقلين لتطبيق المهارة من خلال الكتاب المدرسي صفحة كذا أو الالعاب اللغوية صفحة كذا علشان ما تنسين

أتمنى أكون افدتج

وأي استفسار حاااااضرة ​

الله يجزاج الجنه ياقلبي
فدتيني حيييل
بس ودي تعطيني كل اللي تعرفينه من اناشيد
ابي اناشيد للمهارة
وقبلها ابي انشوده تشجيعيه
يعني اذا البنت جاوبت صح شلون نشجعها؟؟؟
والله يجزاج الفردوس الاعلى على رحابة صدرج

هلا أختي

إذا جاوبت البنت صح خلي البنات يسوون صفقة بيدينهم

ويقولون مع كل كلمة أحسنت ( أربع صفقات )ممتازة فاطمة ( اربع صفقات ) وبعدها يرفعون ادينهم فوق ويقولون هيييييه

واشتري لهم هدايا من ابو مئة فلس لاتعطينها الا للي اجابتها مميزة وممتازة

واحرصي اختي على الاجابة الكاملة يعني لا تعطيج البنت اجابة مبتورة من مثل :
ما اسم دولتك ؟

الكويت

لا خل تقول :

اسم دولتي الكويت >>> وشددي على هالاجابة وخل يعيدون البنات الاجابة

وان شاء الله بشوف لج زميلاتي وباخذ لج منهم المهارات والاغاني

ورياريت تحددين لي بحسب المنهج شنو المهارات اللي بدرسينها للبنات علشان احصرها لج ويكون اسهل على جمعها

وحياج الله

الله يجزاج الفردوس الاعلى
ويسخرلج عباده
مهاراتي اللام الشمسيه والقمريه
اسلوب الامر
الالف المقصورة
ادوات الاستفهام
التاء المربوطه والمفتوحه
ضمائر الغائب
الهمزة المتطرفه
ضمائر الخطاب
ضمائر المتكلم


وابي ماعليج امر طريقة شرحهم للمهارة
يعني شلون يسوون تمهيد
لان المشرف الله يهداه يبي حق كل مهارة تمهيد ووسائل
يعني لغز او مسرحيه او نشيده

بانتظارج باحر من الجمر

قوة


انا لما كنت تربية عملية كنت اخلي يشجعون البنت


تحية تحية للطالبة الذكية (( فلانة ))

الله يجزاج خير باقلبي ع الافاده

للرررررررررفع

للتشجيع وحده وحده وحده تستاهل الصفقه

الله يجزااااكم خيييير

يالغاليه ما يجوز تغنين قدام المشرف الرجل

واستعينى بدلا منها بالاشرطة مالت طيور الجنه