السلام عليكم انا بدش بالموضوع على طول بقولكم قصتي باختصار وابي نصايحكم انا تزوجت وضلييت اربع سنين اعالج للحمال وجربت كل شي من تلقيح صناعي 7 مرات وحقن مجهري 3 مرات وابر وحبوب نوووووو. ويييييي. وسويت كوي للمبايض وازالة اكياس وعمليات وايد قرحه ولحمية وبالنهايه رحت لدكتورة قالت لي في ابر حلوة وانتي ماسبق استعملتيها قلت خو مابقى الا هذي يالله عطينياها واخذتها وحملت بنفس الشهر وجبت ولدي حبيبي وقالت لي اذا ماحملتي بعده ب6 اشهر عالجي قلت اوكيه وبعد 11 شهر استوعبت ورحت اعالج عندها وطلبت نفس الابر كنت مسجلة اسمها لكن ماكنت اذكر كم الجرعه قالت تذكري قلت75 قوتها واخذتها دبل وحملت ولله الحمد بس المفاجأة كل شهر تقول زادوا البيبيات ليمن صاروا 3 قولوا ما شاء الله بصراحه مافرحت واااايد بالع** قعدت ابجي فترة وزوجي اكتأب لان ولدنا صغير وحركي اسم الله عليه والحين انهيت الخامس واجهتني مشاكل وتعب بهالحمل واااايد وتنومت واااايد بالمستشفى والحمدلله الله لايضيع تعبي فيا حبايبي ابيكم تساعدوني وتفرجون همي احاتي وين اولد ؟ حكومه ولا خاص وهل وحدة سمعت بنفس حالتي قريبه منها ؟ وين ولدت وشرايكم عندي خدامة طباخة وحنونه عالولد بس ودي اييب غيرها تساعدها شييب ومنو جربت قيصري بمستشفى الفروانية ؟ اناجربت انام فيه رعايتهم حلوة بس ازعاج واللي ماودها تساعدني تدعيلي حدي خايفه احاتي الولادة والتربية والخدامة دعواتكم تنفرج
الله يتمم عليج وتولدين بالسلامة ..وانتي وأطفالج بصحة وسلامة يارب ان شاء الله البنات يفيدونج وما يقصرون
هلا اختي . . . ربي يقومج انتي والبيبيات بالسلامة يارب . . . ولا تحاتين شي استخيري واولدي بالحكومة سبحان الله لو احتاج احد من المواليد حاضنة تكون بالحكومة افضل وبلاش . . . والخدامه يبيها فلبينية كبيرة بالعمرررر او هندية متعلمة وكبيرة بالعمر . . . وربي يقويج ويكون بعونج يارب . . . وياريت تكتبين لنا اسم الابرة خل اسوي عنها بحث . . .
مشكورات حبيباتي عالدعوات الحلوة والله يسمع منكم اما بخصوص الحكومة احاتي انه محد يقدر يدخل معاي ولا حتى اتكلم تلفون ولا منشاف ولامندري خذوه فغلووه احاتي اذا طولت شلون أطمن اهلي وجذي اتعب نفسيا. دكتورتي قالت اولدج واذا احتاجوا حضانه ننقلهم باسعاف اما بخصوص الخدامة ودي بفلبينيه بس بيتي بيبانه وااااايد وعندي سايق وتدرين تعب التوأم ماراح ادري عن البيت سهر والفلبن صياعه وزوجي شارط مسلمه اللي عندنا كبيرة هندية ومسلمه وشريفه ما أضمن القى مثلها والابر حبيبتي اسمها قونال اف. واخذت معاها حبوب قويه نفي الكلوميد بس نسيتها اذكر بدايتها حرف ان بالانجليزي
الله يوفقج وتوليدينهم بإسلامه وصحه وعافيه ويعينك ياروحي بس صدقيني راح يصيرون هم واخوهم ربع انا حملت علي ولدي بعد الاربعين مباشره وانحين ولدي وبنتي جنهم توام يحبون وينامون بحضن بعض ومايرضون على بعض
ماعندي شي اقوله لك لاني بـ السعوديه وانتي بـ الكويت بس الله يتمم لك حملك ويعنيــــــــك علا حملهم وولادتهم وتربيتهم ولايخسرك من تعبك شي اللهم اااااميــــن
الله ايسلمج ويسلم اعيالج ما شاء الله عليج بس اتحملي عن الحركة الزايدة والمجهود لأنه يأثر وبالسلامة إن شاء الله
ما شاء الله الله يعطيج الصحة والعافية انتى و البيبيات . انصحج انج تولدين بالحكومه لانج احتمال ( الله لا يقوله ) انج تولدين مبجر .
حبيبة قلبي انتي بنفسج تقولين طبيبتج قالت اذا احتاجوا الحضانه بيودونهم الحكومه باسعاف ولعلمج هالاسعاف لافيها حضانه ولاهم يحزنون يعني تعب 9 شهور احتمال كبير اسم الله عليج يروح بثواني وليش هذا كله؟اولدي بالحكومه وارتاحي وبعدين انتي وقت الولاده تبين الاهتمام من الاطباء وراحة البال لج ولهم علشان يهتمون فيج..........اشتبين بالحنه ووقفة العالم يمج وكل واحد يعطيج راي توكلي على الله بحالتج افلض مكان الحكومه وانتي تولدين يمج الحضانات ربي يسهل عليج وناطرينج تفرحينا
لا اله الا الله محمد رسول الله صلى الله عليه وسلم... الف مبروك يا قلبي الله يتمم على خير ان شاء الله خيرة لج يا قلبي واحمدي ربج على النعمه ادري يا الغاليه تعب عليج بس احتسبي الاجر من الله والله يعينج على تربيتهم ان شاء الله وعن نفسي انا جربته القيصريه بالفروانيه والله ووووعع تعب مافي مسكنات الامرة بوحده باليوم وكل دقيقه هذا داخل وهذا طالع ماكووو راحه والطفل اول يوم بس يمسكونه والايام اللي وراها لوكنتي تعبانه يخلونه عنج انا توهقت لان كنت تعبانه وامي ما قدرت تنام عندي عشان كان عندها ظروف وكل دقيقه قايمه اشوف ولدي صج انه بس المراة شوي تتعب بعد الولادة تبي احد معاها ((قرقره)) قلت قصة ولادتي هههههه...
مشكوريين حبايبي عالدعوات الحلوة تسلموووووون اختي المزاين. انا معاج انه الحكومة افضل طبعا بس الخاص اريح وبخصوص البيبيات ماراح ينقلونهم جذي اكيد بحضانات ومع كل واحد سستر ومعاهم دكتور اطفال يسلمهم ليمن دكتور الاطفال بالحكومة وانا ماراح اروح خاص الا بالتاسع اذا قبلها اكيد لا اختي دلع. صاااااجه والله الفروانية ازعاج وانا يوم تنومت كانت يمي فلبينية والدة قيصري يالله تقوم ويالله تقعد اوعلييه **رت خاااطري تخيلي نايمه والبيبي بحضنها خايفه عليه ولا اغلب الوقت عندها واهي تبدله وتحفضه مايعطونها حفاظات احس متلعوزة محد معاها زوجها يجي بالزيارة قعدت اساعدها واقهويها يوم درت امي هههههههههه قالت انتي منومينج ترتاحين مو تخدمين المرضى كانت مشيمتي نازله حيل ونزيف والحمدلله. بناااااات معقوله انا الوحيدة حامل بثلاثة بالكويت خو الحين موضة التوائم معقوله ماتعرفون احد ولد ابي كم كلفته لان غالب المستشفيات قالوا حد اقصى ١٥٠٠ اذا هالمبلغ مقدور عليه بس خوفكم يندبل عفيه اسئلولي بدوامكم رفيجاتكم اللي يكون بس ابي احد نفس حالتي يطمني وهل البيلي بقيصرية ممكن يصيبه نقص ا**جيين
هلا اختي . . . لا في اللي حملوا بثلاثة وحدة قريبة مني حيل،لكن بالسابع ولدتهم قيصرية واحتاجوا حاضنة لهم وكانت في مستشفى حكومي . . . اختي انتي بتولدينهم قيصرية لانهم اسم الله عليهم 3 الا اذا ربج يسر امورج ولكن وضعج ما يتحمل طبيعي . . . فالقيصرية بتدخلين وسيده ع تحضيرات العملية . . . لكن كبارقة امل اقولج اختي حملت بتوائم وهالحجي من التسعينات وولدت بحكومة وربي يسر وسهل امورها وولدت طبيعي ولا احتاجوا حاضنة . . .
حبيبتي الف مبروك الله رزقج من فضله بعد صبر وعلاج وعطاج ولد وبعدها عطاج 3 لو تعب وحمل وثقل الله يبي منج الصبر واذا احب الله الانسان ابتلاه بالتعب والمرض الله يسهل حملج ويعطيج الصبر على طول ادعي الله يصبرج وارقي نفسج بالرقيه الشرعيه وتقربي من ربج هو القادر على انه يسهلها ويسعدج انا افضل تستخيرين بسالفة الخدامه وتتوكلين على الله واستخيري بالمستشفى واكيد راح يكون تعب عليج مجابلهم ان شااء الله اهلج مايقصرون والله يعطيج الصبر ويفرحج فيهم متعافين وبعدين شوي شوي تتاقلمين مع وضعج الجديد ويكبرون وتساهيل باذن الله انا اختي ولدت بمستشفى الفروانيه تؤام والحمد الله كانت مرتاحه
مشكوريين ياقلبي عالدعوات الحلوة لاااااا بعدي صامدة تو الناس انا بالسادس الحين الله ييسر الخير ياربي بس الظاهر بضحي بنفسي عشان البيبيات وبولد بحكومة خايفه اغامر فيهم ماتسوى هالتعب يروح مت من التعب شي ماتتصورونه مع انه بطني موكبير نفس ولدي حيل حجمهم صغيييير ومع هذا النومة علي بالحسرة اتعذب وانا اقلب من جنب لجنب شي ماتتخيلونه الله ياجرني بس الحمدلله خلصت تجهيزي عشان جذي غطيت عنكم فترة. السمووووووووحة
