ارجوكم محتاجة مساعدة بخصوص عملية تجميل للانف

بسم الله الرحمن الرحيم

ازيكم جميعا..انشاء الله تكونو بخير
انا اسمي علا وعندي مشكلة ياريت لو حد يقدر يساعدني فحلها..انا فلحقيقة مش متعودة اتكلم فلموضوع دا مع حد فمش عارفه ابتدي ازاي..
بصو بقي من الاخر انا عملت عملية تجميل للانف قبل كدا ودا لان انا كانت عندي عقدة نفسية منها ... ومش هاعرف اعبرلكم اد ايه الموضوع بيكون مؤلم ومش هايحس بيا الا حد عنده نفس المشكلة او مشكلة مشابهه.. انا بحس اني مختلفه عن معظم الناس ..كل مااشوف حد ماببصش الا علي انفه وطول الوقت الموضوع فبالي ونفسي احس اني مش مختلفه.. وواللهي ياجماعه حاولت كتير اوي اني انسي واتعايش مع الوضوع بس غصب عني برجع تاني ..دي حاجه لا ارادية وممكن اللي خلا الموضوع يكبر معايا اني وانا صغيرة سمعت اكتر من تعليق عليها ودا حطملي ثقتي بنفسي علي الرغم من اني قبل كدا كان عندي ثقه عالية بنفسي لكن بسبب التعليقات دي نفسيتي تعبت اوي ومابقاش عندي ثقة فنفسي واما حد بيجي يكلمني ببقي مش عارفه اتكلم ومش عايزاه يبصلي..انا بحمد ربنا علي كل النعم اللي مديهاني وهي كتير والحمد لله ..ومش معترضه علي اي حاجة ..انا بس كان نفسي احس اني طبيعيه ودا خلاني اتجرأ واكلم مامتي فلموضوع دا واقنعتها بصعوبه اني اعمل العملية وللاسف عملتها عند دكتور فمصر اسمه اسامة عنتر وبعد ماعملتها واتحملت الم العمليه لقيت ان مافيش اي تغير حصل والموضوع كله كان نصب وعرفت ساعتها ان دكاتره تجميل كتير نصابين وبيستغلو الالم النفسي للمرضي عشان يقنعوهم انهم قادرين يحسنو منهم ودا مابيحصلش ولازم الواحد يدور علي دكتور شاطر ومتخصص في الفرع اللي هو هايعمل فيه العمليه كمحاوله لتجنب فشل العمليه وكله باامر الله فلاول وفالاخر...المهم انا دورت علي النت ولقيت في دكتور شكله كويس وواضح من شهاداته انه متخصص في اصلاح الانف واسمه حسام فودة فرحتله وكان الكشف ب200 جنية وكان شخص مغرور وحاسس انه ممتاز وعايز فلعملية اربعين الف جنية...انا بعد مامشيت من عنده ماكنتش مستريحه له خالص دا غير انه غالي طبعا جدا يعني انا مستحرمة ادفع المبلغ دا فعمليه تجميل وفي ناس محتاجه ربع المبلغ دا عشان تعمل عمليات مهمه ومش لاقياه..وكمان هو دكتور مش مريح وخبرته يعني مش عالمية ..يعني انا لو رحت امريكا هاعمل العمليه ارخص من كدا ..انا حاليا مش عارفه هل هو اصلا دكتور كويس ولا لا..وسمعت عن دكتور طارق اسماعيل وفتحي خضير بس مش عارفه هما كويسين ولا لا هما اه دكاتره فنانين بس الفنانين دول بيبقو عايزين يشدو وشهم او بتبقي انوفهم عادية وبردو بيعملولها تجميل لكن انا محتاجه دكتور شاطر لان انفي عريض وهايكون فيه ت***ر عظام ومش اي دكتور هايعرف يعملها بكفاءة.....فياريت لو سمحتم لو اي حد يعرف حاجه عن ال3 دكاترة دول سمع عنهم حاجه او ليه تجربه معاهم او حتي يعرف دكتور تاني شاطر يقولي رايه ويساعدني

انا عارفه ان انا طولت عليكم سامحوني..بس واللهي انا استريحت لما قلت لكم اللي جوايا وعبرت عن مشاعري وحسيت ان في حد ممكن يحس بيا ويساعدني لان انا مش بتكلم مع اي حد عن الموضوع دا
وعلي الرغم ان ممكن حد يشوفه موضوع بسيط فهو للاسف بلنسبة ليا عقدة نفسية وحاولت اعالج نفسي بكل الطرق لدرجه اني واللهي رحت لدكتور نفساني بس للاسف مافيش فايده طول الوقت الموضوع يجي فبالي وبطلت ابص فلمرايا خالص لاني كل ماببص فلمرايا مش بركز الا عليها ..والموضوع عندي مش نفسي بدون سبب هي فعلا محتاجه تجميل وزي مابقولكم الناس عقدوني منها..وانا سألت راي رجال دين فقلولي حلال والله اعلم لان انا واللهي عايزاها بس تبقي طبيعيه وعادية مش اكتر من كدا.....شكرا ليكم مقدما واسفه علتطويل