السلام عليكم ورحمةالله وبركاته اتمنى من الاخوات انكم تساعدوني بأرائكم عندي مشكله مع زوجي اذافيه احد بيساعدني ويوجهني ابي اطرح مشكلتي متعشمه خير في هالمنتدى انا متزوجه والزوجه الثانيه وعندي طفل والمشاكل حاصله معي من بدايه الزواج .... زوجي مانعني من الطلعات حتى الزيارات مانعني منها يقول اخاف عليك من الحريم وكلامهن وانا مو مقتنعه بكلامه وقدر الله وحملت بطفلي وهو سعيد بالحمل لان زوجته الاولى مريضه وهو يريد اولاد وبعد ا الولاده زادت المشاكل لدرجه الضرب المبرح وطفلي ياخذه مني وهو عمره شهرين لزوجته الاولى ويذهب به لاقربائه دون علمي بالساعات وذا سالته فين طفلي يقولي تراه ولدي وانتي ماعليك الا ترضعينه الرضعه وتنظيفه لدرجه ملابسه واغراض الطفل هم اللي يجيبوها انا ماسكتله تكلمت معه ومانفع الكلام معه وكلمت اهلي وجاء اخوي الكبير يتفاهم معه ورفض يدخله او يسمع منه وراح اخوي لوالده وتفاهم معه وقال مالك الا طيبه الخاطر وبالفعل جاء والده لزوجي وتفاهم معه وبعد فتره رجع مثل اول واخذ الجوال مني ويقفل الباب علشان مااطلع وجلست على الحاله 4شهور ودخل رمضان وزاد الضرب علي لدرجه يضربني وانا صايمه ماتحملت وتعبت ودخلت المستشفى واخذت جوال احدى المريضات جزاها الله خير وكلمت والدي وع طول جاء والدي ورفض اني اروح معه وراح والدي وقدم بلاغ في الشرطه واخذ تقرير من المستشفى باني تعرضت للضرب وبالفعل طلعت مع والدي لكنه اخذ طفلي ورفض تسليمه لي الا مقابل التنازل وتنازلت بالفعل مقابل طفلي وبعد شهر قدم شكوى للمحكمه بارجاعي رفضت الرجوع وطلبت الطلاق وبعد فتره طلق ولكنه استرجعني علما انه لا ينفق ع ابني وانا الى الان مارجعت ... اريد رايكم في مشكلتي اقدم قضيه خلع او لا جزاكم الله خيرا
والله ماادري شنوو اقوول لج .. بس الرجل اذا وصل للضرب احس انهاا كبيره في حقج والضرب ممكن يسبب عااهه والا اعاااقه اذا مايصرف عليج ويضربج ومايقدرج الطلااق وهو ابغض الحلال عند الله ولكنه حل .. اما اذا تعدل ورااح يقووم بحقوقج على اكمل وجه ربي يهديه لج ارجعي له .. الله يكوون في عوووونج ويكتب لج اللي فيه الخير .. واللي اهم من رااايي ورااي البنات هو اللجووء الى الله بصلااة الاستخاار وماخاب من استخاار ..
لا حول ولا قوة الا بالله العلى العظيم الله يعينج على مابلاج حبيبتى المفروض من اول مره تمادي فيها ماتسكتين وشنو هالعيشه اللى مانعج من كل شي اكيد في سبب او انه سوري حبيبتى معقد !!ّ وانتى بعد دخلتى اهلج جم مره مافاد فيه هذا ماتوقع فيه حل معاه الله يهديه ويسخره لج ويصلح مابينكم ويحنن قلبه عليج اللهم امين
صباح الخير حبيبتي الله يعينج لكن الطلاق بحالتج صراحه حلال واحسن لج مايرضى تطلعين وضرب واهانه وحبس لا حبيبتي قعدتج عند اهلج معززه مكرمه افضل لج اي نصيحتي لج قدمي خلع بعدين حطي الاسباب المحظر الي ابوج سواه بالشرطه ينفع قضيتج وبعدين الولد صغير من حقج الحضانه وبعدين لما عمر 16 سنه يخير الطفل بين امه وابوه ساعته يصير خير حبيبتي هذا رايي وانتي ادرى بظروفج فكري هل الطلاق من صالحج مستقبلا يعني بترتاحين او لا شوفي الموضوع من كل النواحي مومن ناحيه وحده اوكي وربي يوفقج وطمنينا عليج
حالة غريبة والله شلون ياخذ الولد منج لمرته الاولية وبالساعات >> وين قاعدين انا اقول انتي روحي لمحامي شاطر وخل يلقالج حل اما بالخلع او طلب الطلاق بس شوفي موضوع حضانة الطفل بالحالتين
حرااام يتربى الطفل بجو مشحون وضرب واسائه للام حبيبتي روحي لمحامي وجيبي شهود من اهلج انه ما انفق عليج وطلعي تقارير تقيد انج تعرضتي للضرب المبرح منه وقدميهم للقاضي جذي لو يبةس ايده ماراح ترجعين له
