اخواتى انا متزوجه صارلى سنتين ونص عندى طفل وزوجى ماشاء الله عليه مريحنى لأخر درجه وامه بعد حليوه بس عيبها انها حاره وتقط نغزات والباقى تحبنى وتودينى معاها مشاويرها ووووو الكلام انى ماتعودت على البيئه الى الان نفسيتى تعبانه ولا قلت لأحد انا كويتيه وخذيت واحد سعودى وعشت بالسعوديه بس انا تعبت والله مدرى شنو اسوى بأتنا عند اهلى حلوه واقط كلام على كيفى واروح واجى وجيران ووناسه لكن البيئه اللى انا فيها الحين ماعندهم اقارب والجيران مايجونهم ويزورونهم والله مدرى شنو اصلهم اللى جمبنا والكلمه اللى اقطها محاسبه عليها انا مدرى شنو اسوى قلت بتصبر يمكن مع الايام اتعايش مع الوضع واتكيف معه بس انا ماشوف الا العكس وامه الله يهداها كله تقط نغزات مثال ...ايه الله يخلى الشغاله هى اللى تسوى كل شى واحنا ضيوف جايين مع العلم ان ولا وحده تشتغل وانا بعد بس انا مرات من كيفى اسوى الغداء والعشاء بس للأسف ماينذكر قولولى شنو اسوىزوجى عسل معاى ومابى اهدم حياتى ونفس الوقت ابى اهدمها لانى ابى اعيش عند اهلى...
اذا زوجج زين معاج .. ليش تبين تهدمين حياتج عشان طلعه ووناسه وجيران وبيئه !! ياقلبي تصبري و راح تتعودين على هالشي .. وبعدين ليش ماتطلعين انتي وريلج تسكنون بشقه او اذا انتي الحين عندج شقه ببيت زوجج .. حاولي تخلين هالشقه اهي بيتج وتبتعدين عن نغزات خالتج ... وحاولي تطلعين مع زوجج وتسافرين و لو داخل السعوديه مافيها شي وياما وياما كويتيات خذو سعوديين و العكس .. و الموضوع بالبدايه يبي له صبر وتأكدي ان اي وحده تتزوج اكيد و طبيعي راح تحس ببيئه غير حتى لو ان بيت زوجها جيران بيت اهلها فهمتيني ؟؟؟ تصبري و حاولي تستمعتين بالحياه والله يوفقج مع زوجج يارب
اختي ماكو شي كامل .. ولا تتوقعين رب العالمين يعطي أحد كل شي ويحرم أحد الله يوزع الأرزاق جذي وله خكمه احنا ما نعرفها ساعات.. دام ان هذا كان اختيارج -وتأكدي بأن الخيرة فيما اختاره الله- لازم تكونين راضيه الحين كل الرضا وسعيده وهذي سنة الحياة .. كلنا عند أهلنا كنا شي والحين شي ثاني مختلف تماما.. أمور الحياة ومسئولياتها طبيعي تزيد والبيئه ببيت أهلج (بيت والدج يعني) أكيد غير عن بيت خالتج حتى الله يوفقج ويسعدج .. وياجرج على صبرج على خالتج ونغزاتها.. عادي ترى وايد خالات جذي و الكبار غالبا ما يكون بقلبهم شي
اهــــــــم شي انك قلتي انوو انتي وزجك مرتاحين ومبوسطين معى بعض اووووكي لايهمك احد لامه ولاغيرهااا عيشي حيااتك متهنيه لاتضرين احد ولا احد يضررك وصدقيني بتتعودين ع الوضع مع الوقت بس اصبري دام رجلك زين وتحملي عشان ولدكم وان شاء الله ربي يفرجهاا عليك في القريب العاااجل
اهم شي ريلج اذا مرتاحه معاه لاجل عين تكرم الف عين لايهمج النغزات عادي اغلبهم جذي بس لاتحطين بقلبج والاهم انج ما تتشكين حق ريلج دايما مدحيها جدامه وحتى لوكنتي مضايقه انشالله ربي يهديها لج ويسخرها لج
عادي حرمه كبيره اعتبريها امك اللي يعجبك في كلامها خذيه و اللي مايعجبك خليه اهم شي انها ماتدخل في حياتك مع زوجك والحمد لله انك ضيفه يعني شوي وتروحين والله يهديها لك
الحال من بعضه اصدقين انا نفسج كانج اتسولفين عني تدرين شنو سويت كسبت خالتي بصفى اقدم لها هدايا واسوى لها عشى واذا مرضت اخذتها للطبيب واذا الجو حلو مشيتها واذا طلع زوجى اقعد وياها وعطيها من الكلام الحلو مثل الله لا يحرمني منج والله عوضني بأم ثانيه وأكلت الجو حتى من الي حولها وهكذا لما خليتها تستحى من روحها وجذي تمشي السفينه والمكسب الاكبر كبر قدري عند زوجي وهذا الاهم والاهم الاستغفار سمعي كلامي وانا اختج موفقه
انا معاج شواقه انا سعوديه ماخذه كويتي ولي 14 سنه ولحد الان مو متاقلمه ابي اهلي بس كاتمه بصدري وعايشه حق اعيالي تحملي والله يكون معاج
مشكورين خواتى وماقصرتو الله لايحرم كل وحده من اللى تحبه شواقه خالتى طبعها كذا يوم معاج ويوم ضدك بس ماشاء الله عليج انا حاولت بس هى طبعها لاعصبت تذكر الماضى وتقول انتى سويتى كذا وكذا على العموم الله يسخرها لى حواجه الله يعينج 14 سنه وماتأقلمتى الله يوفقكم اجمعين صراحه ردودكم اثلجت صدرى
حبيبتي تعوذي من بليس وانتي ما رضيتي الا انتي تدرين انج راح تخلين اهلج وحمدي ربج زوجج زين معاج الله يسخره لج ان شاء الله وانتي بطريقتج تكسبين امه وحسسيها انج بنتها مو غريبه انتي حاطه في باالج ان شي غريب بس خلاص لازم تنبهين عقلج ان هذي حياتج وزوجج الللي تحبينه وولدج...
حبيبتي هذي قسمتك احمدي ربج عليها، اهم شيء لا تردين على خالتج ولما تقط النغزه لا تسوين نفسج منغثه خلج رلكس واسكتي لا تكلمين لو كلهم يسولفون واخذي عشر دقايق وسلمي وبعدين روحي لشقتج صدقيني راح تحس خالتج واذا قطت ثاني مره خالتج نغزه سوي هالحركه وانتي ساكته وعشر دقايق وروحي شقتج صدقيني ما راح تسويها مره ثانيه وراح تحسبلج حساب وبعد..... مو كل يوم وانتي نازله لها وبعد.....(حي الله من زار وخفف) حطي هالنصايح في بالج وادعيلي ياعمري لاني بحاجه دعاء عسى الله يوفقكم ويجمع شملكم
