مرحبا ,,,,, ابي ردود صريحه إشرايكم بالغيره الي راح فيها ضحايا والحمدالله يوم نجى اختي الله يكفينا شرها والحين راح تاخذ جزاها الموضوع هو : هل زواج الرجل من زوجة ثانية يدفع زوجته للعنف الإجرامي وردة فعل غير متوقعة ؟ وهل تكون ردات فعل الزوجة متفاوتة ومختلفة بحسب كل علاقة زوجية وآخرى ( بمعنى ان الزوجة تكون مستوى غيرتها بحسب شخصية الزوج وطبيعة علاقتها فيه ) تنبيه : رجاء أخواتي الغاليات ما نبي تجريح ومانبي سرد تفاصيل لحادثة الحريق ولا الدخول في موضوع حريق الجهراء نريد فقط أن تعرف الإجابة عن السؤالين السابقين بكل صراحة . . .
والله انا رايي اي ما الومه يوم تزوج عليها مدام هاي عقليتها,, انها تعاقب الناس اللي رايحين العرس على انه زوجها تزوج عليها هاي موعاقله اصلا
والله أأيد الغيره بس موالقاتله لان الزوج يصير ملك الزوجه والي تحب تحافظ على حبيبها بس بعقليه بس الغيره ولكن
كلمه وحده الله لا يوفقها من بنت انا بعرف شستفادت الحين ؟؟ لا زوج لا عيال لا اهل لا حياة وهالشي بيصير ببالها طول العمر شلون بترتاح ؟؟ والله اغار لكن بحدود و بلعنته يتزوج 10 انشالله ولا اسوي جذي يا نتفاهم واذا في فايده شي حلو واذا ماكو فايده يا اقعد عنده يا اطلق بس ما اسوي جذي الله يرحمهم يارب اللي مالهم ذنب والحمدلله ع سلامت اختج يالغاليه موضوع روعه . . . .
مهمااا كان.... ما اهدم حياتي عشان شخص مايستاهل.. هو رجع لزوجته .. وكل شي رد مثل ماكان وهي حبيسة السجن ويمكن اعدام... راحت وظيفتها ... راحت حريتها ... راحت حياتها.. شنو استفادت.؟؟؟؟؟؟ وشكرا عالموضوع
ترى حرام عليكم قاعدين وتشمتون والواحد يتعظ بس موجذي ولاتشمتون لان كل وحده لوكانت مكانها يمكن تسوي شغلات نفس المستوى بس بطريقه ثانيه ولاتدعون ترى يمكن البنت مظلومه احنا ماندري عن شي ولاتصير كل وحده فيلسوفه خلو القضاء ياخذ اجراءاته وعندكم بنات فلاتجيبون سيرة العالم جذي ادعوا لها بالهدايه وادعوا ربي يرحم الميتين وهذا يومهم مكتوب من قبل لاينولدون والحمدلله على سلامة اختج حبيبتي وعلى فكره انا البنت مااعرفها ومن جماعتنا ماتوا 4 بالعرس بس قدر الله وماشاء فعل انا اختكم وامون عليكم فلاتزعلون مني وجهة نظر وبس
انا ماالومها كل وحده تحب زوجها تبيه لها بروحها بس اني احمل الناس ذنب موذنبهم وتروح حياتهم هذا حرام ومادام هو عافني بستين داهيه بس هي الحين شنو استفادت انحرمت من اهلها واعيالها وحريتها
بالنسبة للي احرقت بصراحة باين انها مو هينة و الشي اللي سوته اكبر من انه يكون غيرة او لحظة غضب لا لا لا لأن خلوا كل وحدة فينا تسأل نفسها لو انقهرت و وصلت اكبر درجات القهر تقدر تتجرأ انها تحرق انا عن نفسي والله حتى لو ابي من الخوف ما اقدر و غير جذي منو من بناتنا عندها الجرأة انها تركب مع تاكسي بالليل و اهلها ما يدرون عنها من الرحاب للجهرا؟؟!! و بتفهموني ان طول هالطريق ما هدت و رجعت لوعيها؟ لا وبعد فوق هذا كله رايحه بنفسها تشتكي ان شلون اهل المعرس يتهمونها انها هي السبب؟؟ و بفهم شلون تقول انا بس اقصدي اخرب العرس مو قصدي اذبح احد و هي كاته البنزين من جميع جهات الخيمة؟؟؟!! انا ما احط لها عذر الا بحاله وحدة انها تكون مريضة نفسياً و طبيعي المريض نفسي ممكن يسوي اللي اكبر من جذي بعد بس ساعتها وين اهلها عنها؟؟ الله يغفر لها و يسكن المتوفيات الجنة و يشافي المصابات والله العظيم مو قصدي اتشفى فيها و لا شماته و لا تسلية بس كل اللي كتبته من القهر اللي فيني والله من سببها للحين ما رحت و لا عرس من بعد حريقها صارت فيني عقدة و اتخيل نفسي مكانهم اذا عشتوا الموقف تحسون برعب كبير:emoticon_U: اللهم ارزقنا حسن الخاتمة
الله يرحم الشهيدات ويصبر اهاليهم ويكون بعونهم الموضوع عن غيرة الزوجة وهل تصل إلى مستوى إجرامي وعدواني . . . لكن اشوف ان الموضوع اخذ منحنى آخر وتفاصيل آخرى عن المتهمة . . . موضوع الاخت عن الغيرة الزوجية . . . من وجهة نظري في أمور كثيرة تتحكم في حدة رد فعل الزوجة الغيورة على زوجها يعني المخلص اللي يقدر زوجته ومريحها ويراعيها بكل شيء وفجأة يبي يتزوج من غير اي سبب ولا مبرر ولا مقدمات اعتقد ان هالزوج بتكون ردة فعل زوجته انا قوية او تنهار نفسيا وتوصل لدرجة إيذاء زوجها لفظيا ويمكن تتطور الى جسديا وكل هالامور تحكمها علاقة الزوج بزوجته . . . أما زوج مايدرى عن زوجته ولا يراعيها في ابسط شي وهي الكلمة الطيبة فهذا متوقع منه كل شي يسويه وماعليه حسااافة أبداااا خواتي إذا الموضوع بيرد للمتهمة والقضية والدخول في تفاصيل احنا ما نعرفها ونفترضها بغلق الموضوع . . .
هذي مو غيرة هذي نجاسة قلب راحو ضحيتها امي وخواتي لو ان صج تغار على زوجها جان حرقته واحرقت اهله مو تذبح خلق الله اللي مالهم ذنب والحمدلله وقدر الله وما شاء فعل وسبحان الله انه الخبير بعباده
غيرة المرأة: غيرة رقيقة نابعة من حبها الشديد للرجل ، وخوفها من أن تخطفه إحداهنّ! "لما تعرفه من أساليب النساء" ، وربما بغيرتها هذه إن لم تحكمها جيدا أن تفسد كل الأمور بينها وبين زوجها ، وينقلب الأمر إلى شكّ وتدمير للعلاقة الزوجية التي ما إن دخل فيها فقدان الثقة ؛ استحالت الحياة بينهما ختاما .. الغيرة في حدود؛ أمر جميل ، لأنه يشعر كلا الطرفين بمدى حب الآخر له ، ولكن يجب عدم التمادي بها حتى لا تفسد كل شيء .
اهي صراحه حدها مسكينه كسرت خاطري ماانكر انها غلطانه بس سمعت ان اهل زوجها عذبوها واهي كانت تنطق منه وفوق هذا تعشقه بجنون الله يكون بعونها اول شي وين بتروح من عذاب الضمير وثاني شي اهي خسرت كلشي تملكه حتى حياتها
