السلام عليكم ورحمة الله وبركاته ........ انا اول مرة اشارك بهالقسم واتمنى الاقي فيه الي يساعدني في هالمشكلة الي امتعبتني بدش في الموضوع انا بنتي من اكملت سنة خليتها تنام بالدار الثانية مع الخدامه وبما اني ماعندي دوام حاليا وناطرة الوظيفة قمت اسهر مع ريلي لأن الصراحه ماودي يسهر بره البيت واهو دوامه لي 12 بليل وعقب مو متعود ينام فاضطر اقعد معاه لين انام بالبداية ماتأقلمت بس غصبت روحي كل هذا عشان مايسهر بره فلمه اقعد الظهر احس بتأنيب الضمير لمة اشوف بنتي مع الخدامة يضيق خلقي الصراحة بس المشكلة الكبيرة انها حيل متعلقة فيها وماتبيني حاولت اتقرب منها ماقدرت وفوق هذا صارت تقولها ماما لا وبعد اتعلمها السب وبنتي صارت تمشي وتطق اليهال عبالها لعب كلمتها وقتلها غلط اتعلمينها جذي بس أنا ودي تقولولي اشلون آخذ قلب بنتي واخليها اتحبني شسوي ؟ واشلون اجذبها؟ والله اني حاسه ان خدامتي اهي المدام مو انا وكلمتها ماشية اشلون اتعامل معاها؟ آسفه طولت عليكم ومشكورين مقدما
امبيه هذي مشكله كبيره يا ربي الله يكون بعونج الي عليج حبوبه انج تقعدين معاها لعبي معاها انتى وكليهاااا جذي يعني وانشاالله اكون فدتج
الله يعينك هذي مشكلة اهتمي ببنتك دلعيها اكليها غيري ملابسها روشيهااا خليها تنام عندك مو عند الشغالة وان شاء الله البنات يفيدونك
والله يااختي الخدامات مالهم امان واحرصي على بنتج هذي امانه برقبتج وعادي كلنا نسهر ويا ازواجنا وعيالنا عندنا ينامون والخدامه ماتجيهم الا للامانه بفترة الصبح بعد ماتنظف الشقه اخلي البيبي عندها بعد ماالبسه عشان انام نومه سنعه والله يهديهم ويصلحهم يارب ويخليهم لنا
حاولي تطلعين مع بنتج وايد واشتري لها هدايا العاب وبجذي راح تقرب لج لانها تدري انج تحبينا وتجيبين لهاهدايا خذيها للجمعية كل يوم خليها تشتري الي تبي وانتي وكليها وخلي الخدامة ما تقرب منها ابد عشان تتعود على فراقها لان بيجي يووم وبتفارقها تكفين نومي بنتج عندج نصيحة لاتندمين بعدين قولي لها قصص قبل النوم سولفي معاه ومع الايام تلقينها كلة لازقة فيج
شوفي حبيبتي مشكلتج تقدرين تحلينها اول غلط انتي سويتيه انج خليتيها تنام عند الخدامه ترى النووم وايد يؤثر بالمشاعر عشان جذي هي تعلقت فيها اكثر ماتقدرين بيوم وليله تغيرينها وتخلينها تحبج بس شوي شوي.طلعي انتي معاها بروحكم بدون خدامه واذا امكن بابا يروح معاكم سولفي معاها وايد (انتي لبسيها حق الطلعه كشخيها) اشتريلها شي هي تختاره وتحبه ضغطي على نفسج حاولي لنج اتسبحينها لعبي معاها بالماي جذبيها بسوالف الخدامه ماتسويها حقها وكليها بيدج اذا حسيتي ان في خطوة تطور اول خطوه سويها تنومينها عندج بس بسريرها لما تكمل سنه و4 شهور حطيها بدار بروحها مع سريرها ممو مع الخدامه وطلي عليها كل شوي وعلى موضوع ريلج تقدرين تنومينها قبل مايرجع البيت اتمنى اني افدتج
حبيبتي تو الناس علي نومت الياهل بعيد عنج من وجهه نظري او علي الاقل اذا بتخلين بنتج تنام بغرفة بروحها انا ما اايد تنام معاها الخدامه اذا امكن تقدرين اتخلينها تنام بغرفة قريبة علي غرفتج والباب مفتوح وتحطين الجهاز الانتركم عند راسج وراسها عشان تسمعين اي صوت منها وتروحين لها والخدم مالهم امان ما تدرين اذا نامت الخدامة وبجت بنتج او قعدت تقوم لها والا لا . وبعدين لازم اتعودين بنتج ان انتي اللي تنومينها مو الخدامة وانتي اتسوين لها كل شي والخدامة تكون مساعدة لج لا اكثر ودورها ما يكون اكثر من دورج بحياة بنتج .
هلا أختي . . . الأخوات ما قصروا . . . طلعي بنتج وياااج للملاهي للسوق للاماكن الترفيهية من غير الخدامة وسبحيها واكليها وبهالطرق بنتج ترجع لج بإذن الله . . .
نصيحه لوجه الله يا اختى حاولى الفتره الى تقعدين فيها على النت قعدي بنتج وحطيلها قصص بليوتيوب وشوفي الاشياء الى االياهالويحبونها مثل قصص ليلى والذيب وشوفيها شلون بتعلق فيج والله عن تجربه وقلديلها الاصوات ومثليلها وانتى تقرين لها القصه خليها تعيش الدور وصدقيني عاطفه الطفل متغيره مره تشوفينه يحبج ومره يكرهج مره يحب ابوه ومره يكرها شي طبيعي الله يوفقج بس امنتج تدعين لعيالى ان الله يشفيهم من المرض ويشيل عنهم ويجعلهم ذريه صالحه يارب وشكرا
الله يكون بعونج يا اختي المهم انا مريت بنفس اللي انتي مريتي فيه كانت بنتي عمرها 8 شهور وكانت عندها مربيه خاصه لها وكانت هم بعد ما تبيني وكله تبيها لمدة شهر انا عرفت شلون اخذ قلب بنتي خليتها تنام عندي كانت تنام عند الخدامه وظلت تنام عندي لمن صار عمرها سنه و8 شهور والحين توني اعودها تنام عندها مره ثانيه لاني على وشك ولاده بس عرفت ان الطفل ما يتعلق بأي شخص الا اذا كان هذا الشخص ينام معاه بنفس الوقت ونفس الفراش وانا قاعده احاول اخلي بنتي الحين تتعلق فيها مع انها اتحب الخدامه بس تبي تنام عندي انا اقولج خلي بنتج تنام عندج وراح تتعلق فيج لان الياهل يتعلق بريحة الشخص سواء ام او ابو او خادمه والله يكون بعونج بس لحقي عليها قبل لا تكبر وتتوهقين حزتها ودخليها حضانه يمكن صارت وحشيه لانها بروحها بدون اطفال حواليها
عفية عليج والله ما الومها بنتج تقول للخدامة ماما لأنج أنتي مو معاها اصلا اذا الخدامة تنام وياها وتوكلها وتلبسها عيل انتي مالج وجود بالمرة مو ناقص الا تنام مع زوجج الله يرحــــــــــــــــم امهاتنا اللي تنظف وتغسل وتوكل وتشوف زوجها اسمحلي بس صراحة الشغلة تحر الواحد لازم تأقلمين نفسج مع بنتج انتي الحين ما عندج الا هالبنوتة الله يخليها لج باجر اذا يبتي عيال شتسوين؟؟؟
لولو الندي حبيبتي مالا داعي هالكلام ينام معاها ومادري شنو عيب عليج ومن قال اني مااقعد معاها واسبحها وابدل لها والعب معاها انتي الظاهر ماقريتي الموضوع عدل انا مشكلتي مع الخدامه انها متسلطة وتعلمها اشياء غلط والي زاد الطين بله نومتها عندها واذا على النومة ماقدر اخليها تنام عندي اسمالله عليها لمه تقعد من النوم ماتبجي ولاشي تقوم بهدوء وتوقف وتطل من افراشها بدون مانحس فيها وانا اخاف عليها اتفتح عيونها على اشياء ولاني اول وحدة ولا اخر وحدة تطلع بنتها من غرفة النوم ووانا طلبت من البنات يساعدوني اشلون اتصرف مع المدام خدامتي واتقرب اكثر من بنتي والله يسامحج عل هالرد المتسرع
فعلا البنات ما قصرو لكن فية شي مهم الوقت اللي انتي موجودة فية مع بنتك سويلها كل شي لاعبيها خليها تشوف التلفيزيون بحضنك اكليها بين فترة وفترة ضميها هذا اقرب رابط بين الام وضناها وقت نومك خليها مع الخدامة حتى ترتاحين وصي الخدامة ماتسوي شغل للبيت وبنتك عندها خليها تقابلها وتحرسها والحافظ الله
