السلام عليكم ورحمة الله وبركاته الحمدلله والصلاة والسلام على رسول الله وعلى آله وصحبه أجمعين الان الكل يستعد للمدرسه ، وموضوعي مو عن المشتريات المدرسيه .. عن امور ثانيه لازم ننبه الاطفال ونخليها شي اساسي عندهم .. الصلاة : قال صلى الله عليه وسلم : ( مروا أبناءكم بالصلاة لسبع سنين واضربوهم عليها لعشر سنين) يعني من اولى ابتدائي نأمرهم فقط ، نحببهم بصلاة ولكن مانشدد ولا نسأل صليت والا لا عشان مانخليه يكذب .. صدقيني اذا الام اهتمت تذكر ابنها خمس مرات يوميا للصلاة مع الايام يبدأ الطفل يشعر بأهمية الصلاة ولا تجي عشرسنوات او قبل الا يكون محافظ عليها . اذكار الصباح والمساء : احرصي انه يقولها ويهتم فيها خليه يبدأ يومه بصلاة الفجر ولا يقوم من مكانه لين يقول اذكار الصباح .بالبدايه خليه يحفظ (اعوذ بكلمات الله التامات من شر ماخلق ) وكل فتره اضيفي شي جديد .. اذا عند طفلك اي بود حملي الحصن المسلم وخليه بعد صلاة الفجر والعصر يقرأ منه ، بتلاحظين انه يحفظ الاذكار مع الوقت .. وبرضوا للفايده فيه برنامج للقرآن ( حفظ القران الكريم للكبار والصغار ) رائع حمليه و عن طريقه يقدر الطفل يحفظ القران لانه يكرر .. او حمليها بجهازك وخلي ولدك والا بنتك يستخدمونه .. بيني لهم اهمية الاذكار وانها تحفظه من كل شر .. فيه اجهزه ثانيه مثل اللاب توب المعلم وبابا سلام وغيرها لو وفرناها لاطفالنا بيحفظون الاذكار بسهوله ..وبيعتمدون على انفسهم بحفظ القرآن .. الفسحة : في نقطتين بوضحها .. الاولى : _ لازم يحرص الطفل انه مايرمي الاكل ابدا ، يحاول يكمل الفسحه اللي معاه ، و لو اشترى شي من المقصف ولا اعجبه لا يرميه ، يجيبه للبيت و يحطه مع الخبز اللي تجمعينه ..بالذات اللي سنه اولى لازم نفهمهم زين ، لانهم بيلاحظون بالمدرسه الاطفال يرمون ولا فيه اهتمام ابدا ..وبعدلازم يهتم انه لو شاف اكل مرمي على الارض يشيله ويحطه عى جنب .. ذكريه بالصومال وقولي له قصص وانه ممكن ربي يسلب مننا هذي النعمه ..لازم كل ام تهتم بالنقطه هذي والله شي يحزن اللي يصير بالمدارس ، ترى اي طفل يرمي بدون خوف من الله الغالب تكون الام ماتنصحه .. فيه للاسف اطفال يرمون الاكل بكل استهتار على الارض ، وفيه اللي يمشي و يدوس الاكل ..؟!وحتى المدرسه تتحمل المسؤليه ، و اذا الاداره ماتهتم اللي علينا ننصحهم ونذكرهم ،ونتمنى المدرسات يكون لهم دور بتوعية الطالبات .. النقطه الثانية : _ لابد الطفل بنفسه يعرف يفرق بين المفيد والمضر يعرف شنو اللي ممكن يشتريه يوميا ، والشي اللي له مضار ويحاول يخفف منه ويشتريه مره بالاسبوع .. الحلاوه اللي كلها الوان وصبغات نحذرهم منها ونقول لهم على مضارها ونجيب لهم خيارات بدالها مثل الشوكلاتات بأنواعها والبسكوت .. العصيرات اللي مامنها فايده يشترون بدالها حليب وفي بعدة نكهات .. وعشان مايكون فيه نوع من الحرمان نقول حدد يوم او يومين بالاسبوع واشتري شبس وعصير ، اهم شي مايكون يومي .. لا تقولون مستحيل الطفل يشوف قدامه اللي يحب ويتركه ، صدقيني اذا نصحناهم واهتمينا وشجعناهم بنشوف اطفال حريصين ويهتمون .. اهم شي وضحي انه المضار ماتجي على طول ، لا بعد مده يضعف الجسم وتضعف المناعه .. النظافة : نوفر لهم .. بكيت مناديل ويكون دائما بشنطهم ..اشتري كرتون يطول واوفر من انك تشتري بالحبه .. ومعقم او مناديل معطره ( انا افضل شركة ديتول )يستخدمونها وقت الحاجه و قبل الاكل وبعده .. نأكد عليهم مايرمون شي بالارض ومثل مايهتم بالبيت يهتم بالمدرسه .. الاحترام : نركز على احترام الكبير سواء مدرس او مدير او بواب او اللي ينظفون مافي فرق الاحترام للكل .. العطف والرحمة : هذي نقطه مهمه جدا جدا .. قال صلى الله عليه وسلم إن الرفق لا يكون في شيء إلا زانه ولا ينزع من شيء إلا شانه ) اضرب لكم امثله من اللي يصير بالمدرسه / اذا تكلم طالب وغلط ايش اللي يصير بالفصل ؟؟؟ غالبا يضحكون عليه ، الا الاطفال اللي تربوا على الرحمه ومراعاة مشاعر الغير .. في اطفال عندهم تأتأ بسيطه ، اذا ماواجه الطفل سخريه وضحك عليه ممكن تروح .. فـ لازم نحرص ونفهمهم ان اللي يضحك على الغير ممكن ربي يبتليه .. بعض الاطفال عنده اعاقه معينه ، نقول لهم المفروض ما طالع فيه و تحرجه ، ونقول تخيل نفسك مكانه ؟؟؟ بكذا نزرع الرحمه والاحساس عندهم . فيه طفل عنده تأتأ شديده تقريبا له 6 سنوات وهو كذا من بعد وفاة ابوه ، و المشكله كل مالها تزيد بالذات في المدرسه ، المهم واحد من اقاربي يدرس معه بنفس الفصل لاحظ هذا الشي وحزن عليه وكلم اصدقاءه هم بأولى متوسط وقال ليش انتم دائما تضحكون عليه ؟؟ قالوا هذا الولد **لان ومايعرف يتكلم وصار كذا عشان ابوه مات !!!!!! بالله اولاد بأولى متوسط منزوعه الرحمه منهم بهذي الطريقه ؟؟ المهم راح قريبي وكلم الاساتذه وشرح لهم الوضع ، وش تتوقعون صار ؟؟ الاساتذه صاروا يهتمون فيه ويشجعونه ويساعدونه بالدرجات .. وكلموا المشرف الطلابي واهتم فيه .. و تحسن وضعه ، و يقول صار يشارك ونفسيته تحسنت ولله الحمد .. تحسن وضع طالب نفسيا ودراسيا من الله ثم صديقه اللي بالفصل ، المفروض ياغاليات نهتم ونربي ابناءنا على الرحمه ولا نستهتر بهذي النقطه .. ياخذ معاه اول يوم حلو و يوزعها على استاذه واصدقائه بالفصل .. هذي الحركه لها تأثير على نفسية الطفل بالذات اللي مايحبون المدرسه ،، مجرد تقولين ايش رايك نشتري حلو وتوزعها اول يوم بتلاحظين انه يفرح وينتظر متى السبت البعض يجيب هدايا كيس لكل طفل فيه دفتر تلوين والوان وبلونه وحلاوه ، طبعا تكون عدد طلاب الفصل ويوزعها .. وكل سنة دراسية وكل الصغار بخير وصحة وعافية واحباب قلبي بخير
