السلام عليكم و رحمة الله وبركاته بنات ......... انا معرسه من 8 شهورر وبعد زواجي بـ3 شهور حملت .... ويوم كنت بخلص الشهر الثالث حبيت اسير عند الدكتور و اتاكد على جنيني واسالها عن حمض الفوليك ..... بعد ما يا دوري دخلت على الدكتوره والدكتوره تعرفني لاني اي ويا خواتي يوم كانوا حوامل بعد ما خذت على الالتراساوند تمت ربع ساعه اتلف وتلف وتشوف الياهل قلتها دكتوره قي شى قالت لا ما في شى . وطلبت الملف مالي شافت قياسات الياهل نفس قياس الشهر الي طاف قالت الياهل صغير ليش انا هني خفت وقلت فيه شى قالت انتي في الاسبوع 9 قلت كيف انتي قلتلي قبل اني في الاسبوع ال،11هذا الكلام قبل شهر . خذت عليه دقات قلبه قالت زين بس في شى ثاني وهي الكارثه ان الياهل تحت رقبته مااااي قلت وشو يعني الماي قالتلي انا مو متاكده يمكن الاتراساوند مالي مشفر عطتني ورقه وحولتني قسم الاشعة وهناك خذوا علي 4D بس إلي خذت علي وحده بروفيسور مصرية اول ما خلصت 4D قالتلي نزلي الياهل مو زين يكبر بطنج قالتلها ليش قالت فيه ماي تحت رقبته والماي حجم كبير والياهل دقات قلبه تخف وبيموت هني الطامة الكبرى طلعت وانا اصيح وما شفت جدامي شى وانا بروحي تميت اصيح من خاطري لان موتي وحياتي يهال قلت يمكن جذابه . اتصلت في ربيعتي وقالتلها السالفه وعطول مرت علي وخذتني البيت وقالتلي كلام الاطباء وايد ومرات يغلطون بعد ما ريحت خذتني مستشفى حكومي وعطوني موعد بعد يومين وبعد يومين الدكتوره خذت علي الالتراساوند وقالت الجنين ميت في بطنج ولازم اتنزلينه واتصلي في ريلج وهني فاجأت ريلي وقع على ان الياهل ينزل وعطوني 15 ابره طلق خلال 3 ايام شفت فيهااا الموت والله لا يراويكم الويع الي كنت اعاني بعد3 ايام نزل متقطع وانا اصيح ... بنات تقدرون تخبروني حد استوى فيه نفس الي استوى فيني .... هل الحمل الثاني اقدر احمل بجنين سليم .... وهل احتاج علاج غير حمض الفوليك .....:emoticon_U:
الله يعوضج خير ان شا الله رفيجتي مات جنينها بطنها وهي بالشهر الرابع وبعد 4شهور حملت وجابت ولد وهوباحسن حال انشا الله الله يرزقج بالطفل السليم المتعافي
يا عمري عسا ربي يعوضج ويعوضني ويعوض كل وحده مرت بحالتنا ويرزق كل محرومة ... انا تقريبا صارلي نفسج والحمدالله... انا بعد زواجي بعشر شهور حملت وتم الحمل سبع اسابيع طبعا انا رحت للدكتورة لما دريت اني حامل وجيكت علي وقالت كل شي تمام واصرفتلي فوليك اسيد وقالتلي وتعالي بعد اسبوعين انا ما كنت ادري ان بعد اسبوعين يبدا الجنين ينبض قلت لما ادش الثالث اروح ... وكان حملي بس تعب بجسمي وما كنت اواحم على اي شي.. ولان اهل زوجي افرحولنا من كثر الفرحة استغفرالله قاموا يبشرون العالم اللي يقول انا صارلي سنين ما حملت( الله يسامحهم ... ما يدرون ان هالشي بهالزمن ما ينقال من كثر الحسد)...المهم>>>لما دشيت الشهر الثالث في بدايتة رحت للدكتورة واكشفت علي وكانت اتسمي ووجهها ما كان يبشر بالخير جان اسالها شنو في دكتورة ؟قالت انا شاكة بشي بس ممكن اسوي سونار داخلي جان اقولها سوي اللي بتسوينه لان وجهها ما يبشر وسوتلي جان تقولي ما في نبض قلت يعني شنو قالت الجنين عمره سبع اسابيع وصارله اسبوعين واقف نبضةوانتي الحين بالاسبوع التاسع طبعا قالت لي سوي تنظيفات انا خفت من هالكلمة وطبعا بعد هالدكتورة رحت لثلاث دكتورات وكلهم ذات مستوى ونفس الكلام عاد انا اخر دكتورة رحت لها قالتلي ما يحتاج تسوين تنظيفات لان الجنين صغير وراح يطرده الرحم لانة شي مضر ... الهم يا طويلات العمر الكلام هذا كان اول شهر 11 وعطتني ابر لمدة اسبوع على انه ينزل وعطتني فيتامينات واصرفتلي حبوب تساعد على الاجهاض وتخيلوا بنات والله خلصت الابر والحبوب وهو ليلحين ما نزل جان اروح لها وقالتلي اذا كيس الحمل مشرشر يعني بداية خير ان ينزل وللاسف ما كان فية ولا تغيير وكذاللك كنت اخذ عشبة اذا تعرفونها وللاسف ما نفع... جان تقولي راح اعطيج موعد اللي هو صادف بعد عيد الاضحى بيومين اذا ما نزل دشي سوي تنظيفات جان اقولها خلاص ابي اسوي تحليل دم ابي اتطمن يمكن سببلي تسمم لاني كنت اوسوس لانة طول في بطني مو راضي ينزل والحمداللة طلع تحليل الدم زين... عاد سبحان الله كنت خايفة اني ما اصوم يوم عرفة وما اعيد ... وسبحان الله صمت وعيدت ... وليلتة السبت قبل العيد بيوم جاني مغص قعدني من نومي الساعه 3 الفجر عاد قبل ما انام دعيت بالمطر اللي نزل علينا ان الليلة ينزل وكنت شاربة قلاص عشبة وسبحان الله ربي استجاب للدعوتي لاني كنت حدي خايفة من التنظيفات... ونزل والحمدالله وبعدها رحت للدكتورة اجيك على رحمي ولك الحمد قالتلي نظيف رحمج ومهيء للحمل وبعدها نزلت الدوره شهر 12 وشهر 1 بشكل منتظم والحين انطر الدورة صارلي ست ايام ما نزلت وللاسف سويت تحليل دم وتحليل منزلي والنتيجة سالبة ما في حمل ولا نزلت معاي ولا افرازات ولا حتى علامات الدورة ... والله يعوضنا يا رب وشي ثاني حبيت افيدج عن الفوليك هذا الفيتامين اي وحدة ناوية تحمل لازم تاخذة من الحين وتكون فائدتة قبل ما يتم الحمل وتستمرين فية لين تدرين انج حامل اول شي قبل الحمل هالفيتامين يقوي الرحم وبعد الحمل يساعد هالفيتامين على تقوية الجهاز العصبي للجنين ويمنع تشوهات الجنين.. وشغلة ثانية حبيت افيدج فيها اول ما الله يرزقج بالحمل بسرعه تروحين للدكتورة وتقوليلها انا صار معاي اجهاض وابيج تصرفيلي مثبت لا تنسين هالشي... وسامحوني على الاطوالة... >>>>قلبي يتقطع وانا اكتب اللي صارلي والله شاهد ما نسيت ولا لحظه مريت فيها وانا حامل... الحمدالله.. الحمداللة.. الحمداللة
عسى الله يعوضكم انشا الله باللي احسن منه يموت وهو في بطنج ولا يموت بعد ما يطلع وتتعلقين فيه مثلي والحمد الله على كل حال.......
قطعتى قلبي والله نفس اللى صار معاى بالحرف الواحد بس انا كان عمر الجنين 5 شهور ...واي شفت الموت بالطلق الصناعى ...تعذبت نفسيا..بس الدكاترة قالو يموت الحين ولا تجيبينه معوق طول حياتة,,,واي حبيبى اللة يرحمهم انشالله يشفعون لنا بالاخرة انشاللة..انا الحمدالله عندى ولد عمرة سنتين الله يخلية لي وحملت بعدة ومات ..وكانى ميتة عالحمل الله يرزقنا وكل محروم
الله يعوضج أنا الحمدلله على كل حال سقطت بجري بالشهر الثامن تخيلي نفسج تكلمين اللي بطنج وتجهزين له واخر شي يموت إن شاء الله يكونون شفيعين لنا يوم القيامه
يا قلبي انتي عسى ربي يرزقج بالضا اللي يملي عليج حياتج وحطي فبالج ان كل شي خيره يمكن لو عاش هالبيبي ما تدرين شنو كان راح يصير الله العالم وحمض الفوليك اذا انتي ودج اتحملين عادي انج تاخذينه قبل الحمال لان يقوي الجنين اذا حملتي انا اعرف وحده اتعالج تبي تحمل الدكتوره واصفه لها الفوليك اكسيد وربي يرزقج بالذريه
الله يعوضج خير بإذت الله ولا تحاتين مرة أخوي صارلها نفسج بأول حمال والحين ماشاءالله عندها 4عسى الله يحفظهم
