بروح دبي شهر 3 اول مرة ممكن تساعدوني

السلام عليكم ورحمه الله وبركاته

ابي ارووح دبي اول مرة وابي اعرف

1. افضل فندق بس ما يكون في خرابيط يعني عائلي

2. افضل شقق فندقيه ويكون عائلي

3. اماكن سياحيه يعني ترفيه ( مدينه العاب ) مابي سوق وهدووم توني راده من لندن و تارسه الكبت

4. رحلات تراويج دبي ومعالمها السياحيه

5. مكان عالم الثلج والقريه العالميه

6. مطاعم حلوة مو متوفره عندنا بالكويت

7. شلون جوها وشنو البس شتوي والا صيفي

وبعد شنو شنو ماادري ساعدوني بلييز

وربي يوفقكم ان شاء الله​

دبي بلد حلو بكل المقاييس بس غالي شوي :wink_smile:

فيها معالم وايد حلوة والنظام فظيع عندهم بالنسبة للمطاعم فيها مطاعم وايد مثل الكويت بس جربت مطعم ايراني عندهم حلو اسمه صدف وبالنسبة للشقق الفندقية راح تلقين وايد شقق رافية وحلوة وعائلية وبالنسبة للنظافة اضمن لج هالشي في منطقة البرشاء وعندج بعد مجمع الستي سنتر عجيب فيه فندق ومطاعم ومحلات لالعاب والملابس يعني يرضى جميع الاذواق اما بالنسبة للفنادق الخيال فهو فندق اتلانتس فيه اكواريوم وهم فيه محلات للترفيه .


وان شاء الله اكون فدتتج من ناحية المعلومات المتواضعة اللي عندي :teeth_smile:

مشكوووورة حبيبتي ماقصرتي

لبسي صيفي ..
لأن حتى فبراير عندهم حاااار ..

1- منتجع اتلانتس : فيه اكواريوم ينعد من اكبر 10 في العالم .. وحدددددده عجيب ..
2- الجميره بيتش : .. عجييييييييييب .. فيه حاطين حق كل دوله قسم .. و يبيعون العاب حلوه هناك و حاطين رسامين يرسمونج .. و نقش الحنه عندهم خياال .. و فيه محلات ..
و فيه رحله بالقارب . . وتتعشين هناك ..
3- الامارت مول : مجمع حيييييييل عجيب و يبيلج فلوس حق الكعوبه اللي هناك حدها فظيعه انصحج فيهم .. و فيه ski dubai و حسبي حسابج هناك برد داخل السكي .. راح يعطونج بدله وتسوس و جواتي ودلاقات بس ويهج راح يجمد يعني خذيلج شال تتلثمين فيه خخخخخ و قبل لا تاخذين الملابس روحي حق المحل اللي يعطيج تسوس قولي ابي مصوره معااي .. تلحقج و تصورج وانتي ع التلفريك و انتي تتزحلقين لقطاتها حدها عجيبه .. و تصوركم صور جماعيه و مع التحف الثلجيه .. و فيه داخل كافيه يبيع مشروبات ساخنه .. طاولته من ثلج !!
4- دبي مول : مجمع حيل حلو وفي سكيتنج بنص المجمع مكشوف .. وفيه اكواريوم و محلات صرافه
5- سوق التنين : عجييييييييييييييييييب كأنج داشه الصين ديكوراته حدها عجيبه .. وفيه محل hello kity اذا بتشترين هدايا حق بناتج لا تشترين الا من هناك ..
6- المعرض الصيني : اذا تبين اشياء من الصين راح تلقينهم هناك .. ثريات و اكسسوارات حق البيت و شغلاااااااااااااات عجيييييييييييييبه .. بس لا تشترين منهم موبايلات لأنهم ما يشتغلون احيانا ..
7- السكن : عندج ستار بوتيك للشقق :: نظيف و عائلي .. ولا فيه خربطه .. وشققهم حدها عجيبه .. والسيتي سنتر قريب منه ..
8 - اخذيلج رحله بالقارب روحي حق منطقه اسمها الشندقه .. تعشي فيها أكل لبناني ع البحر و رخيص .. و القارب يردج مره ثانيه ..
9 - روحي حق سيتي سنتر .. فيه محل اكسسوارات حيل اينن .. و يبيع برواز الكتروني مرصع بالسوارفسكي ..
10 - لاااااااااااااااا تروحين مجمع حمر عين لأن جنه الحمرا مول لا يغرج طلعته بالتلفزيون ..
و أي استفسار دزيلي ع الخااص ..
واذا تذكرت شي بقولج ..

أأأأأأأه تعبت لوووول

مرحبا فيج اختي في دبي أنا من هل دبي الغاليه انصحج تسكنين في فندق انتر كونتيننتال في الفستيفال سيتي او كراون بلازا بيكون الفندق جريب عن المطار وفي وسط دبي وحذاله المركز تقدرين تتسوقين وتلعبين الصغاريه وتتمشين وفي المركز جميع انواع المطاعم والمقاهي وتقدرين توصلين الفندق مشي او تسكنين في فندق العنوان قريب من مول دبي اكبر مول في العالم ويوجد في منطقة برج دبي الكثير من الشقق الفندقيه واذا عندج صغاريه انصحج اتسيرين مول دبي وتدخلون كيدز زينيا مافي مثل هالمكان ألا في اليابانواي استفسار انا حاضره

​

ماشاءالله عز الكويت معلومات كافيه