حلفت لافضح زيت بيرفكت هير الله لايعودها من تجربه

لأفضح , الله , تجربة , بيرفكت , حلفت , يعيدها , سحب , هير

حلفت لأفضح زيت بيرفكت هير .... الله لا يعيدها من تجربة

هذا الزيت لعلاج الصلع الوراثي والغير وراثي ولعلاج تساقط الشعر ......

مدة استخدامة من شهر لثلاثة شهور حسب حالتك .... ويوميا استخدامة ويجي معاه شامبو لنتايج افضل <على قولتهم>

نجي للمهم ....

انا استخدمته عشان شعري يتساااااقط.... ومدة استخدامي له تقريبا 7 شهور ... راح تستغربوا وتقولوا طيب هو محدد مدة العلاج 3 شهور .. راح اقلكم لأني ما استخدمة يوميا انا استخدمة يوم ورى يوم .. عشان كذا طولت مدة العلاج

المهم انا شعري تقريبا شبه خفيف مثل شعر نانسي عجرم يعني مايل للخفيف ... وقلت بستخدمة

الحق ينقاااال .... خفف لي التسااااقط وخلى نفس شعرتي سميكة بعد ما كانت رقيقة جدا

طيب وين المشكلة ....

قبل اسبوع رحت لزواج بنت خالتي ... وكالعادة عادي استشورت شعري ولفيت اطرافه بالفير

لكن الصدمة ... انه بنات خالاتي كل وحدة تمسك شعري من ورى وتقول ... يؤيؤيؤيؤيؤ فين راح شعرك؟؟؟؟

ليش شعرك صار شعرتين؟؟؟ شعرك مرة صار خفيف ؟؟؟؟ حرااااام عليكي شعرك كان حلو ايش هذا؟؟؟؟


بصراحة انا كنت ملاحظة انه شعري بدأ يخف بس قلت امكن وسواس والله يا بنات والله العظيم من يوم استخدمت هذا الزيت صرت استحي افك شعري قدام زوجي ... من كثر ماهو خفيف صار فراغااااات بين الشعر والشعر طاير من خفته ... ويمين بالله انه اقعد
العب بشعري وهو مفكوك ويوم يدخل زوجي يطلبني شيء عشان اقوم اجيبة؟؟ والله يا بنات صرت الفه بالكلبس قبل اقوم عشان لا يشوف شعري من ورى.. وانا عندي زوجي من النوع اللي يعلق ويتريق

وانا اول كنت افك شعري واتدلع فيه يوم كان زي شعر نانسي عجرم

واحس بفراغات في مقدمه شعري .... والمصيبة والطاااااااامة الكبرى يوم اجي استشور شعري <انا استشور كل شهرين مرة> والله يا بنات وانا ماسكة خصلة كبيرة عشان استشورها الاقي شعر كثييييييييييييييييييييييييير مقصقص من بين الخصلة ومو ماشي مع طول شعري <ترى انا متأكدة انه ما كان شعري كذا قبل الزيت> ودحين يوم افك شعري من النص شعر كثير قصااااااااااااااااااااااار ومشوه مرة ... لا تقولوا هذا شعر جديد .. انا كنت زيكم فرحانة اقول شعر جديد
لكن هذا الشعر القصير في من اطرافة بقايا الصبغة اللي صبغتها من سنه .. يعني لو جديد هذا الشعر ما كان موجود فيه اثار الصبغة معناته انه شعري القديم بس متكسر



طيب راح تقولوا ... طيب ليش ما تركتي الزيت من اول مرة ليش استمريتي ؟؟؟

انا استمريت لأنه يوم شفت الشعر الصغير على بالي شعر جديد ...لكن للأسف طلع شعري متكسر
وغير كذا قلت هذا زيت مستحيل يضرني اقل شيء لو ما نفعني ما راح يضرني


والله يا بناااااااااااااااااااات اني زعلانة على شعري مرة مرة مرة


وابغى ارجعة ... انا حاليا استخدم زيت عافية منقوع فيه حلبة وفصوص الثوم عشان يطول الشعر الصغير ويصير ماشي مع شعري



والله مدري هو العيب من الزيت نفسة ولا من استخدامي للشامبو يوم ورى يوم <شكله شعري ما يستحمل اي نوع شامبو>

وطبعا نسيت اقول شيء من اهم عيوب هذا الزيت ... انه طلع شيب في مقدمة راسي ومن ورى ... بغيت انجن

انا ابد ابد ما كان عندي شيب ... لدرجة كنت اخاصم اختي اللي اصغر مني بسنتين عشان عندها كم شيبة في مقدمة راسها وكنت اقلها انا اللي اكبر منك ما عندي شيب زيك ... والحين تقريبا 8 شيبات في الغرة من مقدمة الراس وطبعا من ورى ماخفي كان اعظم



انا كتبت تجربتي للبنات ... واللي حابة تاخذ درس من تجربتي ...

ادعولي يرجع شعري مثل ما كان واحلى بعد

وهذا صورة للزيت




أمانه منقول لكن ديروبالكم