مساء الخير ياكويتيات مشكلة اختي مشكله واذتنا كل يوم يايتنا تبجي ومالها حل اهي الله يسلمكم عايشه مع زوجها بسلام ومافي بينهم اي مشاكل وساكنه عند اهل زوجها بس المشكله بخالتها ام زوجها تحتر منها وماتحب لها الخير واذا تجمعوا بيوم الزواره تضحك مع كل الكانين وتحقر اختي وماتسولف معاها واختي تحلف تقول انها مومقصره 24 تطبخ وتودي وحتى الجيران قايمه فيهم واي مناسبه عند خالتها اهي تجهز حتى الهدايا اشكال والوان بس متضايقه حيل من تصرف خالتها ان ماتعطيها اهتمام وتكيد لها وتسبب لها مشاكل وماتحب ان ولدها يشتري لاختي شي او يسافرون او ياثثون حتى عرس ماسوت لهم ولا استقبال وحتى لما اختي طلبت من زوجها استقبال ولاده امه زعلت وقالت لاتسوي لها والله اختي مسكينه احس اني كرهت الزواج والخالات شرايكم شالحل؟
صباح الخير والله الخالات مشكله اهم شي زوجها اذا زين معاها خلاص تحمل خالتها واكيد بتغير وصدقيني لو طنشت ولا اهتمت شوي بتلقين خالتها تغيرت معاها قولي لاختج تشيل ايدها من الشغل ولاتجاملها وتلقينها تغيرت وتطنشها لانه اكيد تبي تزعل اختج بس مواكثر من جذيه في خالات مبدئهم فرق تسد الله يعينها وعندي رايي ثاني لو ماتقدر تطنش تدعي لها بالهدايه والله يعينها انا انقهرت عليها صراحه
والله ماتتصورين حتى اذا احقرتها تروح تشيش الولد عليها حسبي الله ونعمه الوكيل اشكرج على مساعدتج والله يوفقج
هلا أختي قولي لاختج لا تخلي محور حياتها خالتها وخل تقول دائما لما تشوفها اللهم اكفنيهم بما شئت . . .وخل تتكلم ويا زوجها وتقوله ملاحظاتها اللي تشوفها من خالتها . . .بهدوء ومن غير بجي وأختج قاعدة تعطي أكثر من طاقتها قولي لها سوي بحدود طاقتج وفق ما يرضي الله وخل تشتغل وقت فراغها بأي شي مفيد وربي يهدي سرهم ويوفقها ويهدي لها زوجها وخالتها
اللة يعينها صج قهر خلص اتشيل ايدها من كل شي وتطلب من اللة الهداية لها ولاترضى ازيادة بجرح كراتها دامها واثقة انها ماقصرت خلص واتحاول اتفهما انه هذا مايرضى اللة وخلقه تبعد زوجها عن المشاحنات هذي لانه حرام بيطيح بنارين امه وزوجته-انا صارلي هالموقف بس ماتصدقون مع ابو زوجي كان يطلب انا اطبخ وخدامتي اتنظف لهم ويتدخل بادق تفاصيل حياتي زعلت واجهته بالموضوع جدام حمولتي وحلفتهم حتى الجناين سالتهم عمره تدخل في حياتكم وهل انا مقصرة بشي قالو لا اهنيه واللة ثم واللة ارتحت اني ماخليتها بقلبي ولاقلتها من ورا ظهره شهرين ادخل عليهم واطلع بالسلام عليكم وامشي وبالاخير جا يراضيني ومااااعاد يتدخل خل اتسوي نفسي وتدعيلي بالولد الصاح ياارب
ياغاليه تاكدي ان اختج مو غلطانه باي تصرف تسويه ومحد بيعتب عليها اذا صرخت او بجت لو اشتكت بس وين الفايده ووين دور العقل واهي بنت صغيره والخاله مره كبيره يمكن تكون شايله عليها او محتره منها او مليون سبب ثاني بس هذا ما يعني انها ما تقدر بشوية شطاره تحول السالفه لمصلحتها ........................... واااااااااااااااااااااااااااااااااااااااااااااي منكم يالبنات بس شطار تتميعون وتتدللون على اهلكم بس بالصج تصيرون بلمحة عين رياييل المطلوب منج انج تتاخذين هديه لها قيمتها وتروحين حق خالتج وتقولين لها خالتي انا شرين هلشغله حق فلانه ( حماتج المفضله عند خالتج)بس ما ادري انتي ذوقج وايد احلى علشان جذي قلت استشيرج !!!وابتدي معاها بسوالف ما لها علاقه بموضوع الخلاف وتكون سوالف خفيفه تقدرين تغيرينها بسرعه بس خليها اهي تحس انها الشخص المسيطر على السوالف وبعدين لما اييون حمواتج لا تطولين بالقعده وياهم. لا اخذي عيالج وقولي انكم اليوم معزومين عنداهلج مثلاواهم شي لا تقولين اي شي حق ريلج ولا تحنين عليه لانه بالاول والتالي انتي بالمركز الثاني بعدهم فلا تخلينه يختار . والرجاء بعد فتره كرري سالفة الهديه وخفي عن شغل البيت واذا طلبوا منج ردي ايدي تعورني والطبيب قايل لا تحركينها وايد ومثل ما اقول دايما للبنات وانتي وشطارتج
حبيبتي انتي لو بس تدرين اختي معاشها طاير كله تصرفه عليهم وماكو فايده اهم ناس مايستحون احنا توصلنا ان خلاص تقطع العلاقه معاهم وزوجها وافق لان الكلام اللي ينقط موسهل والله لايوريكم
ليش إختج ما تسكن بروحها هذا أحسن حل لجميع الأطراف وإذا مارضى زوجها تحن كثر الدق يفج اللحام وبعدين خل تعامل بالمثل مثل ما خالتها تسوي إهي خل تسوي لأن الطيب مو مبين بعينهم
حبيبتي لا تغير معاملتها معاها عشان تكسب ريلها وما يمسك عليها الزلة وبعدين اخاف اهي مو راضية على زواجهم وخل تدعي دايما بصلاتها ولا تخافين مو كل الخالات جذي الله يوفقها
لا تتغير وتتحمل ولا تحط في بالها وتضيق خلقها كل شي طاف عشان صحتها اهي اللي راح تتعب اذا اهتمت ومحد يدري عنها الله يفرجها ان شاء الله ويسعدها
ذكرتيني في ما مضى و بالهدايا اللي كنت اقطها عليهم بالهبل و مو اي هدايا ذهب و ملابس وحتى السفر و آخرتها.............. (مقيوله كل من يعمل بأصله) حبيبتي طاااااف و قولي حق اختج تطلع في شقه والله لو اهي تدفع اجارها و لا المغثه هذي و خل تقطع الهدايا و ماتزور الا اذا اعزموها و بالمناسبات
