السلام عليكم بنات الله يخليكم انا محتاره وايد ومحتاجه رايكم زوجي بيسافر لندن بيكمل دراسته وعلى حسابه ودوامه راح يقصون نص معاشه ويبيني اقدم استقالتي من دوامي وأقدم على بدل بطالة و أروح معاه أعيش سنتين لين يخلص دراسته وانا متردده وخايفه من شغلات وايد مو عارفه شنو نهايتها 1- بدل البطالة اللي اعرفه 300 دينار وانا عندي قسط القرض + قسط سيارتي كلهم 280 اهوا يقولي لا تحاتين راح اعطيج مصروف بس انتي كثر ما تقدرين اقتصدي بالمصروف 2- شلون بعيش بعيد عن اهلي ورفيجاتي وديرتي وشسوي اذا حملت زوجي يبيني احمل و أولد هناك ( حاسه بخوف ودي تكون امي معاي ) والمشكلة اني مو شاطرة وايد بالأنكليزي( خريجة معهد تجاري ) ويا ريت اعرف شلون طريقة تعامل الأجانب مع العرب فيها ظلم وقساوة ولا الناس هناك حبوبيين ؟ 3- وانشالله اذا زوجي خلص دراسته ورجعنا الكويت, قاعده افكر شلون برجع حق وظيفتي ؟ يصير ارجع حق نفس دوامي ولا ارجع ادور وظيفة من أول و جديد ؟ وسامحوني اذا طولت عليكم بس جد ماني قادره انام الموضوع وايد شاغل بالي :sad_smile:
مرحبا حبيبتي مادري رايي راح يريحج او لا اذا زوجج حاب تروحين وياه ومصمم ماكو الا توكلين علي الله واذا ماتبين تطلعين من دوامج اخذي اجازه بدون راتب واذا مو مرتاحه لها الحل كلميه واقنعيه وفي الاجازات تروحين له والله يوفقج
يابنت الحلال توكلي على الله وعلى فكرة لندن كلها عرب وانا رايحتلها اكثر من مره وياكثر الخليجيات هناك واهم ماعليج زوجج ولا الوظيفة لاحقة عليها
هلا اختي حاولي تشوفين قسم الاجازات في دوامج في طرق كثيرة للاجازة مرافقة زوج - من غير راتب يعني امور ثانية غير الاستقالة ولا تحاتين اصلا لندن اهلها تركوها للعرب
انصحك عشان ما تندمين لا تقدمين استقالتك ترى صعب تردين لوظيفة مثل ما انتي شايفة تعيين الوظايف صار بصعوبة آنا أضم صوتي مع أم وهج........عشان ماتندمين اخذي اجازة من دوامك وشوفي الوضع عقبها ردي وبين فترة وفترة زوري زوجك بس ديري بالك تطيعين زوجك بالاستقالة"هذا انا نصحتك "
بدل بطاله مو 300 للمرا 150 ولازم يطوف عليج سنه او 6 اشهر مو متاكده بالضبط يعني اول ماتستقيلي لازم تنطرين 6 اشهر بعدبن تقدمين عالديوان واذا ماطلع قبولج خلال سنه تقدمين على بدل بطاله هذا اللي اعرفه والله وشوري على ريلج قوليله انت نطرت كل هالسنين انطر بعد ليما نخلص الاقساط اللي علينه ... وشوري عليه بعد انه مايدرس وياخذ تفرغ دام المكاتب موجوده انا ريلي يشتغل دوام عادي ومعاشه كامل بس كل كورس يساافر شهر يحظر اخر المحاضرات ويمتحن الفاينل ويكون وقتها ماخذ اجازه شهريه من الدوام وايد احسن لكم
نصيحتي لج تاخذين اجازة من رصيدج واذا ماعندج رصيد اخذي اجازة من غير راتب وخلي زوجج يدفع حق البنك لمدة سنتين لازم يساعدج مو يبيج تروحين معا لازم يساعدج صدقيني الحين مافي وضايف ورياييل مالهم امان اذا فنشتي منو راح ينفعج او انتقلي مكان ثاني تكونين عارفة المدير من اهلك او اهلة يضبطج مايخليج الداومين امدة سنتين
لاتسوين نفس رفيجتي خلت زوجها يسافر و اهي اهني لمدة سنتين و تروح له بين فتره و فتره تدرين شنو صار؟؟؟ الريال رجع واحد ثـــااااااااني حتى اهله يقولون متغير صار يتحلطم وايد و كل شي مو عاجبه و يدور النجره مع مرته حياتها صارت مأساة والله نصيحتي روحي وياه و راح تتأقلمين عالجو اهناك و اللغه راح تصير قويه عندج و لاتحاتين لندن كلها عرب و خليجيين
