السلام عليكم يا حبيباتي .. بنات بقولكم قصتي باختصار .. آنا مطلقه .. صارلي تقريبا سنه .. مابي اذكر الماضي .. و لا عشت الحاضر بس افكر بالمستقبل .. كرهت احضر المناسبات عشان نظرة الناس لي و الله كلها كلام و كأني كاسره خاطرهم لا تقولون لأنج بهالفتره حساسه .. لا و الله أحس نفسي مكسوره ... ماعندي الشجاعه .. أحس إن فيني شي ناقص .. و الله قبل أمس حضرت عرس لأول مره من طلاقي .. أبيييييه .. قلبي عورني .. و الله قعدت أشوف المعاريس وادعيلهم من كل قلبي و أقول بخاطري معقوله راح يجي يوم و امشي نفس هالعروس ؟؟ معقوله راح ألبس ثوب عروس ؟؟ معقوله راح أمشي مع ريال إيده بإيدي نفسهم ؟؟ معقوله راح يجي يوم امشي فيه و عيون العالم كلها علي ؟؟ معقوله راح أعيش هالحلم فيوم من الأيام ..؟؟؟ بنات آنا انجرحت بطلاقي جرح الله العالم فيه .. و أحمد الله اني طلعت من هالزواج بدون يهال .. بس اخذ من عمري 3 سنين و اخذ رونق حياتي .. تغيرت شخصيتي 360 درجه .. قبل الكل ينطر بس قعدتي و اتصالي .. ألحين تغيرت .. نفسي اتعبت صرت هاديه كتومه و الحلج ما ينفتح الا للضروره القصوى ,, صرت اكره التجمعات .. منعزله بداري .. ما احب اسولف وايد .. تغيرت تغيرت تغيرت .. مشتاقه لنفسي و الله ما اكذب مشتاقه للبنت المشاغبه الدلوعه اللي تتحرش بالكل ,. مشتاقه للبنت المراهقه اللي ضحكتها تفرح البيت .. بنات و الله مو قادره ارد نفس ما كنت .. حاولت بس مو قادره ..ادري الحياه ماوقفت على ريال بس مو قادره .. لدرجه حلمت بأمي المتوفيه تقول لاختي عني بس حرام عليها لا تسوي بنفسها جذي تراها اذبحتني .. و الله احس نفسي ضايعه ضايعه ضايعه ,, الحمد لله بخير و نعمه و بصحتي و عافيتي و معززه مكرمه فبيت ابوي .. بس النفس تعبانه .. بنات ادعولي .. و الله قاعده أفكر شنو أبي بالضبط يعني لو ياني نصيبي و تزوجت معقوله راح تتغير حالتي ..؟؟ معقوله؟؟ صار و تقدم لي واحد و الله على كثر ما كنت متلهفه قبلها اني اتزوج على كثر ما فقدت كل الاهتمام لما شفت اهله جدام عيني .. و خفت .. و الله خفت لأني وصل فيني الأمر إنه يتقدم لي ناس و آنا مو هامني .. أخاف أعيش طول عمري على هالحال مو بس فتره و تعدي .. بنات و إللي يرحم والديكم ادعولي بصدق الهدايه و التوفيق و الزوج الصالح
هلا حبيبتي هونيها وتهون الدنيا والي فيها مايستاهلون نزعل عليها صدقيني عن تجربه ونص حريم الكويت مطلقات بس انتي قوي نفسج بعد صلاة الفجر قعدي استغفري الف مره وبعد صلاة المغرب وادعي انه الله يفرج همج ويبعد عنج هالوسواس وتوكل على الله وعيشي حياتج اليوم الي يروح مايرجع صدقيني والناس عمرهم ماراح يسكتون والي بيشوف الناس بيتعب ماوراهم غير التعب انتي ارضي ربج وصدقيني بترتاحين حيل والله يوفقج
ياعمري انتي ليش تسوين بنفسج جذي والله مافي شي يسوى صدقيني مافي احد مرتااح الا اللي لاجئين الا الله عز وجل صدقيني في ناس تشوفينهم تحسينهم مستانسين بس ماتدرين شنو اللي في قلووبهم ريحي نفسج وهدي وكثري من الصلااه والاستغفااار بالثلث الاخير من الليل وهالفتره خليها خالصه لله شوفي شلون رااح تتبدل حيااتج من احسن لي احسن والله اذا حب عبد ابتلااه عشاان يلجأ له وكثري من قرأه القرأن وان شاء الله بتتبدل احواالج والله يفرج همج وترجعين مثل اول واحسن بعد من اول والله يرزقج بالزوووج الصاااااااالح اللي يصوونج ويعفج ويستر عليج ويحبج ويسخره ربي لج ..
بندعي لج ان شاءالله بس ترى روحج ونفسج وصحتج لج عليها حق تأثرت صراحة وانا اقراء كلامج انتي عليج بالاستغفار واحنا علبنا بالدعاء
ياحياتي منتي اول ولا اخر وحده تنفصل عن ريلها بالعكس الحياة جدامج لازم تعيشين يومج وتنسين الماضي لانج لو عشتي فيه بتضيعين وتتعبين اكثر ... كل شخص بعد اي تجربه يتغير وتتغير شخصيتيه بس انتي حاولي تتغيرين للاحسن مو للاسوأ عشان نفسج وعشان امج الله يرحمها ترتاح بقبرها مطمنه عليج ... اقري قران كل ما حسيتي بضيقه انشالله امورج تتعدل بيدج هالشي .. الله يوفقج انشالله ويرزقج ولد الحلال اللي يعوضج
حبيبتي امر طبيعي انج بتتعبين بالبداايه بس لي متى على ناااس ماتستاهل فكري بمستقبلج وانسي الماضي والله انا حاسه فيج لاني ماره بهالتجربه من سنتين بس اول اشهر تعبت بس كنت ابين حق اهلي انه الوضع عندي عادي واحرق نفسي من داخل بعدين فكرت قلت توني صغيره بعز شبابي ليش اكبر نفسي واحزن على شي راح ومايسوى واهوو خيره لي والحياة جدامي ,, واامني بالله وعليج بقراءة القران والاستغفار ,, والله يكتبلج يارب الي فيه الخير
حبيبتي .. الغاليه لاتضايقين نفسسج واستغلي وقتج بالزوارات وبالطلعات لاتقعدين تفكرين جذي .. والله يرزقج بالزوج الصالح يارب
هلااااا اختي انتي قاعده تعذبين نفسج وهذا الشي غلط ولا يرضي رب العالمين هونيييها وتهون ومثل ما قالو نص بنات الديره مطلقاات ولا في شي يستااهل انج تعذبين نفسج وان شاء الله ربي يرزقج الزوج الصااالح اللي يخافه ويخشااه ويسعدج ويوفقج ويهديييج ~ اللهم آمين ~
عزيزي السلام عليكم اولا الناس تحب تتكلم على كل شي وخلي صلتك بربك اكبر همك لان هذا قدر والله يصلح الحال يارب
