السلام عليكم ورحمة الله وبركاته بنات المنتدى الطيبين من حبي لكم وثقتي فيكم قلت أستشيركم واستفيد من خبرتكم أنا بنت عندي 24 سنة ما شاء الله .. والله يتمم على إلي حواليني من بنات الأهل أو الجيران كلهم ما شاء الله يالهم نصيبهم وتزوجوا منهم من عنده عيال ومنهم من توه متزوج ومنهم إلي أكبر مني وألي كبري وإلي أصغر مني ... أنا من النوع إلي مالي علاقات أجتماعية حيل أستحي من الناس يمكن توني صار لي سنة بديت أشوي أتكلم وآخذ وأعطي بالكلام . طلعات وعلاقات بالناس ماعندي .. ويمكن هذا السبب في أن نسبة إلي يتقدمون لي قليلة وأهلنا مو من النوع إلي يحبون يتوسطون لأحد بالزواج . أتقدم لي من قريب واحد مؤهل الدراسي ثانوي ويشتغل بالجيش وأنا متخرجة من الجامعة. بصراحة الشهادة كانت تعني ولأهلي وايد أنه يكون بنفس مؤهلي الدراسي أو أقل شي دبلوم. بس بعدين حسيت أن الوالدة بدت تتنازل عن هالشرط وأنا بصراحة عندي أهم شيء أخلاق الواحد وطيبته وأنه يخاف الله ومن عايلة تناسبنا ويكون عمره مقارب فقلت مو مشكلة الشهادة بس ما أدري حسيت اخواني مو عاجبهم ومخوفيني من الموضوع أنا لما ألحين ما شفت الولد ولا سألنا عنا بس مبدأياً ما أدري أوافق ولا لأ ... بإختصار ترضين تتزوجين واحد أقل منج بالمؤهل الدراسي ؟؟؟ هالسؤال محيرني؟ وخصوصاً ان أنا كان عندي طموح أكمل دراسات عليا وفي انتظار تجاوبكم معاي .
اشلونج حبيبتي:smile: الشهاده مهمه بدون شك والدين مهم والنسب مهم.... لكن كل هذا مو سبب في السعاده الزوجيه ممكن يكون دكتور بس عشرته عسره ويجرحج باسلوبه وممكن يكون مدين بس عصبي وباله ضيج يعني ولا واحد منهم مقياس تتنبئين فيه بالزوج الصالح. والنصيب ممكن يكون ماله مؤهلات لكن عنه قلب طيب ويخاف الله ويسعدج ويكون حنون عليج طول عمره معاج واعتقد هذا كافي انج تكونين سعيده معاه. طبعا كل شي له عيوبه ومحد كامل ... تبين راي اخت تحبج في الله... طولي بالج وشوفي الريال وقعدي معاه وبعدين شوفي اهلج واذا محد عارض وخيروج وخلو القرار لج... قولي خل استخير... والخيره فيما اختاره الله. والله يكتبلج السعاده انشالله
مشكورة miss 26 حبيبتي تسلمين .. أنا أحس أن التكافؤ واجب وفعلاً الشهادة مو كل شيء لأن الحمدلله موظف وقادر انه يفتح بيت أنا عندي الثقافة والفهم اهم من الشهادة بس كنت محتاجة للدعم والقناعة وأشوف شنو رأي الي يكون بموقفي أختي تقول لازم تكوني مقتنعة علشان لو أحد باجر قالج " ويه واخذه واحد أقل منج " ما تزعلين ولا تتحسفين ومشكورة على كلامج ورأيج الحلو :teeth_smile:
مرحبا حبيبتي ......الله يوفقك ويسعدك ويكتب لك اللي فيه الخير بس ترى 24 سنه تضلين صغيره والمؤهل الدراسي مو مهم المهم ان تكون وظيفته حلوه وانه أخاف ربه ويصلي ولا يشرب .........وصلي صلاه استخاره
هلا أختي وحياج الله في المنتدى بما انج طرحتي تساؤلج وتبين النصح والرأي بقولج شغلة التوفيق من رب العالمين وانتي اهم شي استخيري ربج واهم شي بعد سألوا عن الولد أخلاقه ونسبه وآخر شي فكري فيه شنو شهادته ترى الدراسة والشهادة ماهي مقاس لمستوى الرجل الحقيقي الشهادة حاليا وفي بلدنا هي تخطي لمرحلة دراسية فقط بمعنى لا ثقافة ولا أسلوب ولا بعد نظر عند اللي ماخذين هالشهادات وما اعمم البعض منهم واغلب شهادات الجامعات حاليا تيك اوي والعقول رجعية وبدائية اعذريني ان قلت لج شغلة انتي بتتزوجين الشخص نفسه وإلا شهادته ؟ وربي يقدم إللي فيه الخير لج
انا اقول مو مهم الشهاده اذا كان الريال اخلاق ويخاف الله وايد اعرف ناس جامعيات وماخذين رياييل اقل من مؤهلاتهم وعايشين احسن عيشه والحمدلله وبعدين كلها توافيج لو تاخذين واحد عنده اعلى الشهادات او ماعنده شهاده بالنهايه التوفيج من الله حبيبتي استخيري والله يكتبلج اللي فيه الخير
حبيبتي موفقه انشاءالله الشهاده مو كل شئ اهم شئ اخلاقه وبالنسبه لدراسه كملي والله يوفقج بنت خالتي بامريكا تكمل ماجستير وزوجه دبلوم اقنعته يكمل معاها وانت وشطارتج موووووووووووفق يارب
مشكورة "غرامي باريس " أكيد صلاة الأستخارة شيء مهم ومحدد بس أنا إلي موترني كلام أخواني يعني ماأدري حسيت بتردد هم حابين لي الأفضل بس أنا أحس الأفضل بالخلق والدين ومشكورة على كلامج إلي يشجعني على رأيّ
مشكورة " أم عبدالله" بصراحة كلامج صح وهذا نابع من قناعاتي الشخصية بعد وايد أشياء أحسها عادي مثل العايلة والشهادة بس أهلي من نوع إلي 90% من الكويتين مثله مقيدين المسألة بثوابت معينة صعب يتنازلون عنها لما يقولون لي هذا الشيء عادي أقولهم عادي يقولن بسج كلام فاضي.. أقولهم " قال رسول الله صلى الله عليه و سلم ( إذا أتاكم من ترضون دينه وخلقه فأنكحوه إن لا تفعلوه تكن فتنة في الأرض وفساد كبير ) أنا جداً مؤمنه بالحديث بس محتاجه لدعم نفسي علشان أثبت على رأي وأقنع اهلي. مشكورة بعد مرة غاليتي ام عبدالله
مشكورة حبيبتي " نونو " والله أنا بعد لما أشتغلت صادفت بنات متزوجين اقل منهم بالمؤهل الدراسي والمادي بعد بس عايشين ومشيين أمورهم بس المشكله بالعايلة لما تصير المقارنات ولما يبتدي الكلام بس أنا أقول كلام وينتهي إن شاء الله وماله أثر دايم ومشكورة حبوبة على النصيحة
والله كلامج صح وأنا قاعدة أقولهم يمكن باجر يكمل دراسته قالوا لي إذا مارضى قلت كل شي قسمه ونصيب ولو قدرت أقنعه خيره والله اعلم إن شاء الله إلي فيه الخير يقدمه رب العالمين مشكورة خيتو " شغوف "
اهم شي بالرجل الطيبة واحساسه بالطرف الاخر واذا هو انسان خايف ربه وبعيد عن الخربطة انصحك بالارتباط فيه........والرجل على ماتعودينه عوديه على اسلوبك راح يتطبع مثلك الله يوفقك حبيبتي
حبيبتي استخيري ثم استخيري هذا اولا ثانيا يا قلبي الشهاده مو مقياس للرجووله او انج تقوولين خلاص هذا اهو الريال الي بيصوني ويقدرني ويخاف علي ويفتح بيت ويحترم الحياه الزوجيه ترى ياما رياييل عندهم شهادات بس مو كفوووو ولا صانووا حريمهم وياما رياييل مؤهلهم الدراسي بسيط وكانووووو قادرين يحشموون حريمهم اقووولج شغله تنصدمين منها خذيني انا مثلا امي الله يرحمها جامعيه متخرجه من مصر يعني على قولتهم تعليم برا وتزوجت ابوي الله يرحمه اللي عنده ابتدائي !!!! شرايج بهالشي والله والله النصيب ما تدرين وين يقطج امي الله يرحمها كانت تقوول انا كنت اتعنفق وما خليت واحد ما حطيت فيه عذروووب واتدلع بس عند ابووكم وكعيت بريك خخخخخخخخخخخخ حبيته وحبني وقفت وتحديت الكل عشانه وخذيته والله والله ما اذكر في حياتي كلها اني شفت ابووي يهين امي او يهاوشها او يزفها الا طول الوقت يقولها يما واهي تقوله يبا شرايج :shades_smile: والله ما ابالغ بالحجي هذا الله يرحمهم ويغمد روحهم الجنه يا رررررررررررب
فعلاً أهم شيء الأخلاق والطيبة والسلوك الحسن وغن شاء الله ربي يكتب إلي فيه الخير مشكورة يا الغالية على المرور
