سلام اشلونكم شخباركم بقولكم قصتي وابي استشارتكم انا كنت متزوجه سنه 2006 واطلقت لانه كان انسان شكوك واهله يدخلون وايد المهم توني ملجت ابتاريخ 20-8 ومن ثاني يوم ييه الحبيب وقال مابيج وبعدها ابيومين ردلي وتأسف ومن يوم الي ردلي قام يطلع عيوب الدين والدنيا فيني واول عذر اني متينه وعلما وزني 66 وطولي 163 يعني مومتينه وقالي جسمج مترهل وانصدمت وقتله مومترهل وقالي ابيج اتسوين شد واتسوين عمليه اتردين بنت وابيج اتقصين شعرج وتصبغينه واتحطين قمازات :\ قتله ان شاءالله لاني مابي الطلاق وقمت قصيت وصبغت وخذيت مواعيد مع الدكاتره بس كلهم على اخر شهر عشره وييه ابتاريخ 13-9 تناجر معاي واتهمني انه لي علاقه مع واحد بالدوام وقالي انا كارهج وبطلقج وبطلع اي عذر بس عشان اطلق قتله على راحتك لان حدي تعبت منه ولمن رحنا المحكمه قال ابي المهر والدبله وعلما صار دخول وقتله مو من حقك وابوي دش وقاله اخلي بنتي تتنازل عن مؤخرها ونفقتها واعطيك 1000 بس طلق وهذا من عندي واحنا محكمه جعفريه واهوه ماله حق ياخذ شي بما انه صار دخول ووافق وتحولنا على القاضي بس قال لازم اتييني الدوره عشان مااكون حامل والحمدلله يتني الدوره وبعد العيد بروح اطلق ونفس يوم المحكمه بليل الام دقت وقالت الولد يبي 1500 وانا عصبت وامي قالتلها 1000 واكثر ماكووو وانتوا اشرايكم بنات ادفع ولا اسويها قضيه ؟ وعلما اهوه يبي الطلاق
هلا حبيبتي . . . اللي هذا اوله ينعاف تاليه . . . اهو لما شاف فيج امور معينة وما اعتقد انها صحيحة هون وبعدها تراجع لسبب ما يمكن ضغط من اهله يمكن فكر ان كل شي قابل للتعديل والتغيير فرد مرة ثانية لكن اهو مزاجي ويبي شي على مزاجه وهواه . . . تعبج وياه . . . حبيبتي بأي حق ياخذ الألف ؟!! أنا ما اعرف للمحاكم الجعفرية لكن محاكمنا إذا الزوج دخل على زوجته ما يقدر ياخذ منها أي فلس لأن صارت خلوة شرعية ومو من حقه المهر . . . حسبيها صح إذا سويتي قضية شكثر بتدفعين للمحامي ؟ وهل أنتِ ضامنه إنه ما ياخذ ولافلس بحكم القاضي ؟ إذا طلع إن المحامي بياخذ أتعابه بحروة الألف عطي هالنزغة الألف وفكي عمرج وجان زين تعطونه الألف في المحكمة وقبل وما يدش على القاضي علشان مايمديه يحسبها وحطي فيهم عشرينات طباعة مزورة خل يستانس بالألف عدل وربي يقدم لج اللي فيه الخير يارب
مشكوره اختي ام عبدالله وانا عطيتج التفاصيل مختصره ولو اقولج بالتفصيل الممل راح يشيب راسج وفكرتج حلوه بالتزوير لوووووووول يبيله :teeth_smile: بس هالظالم له يوم ان شاء الله والمشكله عباله بنات الناس لعبه وانا بأذن الله بصير اقوى منه وبطلع خياسه جدام القاضي وبقوله كل شي وان شاء الله مااستحي من شي لانه في كلام صعب اني اقوله جدام رياييل بس بحاول اتحجى واقول كل شي واخذ حقي بأذن الله ودعواتج لي يااختي
مساء الخير حبيبتي والله الحل الاحسن لج الطلاق وانشالله يكون خير لج الحمدلله انج عرفتيه وانتي في بداية حياتج معه يعني موضوع الفلوس شي راجع لج تبين تعطين او لا وانشالله المحكمه تطلقج منه باذن الله ويرزقج بشخص يخاف الله فيج ويصونج
شكو تعطينه ألف @@ ألف طن يبط راسه قولي اميييييييييين اذا احتد الامر انج تعطينه فلوس عطيه ألف وفوقهم 500 شبشب يبسط فيهم ندخل بالجد.. اذا اهوه طالب الطلاق مو من حقه ياخذ منج فلوس.. تكلمي مع القاضي فهميه انه اهوه اللي بيطلق بعدين اسفه عاللي بقوله.. الوالد مو من حقه يدخل ويقول بنتنازل وبندفع لك.. هذي حياتج انتي لازم تبردين جبدج بالمحكمه قولي مابي اتنازل عن حقي ولاني دافعتله شي ..صدقيني راح يخق ويمكن مايطلق عشان لايدفع المهر ويمكن يتغير ويصير معاج زين على بو تتنازلين عن المؤخر. حركات ريايل تحياتي واسفه اذا بدر مني اي شي ضايقج.. لا تواخذيني ..بالتوفيق
ادعولي يابنات باجر موعدي بالمحكمه وانا بروح قبله وبقعد مع القاضي وبقوله كل شي وابيه يبرد قلبي لانه جد تعبت وابوي يقول مانبي مشاكل وطواله المحاكم بس ربي موجود راح ياخذ حقي استغفرلله شباب هالزمن ماخذين الزواج لعب وعبالهم بنات الناس لعبه بيدهم بس مااقول الا حسبي يالله ونعم الوكيل فيه ومشكورين يابنات
بالشرع والقانون ما يستحق ولا فلس لان هو البايع ويبي الطلاق ان شالله انه ياخذ جزاه نتيجة اللعب ببنات الناس 0وواضح من كلامك انة انسان يعانى من امراض وعقد نفسية _ الله فكك منه والله يعوضك بزوج صالح خير منه
الحمدلله يابنات خلصت وتطلقت وقطيت ال 1000 في ويهه مع الدبله والقاضي زفه بس ماكو فايده كان امعاند وكان الحمار بس همه الفلوس والدبله والحمدلله تطلقت ومن غير مااتنازل عن المؤخر واهوه الغبي مااستوعب كلام القاضي وان شاء الله بأذن الله بعد اسبوع تطلع ورقتي وباخذها وبروح ارفع عليه دعوى واطالب فيها مؤخري وانا اعلمه اشلون يلعب على بنات الناس
لان نيته خايسه صار جذي الله يخليج شبتفيده فيه الفلوس اليوم ياخذهم وباجر طايره وبعدين .........؟؟؟ بس عموما مبروك ع الطلاق والله يعوضج خير انشالله ويرزقج باللي احسن منه يارب بس اهم شي بردي جبدج فيه ولا تنازلين ع ولا شي ترا ما تنفع الطيبه وخاصتا مع ناس هيك !! تقبلي مروري حبيبتي (( عيشي حيااااااااااااااااااااتج حررره ههههه ))
الله يوفقج ويرزقج باللي احسن منه . . . وخليه يستانس بالدبلة والألف . . .لو منج ارسل له مسج واقوله لا تفسفس البيزات ترى بيردون لي
الطلاق ارحم ...بس مرمطيه بالمحاكم ودام هو اللي متبلي ماياخذ شي المفروض .. ولاتنسين الدعاء الله موجود ورحيم بعباده دايم ادعي الله في الضيق والفرج .
