نقاش جاد جدا أرجو من العضوات التكرم وإبداء الرائ بكل صراحه

ما كتبت هذا الموضوع إلا من بعد ما حامت كبدي من اللي أشوفه قدامي ... ليه المجتمع الحين صاير سطحي بكل ما تعنيه الكلمه ؟؟ أنا أعمم هالكلام على الحريم والرجال بعد بس بعلمكم أو أقصد بذكركم (لأني متأكده انه الكل ملاحظ هالشيء) باللي يصير بمجتمع الحريم بما إني عايشة بمجتمع ستاتي ... لا يقعد ينط على واحد ويقول يا مصلكم يالحريم .. تراكم انتم لاحقينا بعد




ليه الناس صاروا يتكلفون بكل شي .. عزايم .. زيارات .. زواجات .. كل شي بمعنى كل شي؟؟ لو الوحده بيجيها أي أحد يزورها أول شي تفكر فيه وش بنحط ووش بنجيب ... لازم الحلى من المكان الفلاني ... والفطاير من المحل العلاني ... والسكر شكله كذا .. والصينية مدري وشي قايله كل ماهب و دب محطوط فيها ما بقي الا ينثرون على الأكل قليتر من الزبرقه الزايده .. ذاك اليوم أقول لأختي بجيب فطاير من المحل ( ....... ) اللي جمبنا قالت لا وع قروي ... من متى صار الأكل فيه قروي و مب قروي .. سلاماااااااات !! يازين أيام أمي كانت الدنيا بساطة كلن يزور الثاني والعشاء نواشف وان تحمسوا جابوا فول وتميس ... السالفة مب سالفة فقير وغني السالفة سالفة بساطة وتكلف ... وكلش كوم وإذا قال لك أحد والله الناس تقاطعوا هالأيام !!! كل هذا وما تبون يتقاطعون !؟





ليه إذا ولدت الوحده صاروا الناس يتنافسون من يجيب الأغلى مب الأحلى ... تلقون إذا الوحده يجيها مدري كم طعش سله من باتشي واللي مثله وسعر السله الوحده ما يقل عن 500 طيب سله سلتين بتفتحهم والباقي حراام وش تسوي فيه ؟؟ .. ليه ما نسوي بيبي شور زي الأجانب وكل وحده تكتب قائمة بالحاجات اللي تحتاجها وتسوي زي الحفله البسيطه يجون فيها الناس منها انها ماراح يجيها هدايا إلا الحاجات اللي تحتاجها ومنها انه تجمع الناس مره وحده وما تقعد استقبل وودع طول فترة النفاس .. أكيد الناس بيستصعبونها بالبداية بس بعدين عادي بيتعودون عليها زي الحاجات الكثيرة اللي استنكرناها بالبداية بعدين صارت عادي


ليه البنات صايرين ماصلين وسوالفهم مره ماصله ؟؟ أكبر همهم فلانه وش لبست .. والمحل الفلاني وش نزل .. يااي مره حلو التان عليك ... كلنا بنات ونحب هالسواليف بس مب عاد تصير اكبر همنا !! من متى الوحده حتى لو لابسه شي يحوم الكبد بس عليه اللوقو حق الماركه يصير كشخه كننا مشفح

ولو وحده لابسه مرتب وألوانه حلوه بس مب ماركه تطلع قرقر .. ما أتذكر قبل 10 سنين كنا نفكر كذا أبدا .. وأكبر دليل على هالشي ان السعودية إذا جت تشتري شي ماركه معينه أهم شي عندها ان اسم الماركه مبين و وش كبره يعني مو شاريته علشانه حلو بس علشانه الماركه الفلانيه ... حتى الصغار صاروا لازم يلبسون ماركات لو سمحتوا والمشكله الأعظم انه تلقين البزر توه ما فقش من البيضه ويقول ترى البولو حقي من رالف لورين!؟




ليه البنات بايعين صورهم بتراب .. مسنجر .. فيس بوك ... تاقد .. وغيره وغيره .. يعني خلاص إذا حطيتي صورتك صرتي مودرن وكول ؟ وإلا كلش كوم وإذا جت وصورت يدها ولا رجلها ولو سمحتوا لازم تكون ماسكه بيدها شنطه ماركه .. هو الأساس بالصوره إنك تورينا يدك ولا الشنطه؟ ما أدري نضحك على تطليع اليد ولا الشنطه !؟





ليه البنات بالمنتديات سبحان الله أكثرهم مصيفين بباريس وعندهم كلب ( لو سمحتوا ترى البسه موضه قديمه) وسياراتهم مرسيدس وينادون أبوهم وأمهم بابي ومامي ؟؟ ترى مره صدقناكم !!


ليه الحريم صاروا يحطون ميك أب بالعزاء وشو ذا استغفر الله ... حطي بشفايفك مرطب ورتبي نفسك شوي ما أقول لا بس تجين بروج فوشي ولا مناكير أحمر ... استحوووو خييييييييير


ليه الوحده تقعد الليل كله لميييييين تطلع الشمس عالنت وتستخسر انها تصلي 10 دقايق قبل الفجر تدعي ربها فيها ؟؟


ليه الوحده صارت كل ما كبرت تكشيرتها وناظرت الناس بطرف خشمها صارت رزه و واو .. والوحده اللي تسلم على اللي ما تعرف ولا عالأقل تبتسم قدامه مخفه ولا معجبه باللي قدامها ... الرسول نفسه اللهم صلي وسلم عليه قال وتبسمك في وجه أخيك صدقه .... بس فيه أحد يسمع ؟؟





ليه الوحده إذا انعزمت على زواج صديقة صديقة صديقتها تدفع 500 1000 ريال أو أكثر بعد على تسريحه بتقعد ثلاث ساعات هذا إن طولت بالزواج وتستخسر تدفع 100 ولا 200 ريال على صدقة ؟؟ الناس قاعدين يموتون جوع وحنا قاعدين نضيع فلوسنا على حاجات سخيفة




ليه بالزواجات كل وحده تناظر الثانية من بعديد وتقول ماني قايمه أسلم ليه ما هي تجي تسلم علي ؟؟





المشكله لو تسألون أي أحد عن للي صاير بيقول انه مو عاجبه الوضع بس كلن يجاري الثاني ويقول مابي الناس يصيرون احسن مني انا وش ناقصني بعد. لازم أحد يبدا ويسوي شي لأن الوضع صاير من سيء لأسوأ


متى بنغير اللي قاعد يصير إذا كان الكل ساكت ؟؟


--------------------------------------------------------------------------------
منقووووووووووووووول من ايميلى

اضافه رائعه



علماء النفس يقولون : كل ماقلت ثقتك بنفسك زاد تقديرك للاشياء الماديه.

كلام ١٠٠٪١٠٠

الحمدلله الذي عافانى الله لا بيلانى و يفك الناس من هالبلاوي

دنيا وصخه شنسوي بعد .... الله لايبلانا انشالله
ويعطيج الف عافيه

يسلمو على المرور

ميه ميه كلامج
مشكوره

فعلا كلام صاحبة الاميل صحيح 1000%

افضل شي يكون الانسان مثل ما اهو دون تكلف . . .

وهالشي يحتاج ثقة بالنفس علشان يقرر وينفذ . . .

مشكورة ام سلطان ما قصرتي ع النقل . . .

الحمدالله على نعمة العقل
هذا إسرااف
ومايدرون انه الله لايحب المسرفين
وشرط تلقينهم على قد حالهم بس لزوم الهياط جدام العالم
أكلف نفسي بشي معقووول موبالاسراااف

وفعلاا هالظاهره حييل منتشره هالاايام

الله يكافينا الشر

والحمدالله عالصحه والعافيه
تسلميين ياقلبي عالنقل

يعطيكم العافيه
أحترم رايكم

كلمج عدل مدري ليش المصاريف االي مالهاداعي

يعطيك العافيه

الله يعافيكم

قلتيها يالغلا وجاوبتي على تساؤلاتج في الحكمة اللي طرحتيها في نهاية موضوعج..
الناس صارت بالمظاهر تتعامل يعني مايقولون شنو اخلاقه يقولون كم في بوكه..
الله لا يبلانا يارب باللي بلا فيه الغير والله انه مرض ومرض نفسي خطير
ينتشر بين الناس بسرعة..
عافانا الله..

يعطيج الف عافية ياعمري عالموضوع الرائع

تسلمين ياقلبى على المرور

هذيله عقولهم مريضه اللي بسوون جذي والله مايقهرني الا شغله وحده المرا اذا ولدت وسوت استقبال واهيا بالمستشفى احجزت قاعه مع تقديم الحلو وغير الكفر مالها والله تقل عاليله 5000دينار بس علشان مرت فلان وولد فلان الحمدلله والشكر

الدنيا مو وصخه

ولا الدنيا تغيرت

الناس تغيرت والنفوس تغيرت

وراح وقت الجوهر وجا وقت المظهر ..

كلام سليم .. بس الحمدلله للحين في ناس
على البساطه وروحهم الحلوووه..
يسلمووو على الموضوع الحلوو..

ياختي نجاري هدنيا وش نسوي

ومشكووور

مايسوي جذية إلا حديثوا النعمة اللي ماعمرهم شافوا خير
باقة شكر لج وهذا أو ل رد لي بالمنتدى استفتحت بموضوعج لروعته

مشكورين على المرور وأحترم أرائكم

رفــــــــــــــــــــــــــــــع