اللي فنانة بطبخ الذبيحة تدشششش

السلام عليكم
بنات ادري اني قوية شوي بس شسوي اعيالي يموتون على اكل الذبايح (( متوحشين ادري)) بغيت اعرف طريقة طبخ الذبيحة عدل مدل
من غير ما يطلع لها ازفرة وابي العيش يكون ريحته تجننن
اشلوووون:sad_smile:

بالتوفيق والله اذا طبخت ذبيحه بروحي ارد لكم خبر

بسم الله الرحمن الرحيم

الكل يعتبر طبخ الخروف صعب بس والله سهل جدا
اول شي لازم تنقعين اللحم بالماء عشان ينزل الدم وبعدين تغسلينه جيدا
وتتركينه ينشف بعدين تضعينه بالقدر وتقطعين معه البصل ويكون تقطيع البصل شوي كبير يعني البصله تقطعينها اربع قطع وحطي شوي ثوم مدقوق واتركيه على النار شوي وبعدين ضعي الابهارات وهي عباره عن
كركم وفلفل اسود وكزبره وملح والملح حسب الرغبه وبهارات لحم الموجوده بالجمعيه وطبعا البهارات حسب الرغبه يعني تقدرين تزيدين اوتقللين وبعدين تضعين الماء بحيث يقطي اللحم وتتركينه الى ان يستوي بعد مايستوي اللحم طلعيه وضعي العيش وطبعا يكون مغسول ومنقوع ساعه وانا كان ماء اللحم زايد شيلي منه يعني نفس مكبوس اللحم الي بالجدر الصغير اتركيه شوي وبعدين نقصي النار عليه وضعي عليه زعفران منقوع بشوي ماء ورد وقصدريه جيداالى ان يستوي وزينيه بطريقتك وسلامتك

الله يسلمج اختي (( المها ))
وتسلم الايادي ع الوصف والرد

هلا أختي :
اول شي تمسكين راس الخروف وتحطينه على جنب بعد ما يكون مصلوخ من قبل القصاب طبعا.

نجي للذبيحة :

طبعا تغسلينها عدل وتروحين للمفطح >> المقعدة حقت الخروف >>خوش وصف

وتاخذين سكين كبير وقوي وتمسكين الساق بالضبط عند الركبة واضربيها ضربة قوية مو قطع لا بحيث انها تكون مرنة جدا وتجفسينها عند الطبخ
وتروحين لمجرى الفضالات للذبيحة تنظفينه عدل وتفتحينه بالسكين .
تغسلين الذبيحة بالماي عدل ولا تنقعينها لان اللحم طعمه بيخترب

---------------------------

هاتي الجدر الكبير حطي في نصه ماااي من الفلتر وخلي الماي لين تغلي ونزلي فيها اللحم وانتظري عليها كم دقيقة بتلاقين رغوة تطلع منها تشيليها لين مايبقى الا شي بسيط من هالرغوة . . .

اخذ البصل وضيفي له بهارات اللحم + ليمونتين مقصصين بالنص

----------------------------------------

هاتي السكينة وحاولي تسوين شقوق عميقة في افخاذ الذبيحة وظهرها

-----------------------------------------

الجبدة + الكلاوي حاولي تسوينها ويا الحشو حق الذبيحة الزبيب والبصل

----------------------------------------

رأس الخروف :

أخذي جيس وحطيه على الارض وهاااتي الراس ومسكيه عدل واضربيه بالارض

حيل بينزل منه بلاوي

طبعا انا ما اتعامل مع الرأس لاني أخاف امسكه !! اخلي خدامتي هالحركة

-------------------------------------

هاتي جدر ثاني واطبخي الراس فيه وحطي له بهارات وبصل
احب اطبخه بروحه وفي ناس يطبخونه ويالذبيحة عادي .

----------------------------------
في هالوقت تكونين مغسلة العيش ومنقعته
---------------------------------
أول ما يستوى اللحم تطلعينه وتكونين مضبطه له صوص

(زيت - فلفل - كركم -زعفران )

ادهني الذبيحه فيها ودخليها الفرن
--------------------------------
صفي ماي الذبيحة بالمشخال عدل
--------------------------------

ونزلي العيش في الجدر ولما يتنشف ضيفي له الزعفران وخلي النار تحته خفيفة .
------------------------------

وبالهناء والعافية

الصراحة فنانة يا ام عبداالله
الله يخليج حق بنات المنتدى ونستفيد منج يارب:rose:

داشة اكتبلج الطريقه
بس البنات ما قصروا
انا بس عندي خلطه اسويها حق الذبايح
اخذ بالفرامه الحب مو الناعم ( كزبره ومسمار ودارسين وهيل وينسون جبة حلوه ) اطحنهم و
واحطه مع الماي الورد والزعفران احطه عالعيش اخر شي لما يبي يتسكر
وعلى اللحم قبل لا احمره
هذا سر من اسراري يخلي الي بالشارع يشم الطبخه
ادعييييييييلي بالسعاده والتوفيق

الله يسعدج ياحياتي ويوفقج يارب

الله يسلمج يارب وحاااضرين دوووم

اهلين انا اذاجابواالذبيحة اغسلها بعد المصلخ بعدين اجيب القدركبير احط الحم والماءيكون مغطيه وقبل لايفوح اخذبصل مقطع واحمسه واجيب الطماط واقلبه واحط الملح والبهارات واليمون الاسود والدارسين واحطه علي الذبيحة حتي ماتطلع الرغوة ولمن تنجح الحمة اجيب قدرثاني واحط فيه مرق حتي اكبس الرز احط عشرحبات هيل وعشر مسمارماطحن وفلفل اخضر ولامن نشف الرز اجيب زبيب واخلطة ببهارات وصفار واحطة فوق الرز علي جنب واخذ فحم اشبه واحط وسط الرز فنجال فيه شوي زيت واحط الجمرة وسط الفنجال واسكر الغطاء بعدين لافتحتيه يصير كنه مندي وبالعافية وطبعا دايم اغير في طبخي

تسلموا جميعا على الوصفات الحلوة
تدرون والله كنت اريد اسال عن الموضوع ده كيف اطبخ الذبيحة افدتونى الله يعطيكم العافية

اللة يعطيكم العافية والله بنات المنتدي فنانات بطبخ الذبايح:wink_smile:

ام عبدالله كفت ووفت والله يجزى كل الاخوات خير ماقصرتوا على هالمعلومات

جزاك الله خير ياأم عبدالله بسحبيت أعرف أمتى أتحطيلن البهارات هل على طول من أتشيلين زفارة اللحم أو أتخلينينه يطبخ شوي /وشنهي البهارات ألي أتحطينه في الماي واللومي الأسود أو الأخضر وكم كمية البصل ؟

هلا أختي
البهارات تحطينها بعد ما تشلين زفرة اللحم
والطريقة اللي اسويها هي :

اجيب طاسة بلاستك متوسطة الحجم واحط فيها تقريبا 6بصلات مقطعة اما طوالي او مربعات متوسطة .
واضيف لها البهارات التالية :
زنجبيل مطحون + طازج يكون افضل
كمية من القرنفل ( عويدي )
وإذا عندج بهارات لحم مخصوصة ضيفيها
وضيفي اعواد دارسين اعواد مو مطحونة
هيل حب
ليمونة مقطعة نصفين ليمون طازج مو لومي ناشف .
كزبرة حب فلفل اسود حب فقط
هذي دائما بهاراتي اخلطها عدل مدل ويا بعض واضيفها للذبيحة . . .

ولا تضيفين كركم للماي اللحم لانه بيلعب بلون العيش والفلفل الاسود حب ضيفيه مو مطحون
لانه بيلعب بلون العيش بعد . . .

شكرللأخت أم عبالله

أسعدتني سرعة ردك على الموضوع ومشكورةوايد

تسلمووووووووووووووون خواتى كلكم يعطيكم العافيييييييييييييه:wink_smile::wink_smile::wink_smile:

بعد ام عبووود ما نتحجى بس اللي قالت اطحن البهار لا وخصوصا الدارسين يسوي اللحم اسود اذا كان مطحووون

افضل طريقهحطي الذبيحه بالقدر وحطي ويها ماء مايكون حار عادي وكل شويه شيلي الرغوة اللي تطلع فوق الجدر لمدة ساعة لين تحسين انه نظف /وابدي حطي البصل واالطماطم

والثوم ولا تنسين معجون الطماط والبهارات ولملح حسب الطلب /علي حسب كبر الذبيحه مدة الطبخ لمدة ساعتين اذا كان خاروف كبير شويه وبعدين طلعي الحم وحطي العيش باب الهند ولا يطول بالماء غسله غساتين علي السريع لانه نظيف وخليه يطبخ علي نار هاديه لمدة عشر او عشرين دقيقه 0دعواتك انتي وعيالك0​

كان خآآآآطري أعرف شلون يطبخون الذبيحه
الله يعطيكم العافيه ​