بدخل بالموضوع على طول واذكر لكم مشكلتي يا طويلات العمر انا جبت بنتي عقب سنين طويله فخوفي عليها زايد أكثر من الازم حجبتها وهي صغيره وما تروح الا معاي صايره مثل ظلي هي الحين تمر بفترة مراهقه ابوها قبل سنه شرى لها لابتوب بس انا حذفته وما خليتها تشبك هالايام شرالها تلفون بنجاحها قمت وحذفته بس بيني وبين نفسي صراع صراع ابيها تكون شخصيتها قويه وتعتمد على نفسها وبنفس الوقت انا حيل خايفه عليها خاصة الله عطاها مسحه من الجمال واخاف تفتن أو وحده من البنات تضحك علي عقلها شرايكم خوفي في محله ولا المشكله فيني
هلا اختي . . . ربي يخليها لج ويخليكم لها . . . ويصلحها . . . اوكي البنت ما تطلع الا وياج هذا شي اشدد عليه ومعاج حق فيه . . . لكن لا تكونين وياها ع طول الخط شخصية الام هذا لا وهذا ما يصير ! حاولي تنزلين لعقلها وتشاركينها اهتماماتها قعدة حلوة تحطون ميك اب قعدة حلوة تلبسون وتاخذون ذوق بعض سهرة وياها ع فلم يكون مناسب لعمرها حسسيها انج رفيجتها وابتعدي عن اسلوب التوجيه المباشر خل تصرفاتج اهي تعلمها الصح من الغلط كان بودي اكتب لج بعد لكن النووووم غلبني واي شي حاضرين
والله يا أم عبدالله ما قصرت معاها بأي شي وديتها كل مكان فرينا كل المشروعات السياحيه ما خلينا مكان ما رحنا له أرقى المطاعم أرقى الفنادق وارقى الشاليهات قالت أبي آيبود شرينالها قالت آيباد شرينالها لكن ما تشبك هذه شرطي لها الحين تحت علي تقول يا ماما كل الأمهات عندهم الآيفون الا انتي يا ماما انتي تفشلين شفتي عاد صرت افشلها بنات آخر زمن والله خايفه عليها من البنات اللي ما يخافون الله ما ادري شنو الحل
