السلام عليكم ورحمة الله .. هاذا اول موضوع لي بهالقسم واتمنى افيد واستفيد منكم حبيباتي .. بنات انا صارلي 2 سنتين متزوجه و الحين داشه بالسنه الثالثه .. بديت احس بروتين وملل موطبيعي .. ماقمت اهتم بكشختي نفس قبل .. ليلحين مرتبه واتسنع بس مو نفس قبل .. يعني قبل كنت البس اشياء مغريه الحين لا كله بجايم او نفانيف القطن مالوت البيت ويمكن اكشخ كل شهرين مره .. زهقانه مادري ليش ؟؟ ومادري شسوي عشان ارد اهتم بنفسي .. مادري هل السبب الروتين فعلا او تطنيشات زوجي فبعض الايام اللي اكون كاشخه فيها .. او السبب حالتي الصحيه الغير مستقره .. او السبب ان زوجي مايلبس غير م**ر وفنيله واذا كشخ وزار .. بنات زهقت ابي حياه اجتماعيه ابي انشطه ابي اكمل دراستي ابي ادش نادي ابي اشارك بمعارض وامارس هوايات كل هالاشياء زوجي حارمني منها او بالاصح كله يقولي بعدين ويطنش الموضوع مايراكظ فيه .. بنات شرايكم هل حالتي طبيعيه او لا وهل الزوج يلاحظ التغير او لا ..؟؟ مثل ماقتلكم انا البس واهتم بشعري وعطري ولبسي بس اقصد الملابس المغريه يعني الحين كله ابي شي عملي ومريح مابي شي مفصخ ومكشف مادري ليش ..
هلا فيج يالغاليه شوفي...انتي كاتبه الداء والدواء لو تردين تقرين كلامج مره ثانيه راح تنصدمين ...انتي عارفه المشكله وين بس الحل مو عارفته مع انه بين السطور مدة سنيتن مده قصيره على الملل بالحياة الزوجيه بس مثل ماقلتي عدم اهتمام الزوج...انا ما اسميه عدم اهتمام بس انتي مركزه تفكيرج على زوجج وهذا غلط انتي اذا كشختي بتكشخين لنفسج...واذا هو لاحظ يعطيه العافيه واذا ما لاحظ الله معاه مو ضروري تلبيس مكشوف ومغري علشان تقولين انتي كاشخه...يمكن لبسج اللي تكلمين عنه كشخه بذاته يعني قصير وملون وناعم وهادي وهذا كافي شفتي الياهل اذا يحن على لعبه وعطيتيه بفرح فيها مده وبعدين يمل منها واذا تميتي تحطينها بويهه كل شوي بيمل منها اكثر وبيحاول يكـسرها او يحن على غيرها هذا الرجل......اذا تزوج يستانس بس تيي له فتره يمل من روتين الزواج هني شنو الحل ....بنظري لاترززين بويهه على طول وتجابلينه وايد حاولي تخلينه يدورج بالبيت حتى لو عايشين بغرفه اذا كشختي حطي في بالج انه لنفسج مو لغيرج لبسه المكـسر والفانيله اعتبيرها قمـيصه النوم بالبيت وهذي كشخته يعني مسكين شيسوي بيقعد يبدل كل شوي بيجامه غير لاتحنين عليه على طول وترددين على مسامعه كلام انت ليش تغيرت انت ليش ماتهتم هني تحطين في باله انه في ملل بينكم فاجئيه كل شوي بشي يديد مثل تغيير مكان النوم مو ضروري بغرفة النوم خاصه انه انتوا توكم متزوجين يعني في مجال للتغيير حتى لو تحطين لج فرشه بالصاله يم التلفزيون وتحطين نفيش ومكـسرات وعصاير هذا كله بصوب.....واذا تبين نصيحتي اللي انا اطبقها من سنين لاتشغلين بالج في طريقته بالتعايش بالحياة اهتمي بس فيه كزوج اما اطباعه فهذا شي يخصه حبي نفسج وعيشي لذاتج وبنفس الوقت لاتهملينه عطيه قلبج وعينج تراه فرحج وسعادتج اذا انتي رضيتي وبنفس الوقت بيكون سبب تعاستج اذا انتي تبين يكون سبب لها عذريني طولت عليج بالكلام بس فعلا هذا اللي انتي تحتاجينه وانتي على راحتج تاخذين بكلامي كاخت كبيره لج او تتصرفين على راحتج ربي يهديج ويسخره لج يارب
صباح الورد مزاين ماقصرت حبيبتي انتي الي فيج اسمه ملل والكل تصير له هالحاله ولكن مومعنى ماتكشخين الا لزوجج نفس ماقالت مزاين كشخي لنفسج غيري بلبسج شعرج ميك اب كل يوم شكل مره بدون ميك اب كلوس وماسكارا لبسي الوان حلوه حاولي تغيرين في غرفتج او الصاله في بالنت مواقع واجد ممكن تشتركين فيها تقرين كتب سوي لج سوق بالنت موقع تسوقي حقج وسهله حيل ومايكلف بعد سوي لج مدونه كتبي فيها الي تبين ودائما الازواج ترى مايمدحون اذا كشخنا يعني يختارون الصمت لاتضايقين وصدقيني اهو يلاحظ وكثري من الاستغفار وبتشوفين الخير كله
