روايه شهد وياسر رووووعه يا بنات ,,

السلام عليكم ورحمة الله وبركاته

شلونكم..
شخباركم..

مابي اطول عليكم .. وان شاء تعجبكم القصة




ترررررن تررررن تدق الساعه مأشره على 6 ونص وشهد بعدها نايمه وتتقلب يمين ويسار ومالها خلق وتمد يدها على الطاوله
تدور وين مكان الساعه عشان تسكر هالازعاج وتكمل النومه .. شهد : ياربي هذا وقته كنت احلم بفارس احلامي..
والا تفز من السرير وتفرك عيونها وتقول : لا يكون الحين الصبح واليوم اول يوم بالثنويه !!
وقفت شهد عالسرير وفتحت الستاره اللي جنب سريرها وتشوف الشمس تجي على عيونها بقوه وهي متخرعه
وركضت وهي تاخذ المنشفه ورايحه للحمام وهي تتكلم مع روحها : من اولها جذي عيل شراح يصير لازم اعدل نومتي السهر بالعطله خرب كل شي ياربي
شكلهم بيعطوني تعهد من اول يوم .. ودخلت للحمام وغسلت وجهها بالمويه البارده وفرشت اسنانها وراحت تطلع ملابسها من الدولاب ولبستهم بسرعه وسوت شعرها اي كلام وتسريحه خربوطيه بعدها راحت للمطبخ اللي كان حوسه من امس والشيبس منثر على الارض والعصير مفتوح وطايح والذباب بكل مكان وحاله هالمطبخ مافي مكان تمشي فيه .. شهد : ياربي مو وقته وين بلقى لي شي اكله مولازم خليني الحق على الباص لا يروح ويخليني تصير ورطه صدق عاد واروح بتعهد من اولها ..
ونزلت وهي ماسكه شنطتها وتعدل بشعرها .. وطلعت من البيت تنتظر الباص على رصيف بيتهم لما وصل الباص وركبت.. وبعدها سلمت على الا بالباص واولهم راجو السواق صديقها الا طاقه وياه سوالف واخبار الهند والخرابيط ..و لما وصلت للمدرسه ..
من بعيد كانت نوره جايه تفحط بالجزمه الجديده نايك وحركات وهي فاتحه يدينها وتنط على شهد وتلمها .. نوره : يادبه محلوه شهالغيبه اشتقت لج
شهد وعلامات وجهها ما توحي بالوناسه ومالها خلق والنوم ماكلها .. شهد : هلا نوره بعد شسوي شوفت عيونج انا نوم ما انام مثل العالم
نوره وهي توخر يدينها وتبتسم ابتسامه حلوه .. نوره : وليه شصاير بعد ؟
شهد وهي تبادلها نفس الابتسامه وبوجه مليان نوم ومشدود عالاخر وودها السرير قدامها وتنط عليه .. شهد : سوالف بعدين اقولها لج بالفرصه ( الفسحه ) الحين خلينا ندخل نشوف اي فصل موجوده اسمائنا وربج يحلها .. هزت نوره راسه موافقه ومسكت شهد من يدها ودخلوا...
نوره وشهد الصديقتين الا علاقتهم تعدت الاخوه واقوى.. الا مهما صار ما يفترقون ومهما تهاوشوا يتصالحون
وما ينسون المواقف المضحكه الا تصير وياهم والسهرات والوناسه من اول يوم يدخلون فيه للمدرسه حسوا انه قدرهم مع بعض
وماراح يفرقهم اي شي الا الموت ..
لما دخلوا البنات كل وحده مالها خلق وخشمها واصل لجمجمتها ومانايمين ويتأففون ويشوفون توزيع اسمائهم.. كانت صدفه حلوه انه نوره وشهد بنفس الفصل وطبعا مو غريب الهبال من اولها ..
ودخلوا المعلمات على الفصول مثل العاده وعطوا الطالبات فكره عن هالسنه الجديده وشويه طلبات يحتاجونها منها الدفاتر الا يبونها وكل الادوات المعتاده بالمدارس .. وبعدها جا وقت الفرصه الساعه 9 ونص..
شهد كانت جالسه على الارض تنتظر نوره وماسكه سوارها وتربط فيه وهي مغمضه عيونها..
جت نوره من بعيد .. نوره : ها اشتريتي ؟
شهد وهي تبتسم: لا مابي ماني مشتهيه .. نوره عبست وقالت: لا مو طبيعيه اكو شي انتي خاشته عني يالله يالله قولي.. شنو الا مضايق احلى البنات؟
شهد وبوجه حزين بس ابتسامتها كانت تشق الحزن الا بقلبها : كالعاده ابوي ..
نوره وهي تجلس على الارض وتربعت وقربت من شهد وهي متخرعه ومتحمسه تعرف: شسوى ضربج او مد ايده؟
شهد وهي منزله راسها وتلعب بسوارتها وابتسمت: لا وين اصلا انا ما شفته العطله كلها ..
نوره بوجه مستغرب وفتحت عيونها : شلون يعني كان مو معاج وتركك بالبيت لحالج ؟
شهد وهي زعلانه : اي بس السالفه ومافيها.. انه اجر بيتنا الا كان باسم امي قبل لا تتوفى وخله نص البيت مأجر وانا بالنص الثاني غرفتي ومطبخ صغير وغرفه فاضيه وحمام (اكرمكم الله) وصاله وغرفه مافيها شي غير اوراق كانت له وسافر.. وما شفت وجهه من 3 شهور وهني انا تضايقت وهو اصلا ما اخذ رايي ولا فكر يقول لي وقسم على كيفه البيت..والمأجرين عائه مزعجه صراحه اولادهم يلعبون كره الساعه 3 الفجر مدري على بالهم بيدخلون كاس العالم لا والبنات دلعهم زايد عن حده كل وحده اميره بزمانها..
نوره وهي تضحك وبتموت ضحك : ههههههه الله كل هذا صار وانا ماادري انتي ماعليج منهم شدعوا على بالي كان يهددج والا شي
شهد وهي معصبه : افف وانا اكبر همي تضحكين عليه .. والا اقول اقلبي ويهج انا ليش اسولف لج !!
نوره وهي تخفف من ضحكتها مع انها مو قادره وغمزت لشهد : خلاص سووري ما قصدت بس انتي استغلي هالشي ..
شهد وهي مستغربه : استغله !
نوره : اي اخذي الاجار منهم كل شهر وبتصيرين مليونيره من وراهم وما استغرب اذا اجرتي البيت كله ونمتي بالملحق ..
شهد وهي تضحك من قلب على تعليق نوره : ههههههه اي واخذج ونلف العالم
نوره وهي متحمسه: وه وه يابعدهم ما نسيتيني كنت متوقعه اني بكون وياج ونتشارك الملايين
شهد وهي تغير ملامح وجهها وتمسك عصير نوره الا قدامها وتضرب نوره على راسها بالعصير : انتي من صجج ابوي مطلع روح المأجرين ياخذ منهم الأجار ولا فوق هذا مرات ياخذ اكثر من الا بالعقد ..
نوره وهي معبسه: وييه يا فرحه ما تمت وانا على بالي بنلف العالم مالت وانتي من وين تقضين للبيت؟
شهد وهي تضحك ابتسامه خفيفه: عادي على الله مرات يعطيني مصروف والقاه بحساب امي ومرات خوالي وعماني يعطوني وهكذا الحياه ..
نوره وهي مبتسمه: وييه والله حاله.. بس ماعليه الحمد لله ..
شهد وهي تبتسم لنوره صديقه عمرها وقلبها كله حزن والم وحياتها منقلبه تعاسه وحزن اول شي موت امها وبعدين ابوها صار يدور على زوجه ثانيه وبعدين صار يسكر ويجيها شارب ومايدري وين الله حاطه وبالعطله اللي الكل يستانس فيها .. والاهل يسافرون راح وأجر البيت وخلاها وسافر مدري وين ..حياتها كانت ضيقه والدنيا ما تضحك لها الا نادر الاوقات ..
بعد المدرسه رجعت شهد للبيت .. ودخلت المطبخ ولقت لها عصير توت بالثلاجه واخذته ودرست الا عليها ورمت نفسها عالسرير
ونامت وكلها برائه وحاضنه المخده الا على شكل دبدوب وتتنفس بهدوء ..

لما غابت الشمس ومر الوقت بسرعه على نومه شهد من العصر .. والحين صارت الساعه 2 الليل ..
وشهد تتقلب وغطاها بعيد عنها ..والمكيف يشتغل والحوسه قالبه الغرفه بس كان الهدوء شئ طبيعي بهالوقت ..
بس بعد دقايق والا باب البيت ينضرب بس الضرب كان قوي حتى الباب كأنه راح يطيح من قوته وكان سريع.. فجأه ..فزت شهد من السرير وهي مرعوبه وخايفه من هالضربات القويه ..
لبست الشبشب الوردي الا على شكل دبدوب ولابسه بجامتها البرمودا الخفيفه الصفرا البلوزه الزهيه الا كانت نص كم ونزلت من الدرج وهي حتى عيونها ما فتحتهم وتردد : الله يستر شصاير مين هذا .. الله يستر ..
وقفت شهد عند الباب وقالت بسم الله وفتحت الباب ..
تغيرت ملامح شهد من خايفه لمستغربه وفتحت عيونها من الا شافته ورجعت خطواتها لورى وهي حاطه يدها على فمها
وقالت : انت .. مستحيل ! ​

الشمس وحرها الحاد والساطع .. كان مسلط ( متجهه) على السياره السودا ..
جلس ياسر على ركبته ونزل وصار بمستوى شهد وقال لها بوجه فيه شويه حنان وهو يحط يده على دموع شهد : يالله شهالدلع ماكو شي ليه تصيحين؟ البيت كان بعيد وهذا طريق مختصر وانا ماكان قصدي شي وانتي خوافه خلي عندج روح رياضيه شوي ..مو انتي ركبتي وياي وما خفتي الحين قام يخوفج الطريق..
شهد وهي تصيح وماريحها كلام ياسر ابد.. شهد: ماابي ....
ابتسم ياسر ووقف .. بالابتسامه كانت تعابير وجهه جذابه وقال لشهد بصوت رجولي : وعشان اريحج اكثر الا تبي تشوفج تصير خالتج هاا ارتحتي ؟
شهد وهي ترفع راسها وتطالع ياسر الا كان وجهه مليان رجوله و الجاذبيه ما تخفى من ملامحه ووقفته الثابته وجسمه الا كانت شهد ما تقاوم تشوفه ونزلت.. راسها ووجها قام يحمر وقامت تمسح دموعها وهدت حالها وقالت: اي خاله فيهم ؟
ياسر وهو يمسك شعره ويرفعه من الحر : خالتج ابتسام ..! ها ودج ارجعك للبيت والا بتشوفين خالتج ؟
شهد وهي تنزل من السياره وتاخذ شنطتها من عالارض.. ونزلت راسها وضمت شنطتها ووجها احمر وخجلانه وقالت: انا اسفه .. طيب بشوفها من بعد اذنك
ابتسم ياسر ابتسامه جذابه وقال بصوت هادي ويريح الاعصاب: طيب
وركب السياره .. وركبت شهد وراه ..

اما الاوضاع ببيت نوره ما تريح ..
كانت نوره جالسه بالصاله (مجلس العائله) واخوانها يلعبون بلايستيشن ويصارخون ومتحمسين شوي ويدخلون بالشاشه وهي ماسكه الكوشايه ولابسه بجامه قصيره لونها ازرق وماسكه شعرها بشباصه صغيره والمكيف يهف عليها وقاعده على اعصابها.. وماقدرت تتحمل وهي ماسكه الجوال وتدق على شهد للمره الثالثه وشهد ماترد ..
نوره وهي تتأفف: ياربي هالمجنونه وشو فيها ما ترد شكلها استخفت
الحين شراح اسوي ليتني ماشجعتها تركب السياره والله بياكلونها بنات المدرسه من الكلام وبتصير فضيحه .. ياربي تكون بخير ..
حمد اخو نوره يلف عليها ويضحك وبصوت استهزائي: شصاير اليوم متضايقه ؟ نوره ومالها خلق: اقلب ويهك وطالع اللعب .. حمد:لاوالله شمسويه اعلم امي !!
نوره ووصلت اخر حدها ومسكت الكوشايه وترميها على حمد: اوهو.. بزران اخر زمن تعال طقني بعد مالت عليك ..
وصعدت لغرفتها ..


اما بالطريق كان الوضع عادي والكل هادي .. وشهد حاطه جوالها سايلنت (صامت) وما انتبهت له وهو يدق .. كانت مسافه طريق.. ووقفت السياره عند بيت موجود بالحارات ..
كان البيت عادي وشكله كيوت ومرتب وكان كبير شوي ويوحي بالهدوء
جدرانه لونها بني فاتح وواجهته فيها الباب الرئيسي ومن اليمين واليسار شجر صغير وخفيف ومرتب للزينه لا غير..
نزلت شهد وهي تطالع بالبيت يمين ويسار وجاء من وراها ياسر وتقدمها وهو يفتح باب البيت وقال لها: تفضلي ..
دخلت شهد من الباب والخادمه كانت وراها وياسر يمشي وراهم ..
لما دخلوا.. البيت كان انيق ومنسق وكبير وواسع من جميع نواحيه كانت المزهريات مرتبه ومنسقه بشكل حلو وزهور صغيره على الطاوله هذا كان بالمجلس الرأيسي الكبير الا كان مواجه الباب اول ما يدخل اي احد ..
لما كان الهدوء يعم المكان ومافي غير طقطقات خفيفه من مشيات ياسر وشهد على الارض .. جت بنت صغيره وهي تنزل من الدرج بسرعه وهي بقمه الفرح وكانت لابسه جنز برمودا وبلوزه نص كم لونها اخضر وشعرها مسويته قرنين (قرن يمين وقرن يسار ^^)..
وبسرعه صرخت وهي تنزل وتلم ياسر: يسوور انت وصلت ^^
ياسر وهو يبادل هالبنوته ابتسامه حلوه: اي.. وجبت لج حلاوه بالسياره ..
كانت شهد تطالع بمنظرهم وكأنها تحسدهم على هالحب بس كانت نظراتها خفيفه وحلوه وما تقصد اي شي تجاههم..
لفت البنت وهي لامه ياسر وهي توجه الكلام لشهد: منو انتي ؟
شهد تخربطت وقامت تدور لها صرفه للموضوع وتطالع يمين وشمال .. والا يقاطعها ياسر ويكلم البنت: هذي عندها شغله بالبيت بتخلصها وتروح ..ياحلوه يالله روحي اخذي الحلاو واصعدي دارج وحلي واجباتج ..
البنت وهي تطالع شهد وقلبت وجهها من فرح لعبوس وقالت: اممم.. طيب ..
ابتسمت شهد ابتسامه حلوه لما شافت البنت وهي تطلع الباب وهي معصبه كان شكلها كيوت.. قاطع افكارها صوت ياسر وهو يقول لها : هه .. هذي اختي فطوم عمرها 12 سنه بس لا يغرج.. تراها تجنن بلد ..
ابتسمت شهد لتعليق ياسر وقالت: ماشاء الله يحليلها الله يخليها لكم ..
طلب ياسر من شهد انها تجلس بالمجلس .. وهو بيروح يعطي خبر لخالتها عشان تجي وتفاتح معها الموضوع الا جابها لهنا ..
بعد مده لما اختفى ياسر عن انظار شهد قامت تطالع وتدقق بتصميم البيت كان احترافي وتصميم دقيق ومبين عليه جديد وفخم ومتعوب عليه ..
كان الوقت يمر بطيئ وحست شهد بالطفش وفجأه حست بجوالها يهز والا تشوف 3 مكالمات لم يرد عليها ونوره قاعده تتصل الحين ..
ردت شهد وهي مسرعه:الو ..هلا نوره
نوره بعصبيه وجالسه تصارخ: مالت عليج اي هلا واي مسهلا .. الحين انا قاعده على اعصابي وراسي قام يعورني وانطرج تدقين وحضره جنابج تقولين هلا !!!
شهد وهي تبتسم: والله اسفه ياقلبي .. كنت حاطه الجوال صامت الصباح ونسيت اغيره وما انتبهت للمكالمات الا الحين .. اعذريني والله اسفه
نوره وهي تغير اسلوبها وتهدا: اي زين تعدلي .. الا الحين انتي وين وطمنيني شخبارج ؟
شهد وهي تبتسم: انا زينه وماصار شي .. الحين انا ببيت شوي بعيد وقال لي ياسر انه خالتي تبي تشوفني وانا الحين ببيت خالتي..
نوره باستغراب: ياسر ! .. ومنهو هذا ؟
فجأه سمعت شهد صوت احد جاي من الدرج وبسرعه خافت وقالت لنوره: بعدين اقولج .. الحين لازم اسكر اكلمج بعدين .. باي ..
نوره وهي تبي تكمل كلامها والا يتسكر الخط بوجهها: صج ماتستحي .. خايسه تسكر الخط بوجهي ..
عدلت شهد جلستها وقلبها يهتز ومرتبكه تقابل خالتها ابتسام بعد 15 سنه ..
نزل ياسر من الدرج وهو يأشر لشهد انها تصعد فوق : تعالي خالتج فوق ..
مسكت شهد شنطتها وصعدت ورا ياسر ولما دخلت الغرفه حقت خالتها
كانت الغرفه مظلمه شوي .. والخاله منسدحه على السرير ووجهها مريض وجسمها صغير كان وجهها مبتسم رغم تعبها وكبر سنها ..
وقفت شهد عند الباب وخايفه تدخل وهي تطالع بخالتها المريضه .. مد ياسر يده ودفع شهد دفعه خفيفه حست فيها وطالعته .. كان وجهه صارم وكلامه جدي وقال لها : ادخلي..
دخلت شهد وهي خايفه وأأشر لها ياسر بانها تجلس ..وجلست بكرسي قدام السرير..
الهدوء كان مسيطر على الغرفه .. وشهد منزله راسها والخاله كانت تطالع فيها ..
فجأه .. طلع صوت خفيف وناعم ويوحي بالمرض والتعب وهو يكلم شهد: ت..تو ما نور البيت .. ابتسم ياسر وهو يعدل مخده الخاله ويقول لها: لا تتعبين روحج يالغاليه تسندي على المخده ..
وشهد تطالع طيبه ياسر وهي الا كانت تظن انه كان سارقها مع انها ركبت بإرادتها او كان يبي يستفزها وماكانت تتوقع ورا كل هالرجوله هالقلب الحنون على خالتها..
قالت شهد بصوت هادي: مشكوره خالتي ..
ابتسمت الخاله وقالت لشهد: هلا بنيتي .. وين اغراضج ما اشوفهم معاج؟
قالت شهد بصوت مستغرب: اي اغراض ؟
كانت الخاله قاعده تكح بقوه وكان التعب واضح عليها ويدها ترجف شوي.. وكان صوتها مبحوح وما يساعد للكلام ..لاحظ ياسر انه مو الوقت المناسب للخاله انها تشرح او تتكلم مع شهد ..
قال ياسر بصوت خفيف وهو يقرب من شهد: مو وقته خليني اوضح لج بره.. الحين هي تعبانه شوي ولازم تاخذ البخار والعلاج ..
طلعت شهد من الغرفه وياسر وراها وهو يسكر الباب بعد ما تطمن على الخاله ..لفت شهد وجهها على ياسر وهي مستغربه:الحين انا مافهمت شي غير انه هذي خالتي .. انا شموقعي الحين ؟
جلس ياسر بالكرسي الا كان قدام غرفه الخاله ومقابل للدرج وقال لشهد: تعالي اجلسي وانا اقولج السالفه بالتفصيل..
جلست شهد وهي متحمسه تبي تعرف شالسالفه الا خلتها تجي من المدرسه وتتقابل مع ياسر وتشوف خالتها .. وحست انه شي بيقلب حياتها بعد هالوقت الا بيمر لما تسمع القصه من ياسر..
ياسر وهو فارد جسمه ومرتاج بجلسته وجه نظراته الحاده لشهد وبدا يقول القصه: اول شي ببدا من بعد ما تزوجت امج المرحومه العم محمد وكان هو معارض انه يجلس مع امج ببيت جدك الا هو ابو امج .. فاخذ امج من غير رضا جدك وامج كانت تحب ابوج وايد وضحت عشانه بكل الطرق وكانت تثق فيه وما تحاول تزعله او تخرب علاقتهم الحلوه بأي طريقه وكان حب حياتها الوحيد..
نزلت شهد راسها وهي تتذكر بعض الاحداث بحياتها وقالت: ايه بس هو تغير الحين صار شخص غير ابوي محمد .. المهم ماعليك من خرابيطي كمل ..
كمل ياسر كلامه وهو يطالع بشهد وقال:عاشت امج مع ابوج سنتين وكانوا منعزلين وقليل من القرايب يزورونهم .. وجدك كان زعلان من امج حده وماكان حتى بالعيد يزورها او يسلم عليها .. لين ماقالوا انه امج حامل فيج ..
كان جدج متوفي ساعتها .. وخالتج ابتسام كانت دايم تزور امج وتساعدها بالبيت وتسوي كل شي عشان ترتاح .. وكانت هي من بد خوالج تجي عندها والكل كان حاط براسه انه موت ابوهم من ورا امج وماكانوا راضين يكلمون امج ابد..
مع انه امج مالها علاقه وكانت الامور حلوه بين جدج وامج بالاونه الاخيره قبل وفاته ..
قاطعت شهد ياسر وهي تقول: يعني خوالي كانوا مايسلمون على امي او يكلمونها بعد ما توفى جدي ؟
رد ياسر وهو يقول: اي نعم .. بس خالتج ابتسام كانت هي المتعلقه بامج وامج كانت الام لخالتج ابتسام بعد وفاه جدتج ..
بعدها بمده امج ولدت وقالوا بنت .. وفرحت خالتج وامج ..طبعا كانت انتي..
بس رده الفعل الا صارت من ابوج الكل استغرب منها .. لما خبروه انها بنت انقلب وجهه واختفى لمده اسبوع كان قليل التواجد بالبيت وماكان يشوف امج الا قليل ويمر يسلم وينام ولا يشوفج ولا فكر يلاعبج او يشيلج مثل باقي الاباء الا المفروض يهتمون باول اولادهم..
لفت شهد وجهها وعيونها كانت حزينه وقالت: هو اصلا ما يعتبر نفسه يعرفني او انا بنته حتى الحين قليل اشوفه بين الاشهر بس ماعليه الحمد لله .. انت كمل ماعليك
كمل ياسر السالفه وهو يقول: بعد ماصار عمرج 6 سنوات كانت الاحوال بين امج وابوج ماتشجع ابدا.. وخالتج كانت تهتم بعيالها بس ماكانت تقلل زياراتها وتزور امج وتخفف عليها وتواسيها وتدافع عنها كل ما بدى ابوج يضربها او يهاوشها .. الى ما صار فيها مرض القلب وجتها سكته بالليل ومحد كان موجود وابوج كان نايم عند واحد من اصحابه .. وانتي كنتي صغيره وماتفهمين الا يصير .. ولما جت خالتج ابتسام للبيت شافت امج نايمه بالسرير والا تلقاها متوفيه من البارحه.. وزعلت خالتج ابتسام وكانت زعلانه حدها وما تكلم احد وكله تتحسب على ابوج بس كانت واثقه انه قدر من الله ولازم تؤمن بالا يصير.. ولما وصل الخبر لخوالج توهم يتذكرون انه كان عندهم اخت وجو يعزون وقررت خالتج انها تاخذج وياها تربيج مع عيالها بس ابوج ما رضى ..
وكان معارض انه احد ياخذ بنته او يربيها غيره كان ناوي على شي بس محد يعرف شنو الا هو نفسه ..
والحين خالتج مريضه بمرض بالشرايين وصعوبه تنفس وعندها عمليه بعد اسبوع بسويسرا فحبت توضح لج هالسالفه وتقولج شي اهم من كل الا قلته ..
وامس قبل لا تنام وصلت لها من اخوها رساله قديمه وكان الظرف يوحي انها قديمه ومر عليها الزمن بس كان مسكر ومحد فاتحه..
وبعد ما فتحتها خالتج امس كانت اول مره اشوفها تصيح وتدمع عيونها بدموع فرح ممزوجه بحزن وذكريات ..
شهد وهي مستغربه وبنفس الوقت ودها تسأل وقال: شنو كان بالرساله عشان خلى خالتي تصيح ؟
ياسر وهو يبتسم كانت الرساله محدده لخالتج ابتسام من بد كل خوالج وكانت مكتوبه بخط مألوف .. كانت الرساله عباره عن وصيه ..
شهد باستغراب: وصيه منو .. وشنو كان فيها ؟
ابتسم ياسر وقال : وصيه المرحومه امج لاختها ...
شهد وهي وقفت من الكرسي وفتحت عيونها وقالت: امي !! ​

​

بليله القمر الساطع نوره مغطي سواد الليل والنجوم تلمع ..ننزل من السماء ونشوف هبه الريح الخفيفه تهب على الحي ..
شهد وقلبها بغى ينط من مكانه وكلماتها مو قادره تطلع من فمها من الخرعه لما شافت الا قدامها : ي .. يبا .. يباا انت شتسوي هنا ؟
كان شكل الابو ما يشجع للنقاش وفهم اي شي منه .. مثل ما تقولون شبح اخر الليل.. ثوبه الا مكبوب عليه عصير او شي مثل جذي .. وغترته على كتفه وكأنه مجرم طالع من السجن ووجهه يخوف وشعره متناثر ..وابتسامته خبيثه وكان يطالع بشهد: هلا .. هلا ياحلوه ..
كانت كلماته مو متشابكه وحركاته تدل انه سكران
شهد وهي حاطه يدها على قلبها وتحاول تبتعد عن الباب او تسكره على وجهه ومو عارفه شبتسوي وقالت: ي..يبا انت شارب شي ؟
الابو وهي يحط رجله بيدخل البيت ويصقع بالباب: لا وشو تبيني اشرب بهالوقت الشرطه تمسكني وشفيك ياقمر خايفه ..
شهد وهي فاتحه عيونها وغيرت ملامح وجهها من خايفه لمعصبه : انا .. انا مو خايفه وبعدين انت ابوي والا نسيت؟.. يمكن من كثر ما تسكر !
كبرت خطوات الابو وهي يقرب من شهد ووجهه محمر من العصبيه ويلخبط بكلماته وعيونه تحددت من شده الا سمعه وقال: يا حقيره .. حقيره انا شريف .. ايه انا شريف وما عمري سكرت او مديت يدي على هالخرابيط.. وبعدين انا مو جاي هنا عشان اشوف وجهج ابي فلوس الايجار الا اخذتيهم.. ما وصل لي ولا فلس من المأجرين الشهر الا طاف وانا متدين وابي ارد الدين لخويي وينهم يا مهبوله ؟


شهد والدموع تخونها وتنزل بوسط مصايبها وحزنها وعصبيتها زادت وما قامت تتحمل تصرفات ابوها هالقذر داخل عليها نص الليل يبي فلوس من بنته ..وهو يدري انه ما عندها ولا فلس ..وقامت الدموع تطيح دمعه ورا الثانيه وهي تصارخ وجت بسرعه ودفعت ابوها من البيت
وطاح الابو على ظهره بره الباب وقالت: بعدين انت شلون جاي هنا مو انت ما تبيني ..؟
كمل معروفك ولا ابي اشوف وجهك وهالمره من صدق ..ولا تفكر انك تجي هنا خلاص انا ما ابييك ابو لي.. روح جيب لك بنت ثانيه مو كفايه الا سويته خلصني منك
وماودي ولا افكر اني اشوفك اطلع بره يا وصخ ..
وسكرت الباب بقوه ووقفت ورا الباب وقلبها يرجف وكانت علامات الغضب مبينه على وجهها ومسحت دموعها واستغفرت وصعدت لغرفتها وانسدحت عالسرير وهي معصبه وتفكر بأبوها .. وجاها النوم وغفت عينها ..


بعد ما مرت ليله امس دخلت الشمس من ستاره شهد بقوه وخلت شهد تحس ببدايه هاليوم وصراخ اولاد المأجرين خلى شهد تفكر انهها ما تحط ساعه تقومها ..الله يخليهم صراخهم منبهات ما يحتاج ..
كالعاده قامت شهد ولبست ملابسها وتاكدت من جدولها انه بالشنطه زي ما عدلته امس ومسكت شعرها بربطه صفرا حلوه ورفعته فوق وطبعا خصلاتها الناعمه لا اراديا تنزل وتغطي عينها اليمنى فمسكتها ببنسه صغيره (مشبك) وراحت وشربت لها حليب صافيو معلب.. ونزلت تنتظر الباص .. ووصل واخذها للمدرسه ..

بالفصل طبعا الحصص عاديه واخذوا بعض درووس وحصص ما اخذوا فيها شي..وبالحصه السابعه كانت فراغ والاستاذه ما ودها تعطيهم درس فخلت الفصل على راحته ..
قعدت شهد بكرسيها ونوره قدامها جالسه على الطاوله وتاكل حلاوه..
نوره : ويييع شفتي حصه العربي تو من وين جايبين هالاستاذه كانها طقت راجو واخوانه..
شهد وهي تضحك على تعليق نوره : ههههه اي والله بس حرام سمارها حلو مو ذاك الزود خايسه بس طيبه مو ؟
نوره وهي تمص حلاوتها : انتي كل الناس طيبين عندج.. والله مينونه ماعندج سالفه مو ليه ..
شهد وهي تطالع يمين وتأشر على زميلتهم حصه وتكلم نوره: اقولج مو كأن حصوو صارت مملوحه مدري شكلها مسويه شي بوجهاا !
نوره وهي تبتسم : اي والله تقول مسويه شد فوق خدودها والله فاضيه ..لا وازيدج من الشعر بيت خطبها ولد عمها..
شهد وهي تضحك : ههههههههه ما امداها توها صغيره ليه ما انتظرت للسنه الجايه على الاقل تدخل الجامعه ..
نوره وترفع حاجبها ومستصغره حصه : انتي استخفيتي هذي هي وخدودها ويه جامعات خليها ماعلينا .. ما اكون نويره اذا ما يابت درزن عيال وابتلشت فيهم وانا وياج نصير دكتورات..
شهد وهي بتموت ضحك : ولييه وانتي ويهج وجه دكتوره خليك قسم حاسب او اي شي مو دكتوره على طول ..
نوره وهي معصبه : ليه مو ماليه عينج مثلاً.. قومي بس بتصفر لمي عفشج خلينا نمر على مطعم مابي اركب الباص اليوم بتمشى ..
شهد وهي تشيل مقلمتها وتدخلها بالشنطه : ok .. وانا بعد مشتهيه شي اكله يالله مشينا ..

وهم بالطريق بيطلعون من المدرسه .. لفت انتباههم مجموعه بنات يتكلمون مع احد بس من الزحمه مو مبين مين نورره الملقوفه طبعا ودها تعرف شالسالفه : اقول شرايج ننتط عليهم ونشوف شنو صاير
..شهد:شالسالفه هناك.. تتوقعين هوشه ؟
نوره وهي تحاول تشوف وتقمز يمين وشمال:ماادري بس مو كأنها هوشه فيه شي متجمعين عليه بس مااقدر اشوف رؤوس البنات وايد ..
شهد وهي توخر عن نوره وتدخل بين البنات الا منهبلين ويصارخون ومدري شسالفتهم ويتداففون على الشي الا موجود ..
بعد مده قدرت شهد تقرب من ساحه الخبر المهم ..الا متجعين نص المدرسه عليه ..
بس فجأه لما قربت بالوسط وحده من البنات وراها متحمسه وتصارخ والا تدف شهد بالغلط ..وما تحس شهد الا وهي طايحه على وجهها وسبحان الله صارت بالنص .. شهد وهي تحك راسها وتتأفف : ياربي شنو انتي ماتشوفين !
فجأه سمعت صوت غريب ما كان بنت كان صوت صارم وحاد بس كان رقيق..
رفعت راسها والا تطالع الا كان قدامها واقف !
جينز وبلزه بيضاء وماسك مفتاح السياره.. وذاك الوجه الا اذا شافته اي بنت تقدر تقول انه نهايتها تموع بين ايدين
هالقمر .. ملامحه حلوه وكأنه مو من سكان الارض .. كان جسمه مشدود وحلو.. انسان انيق ووجهه شباب ومبين عليه الرجوله والشده .. ومبين عليه كشخه ..وشعره قصير ومرتب و خصله حلوه.. وكانت عيونه حاده بس ماكانت تغير من ملامحه الجذابه وخشمه (انفه) مستقيم وشاق ويهه ومحليه اكثر .. واهم شي الا ركزت عليه شهد ولفت انتباه الجميع .. واثار دهشتهم وخلتهم يحسون انه صاحب ذوق عالي ..
لما مد يده يبي يساعد شهد الا راحت فيها من هالانسان ..
ووجهها صار احمر وعيونها نزلت للارض لا اراديا وما كانت تقدر ترفعهم عشان لا تشوف هالشخص مره ثانيه ..
الشخص : تعورتي..؟


شهد وهي ترجع لجديتها وانوثتها وقامت على رجولها بدون اي مساعده ولفت وجهها ولا عطت الشخص انتباه .. شهد: لا وشكرا ..
الشخص استغرب من شخصيه شهد الا ما هزت كرامتها او حتى حاولت تهين نفسها وتمسك يده او تقبل اي مساعده منه
..فجأه وهو يبتسم ابتسامه خبيثه والكل لاحظها : لحظه يالاخت ..تعرفين وحده اسمها شهد محمد ؟!

وقفت شهد خطواتها الا كانت متجهه لنوره بساغراب بعد ما سمعت سؤاله ولفت وجهها وقالت : نعم؟ تكلمني ؟
الشخص وهو يحرك مفتاح السياره الا بيده وابتسم : اي .. تعرفينها ؟
شهد وبكل وثوق وكانت نوره جنبها وتشجعت شهد لان نوره كانت نظراتها قويه وتوحي بالتطمن لما تكون شهد جنبها وحطت يدها على خصرها وقالت : اي انا .. ليه شتبي ؟
ابتسم الشخص وقال وهو يقرب من شهد والكل لاحظ انه يبي يقول لها شي محد يسمعه غيرها وقال لها بصوت خفيف وهو منزل راسه بيسمع شهد: مو انا الا ابغى وحده تنتظرج وارسلتني اخذج معاي وتشوفج ..

شهد لاحظت المسافه الا بينهم كانت قريبه تضايقت شهد وبعدت شوي وقالت : مين هي .. وشو تبي فيني ؟
الشخص وهو ماله خلق يكمل النقاش معها : انتظرك بالسياره اذا تبين تعرفين اكثر .. اي وعلى فكره ترى معاي خادمه بالسياره يعني مايحتاج تخافين واذا تبين تاخذين معاج احد مافي مانع ..
شهد وهي معصبه : وبعدين.. يعني مين الا تبيني ..؟
الشخص وهو يركب السياره تبين تعرفين اركبي !
نوره هزت راسها وقالت بصوت خفيف وهي واثقه: روحي شوفي مدام وياه خدامه ما ينخاف منه.. ومبين عليه مو راعي سوالف ومايقدر يسوي شي والدنيا كلها حولج..
زادت كلمات نوره شهد قوه وشجاعه ولفت وجهها
وطالعت بالبنات الا متجمعين حولها وقالت وهي واثقه من نفسها وماراح يصير شي بعون الله وكان اكبر همها منو الا تبيها بس من داخلها شي ناقزها : طيب ..
فتحت الباب وركبت ورا بالسياره ..
نوره قالت من بعيد خلي جوالج مفتوح طبعا بالاشاره ومحد لاحظها .. وغمزت شهد لنوره موافقه على الخطه .. اخذت شهد نفس عميق وقالت بسم الله ..

كانت السياره سودا وفخمه ..كانت تدل على انسان شي وحركات وحدها انيقه وصاحبها ذا ذوقِ عالي مثل ما يقولون والا يركبها ماراح يسلم من الحساد ..
بعد مده والسياره تمشي بالطريق حوالي ربع ساعه كانت شهد ماسكه شنطتها والجوال بيدها وتطالع بالطريق الا يمرون فيه وحاسه انه في شي غلط وتوترت شوي وتطالع بجوانب السياره كانت مظلله ومافيها نور الا نور الشمس فرتبكت شوي بس كانت طبيعيه وملامحها ما تغيرت لحد الان على الاقل.. وتستغفر وتطالع بالخدامه الا جنبها..
وفقدت الصبر وقالت وهي مرتبكه : يع..يعني متى بنوصل ؟
الشخص تجاهلها بالبدايه وحس فيه ارتباك بصوتها وتعمد ما يرد وكمل السواقه وماعطاها اي اهتمام .. عصبت شهد من تجاهله وتوقعت منه انه كان متعمد وقالت له : انا اكلمك ليش تتصيمخ !
لف وجهه بسرعه على ورا وحط عينه بشكل حاد على عيون شهد الصغيره وهو يبتسم ابتسامه تدل عالراحه وغمز بعينه غمره خفيفه وقال: قريب مو مطولين ..
شهد تنرفزت وانقلب وجهها احمر وحست انه بدى يستهبل او من النوع الا ما تحبه وفقدت اعصابها وبدت تعلي صوتها وهي تكلمه : الحين شنو الا صاير انا مو فاهمه شي .. شلون انت تعرف اسمي؟
ومين قالك اني ادرس هناك .. وحاط لي ابو الهول جنبي ما كأنها انسانه حتى التنفس يمكن مره بالساعه تتنفس.. بس تدري شلون هذي غلطتي طاوعتك على بالي عندك شي والا ماكان ضروري اركب ويا واحد مااعرف من وين جاي..
ابتسم الشخص على تعليقها بس غير ابتسامته لما سمع كلماتها الاخيره بس كان مو باين عليه انه معطي شهد اهتمام ..
وقال: تقدرين تناديني ياسر .. والاشياء الثانيه بتعرفينها لما نوصل ..
شهد وهي متنرفزه وكان الخوف مصير قلبها وماسكه نفسها من انها تنهار او تبين انها خايفه: وانا شبي باسمك ..تدري شلوون .. وقف السياره ابي انزل .. وقف السياره ..
ياسر وبدا الوضع يضايقه بس كان محافظ على توازن كلماته وكان واثق من كل كلمه يقولها وبصوت رجولي قال: قريب بنوصل ..
شهد وهي خايفه والوسواس قام يدور براسها وعرفت انها غلطت لما ركبت وياه وبنفس الوقت معصبه لانها حست انه يبي يخليها تصيح او تبين انها خايفه منه : انا اتكلم عربي ماابي اعرف شي خلاص.. وقف السياره ردني للمدرسه وين موديني خلاص مابي اروح مكان غير البيت
.. لو سمحت وقف السياره !!
ياسر وهو يبتسم ابتسامه خبيثه تدل على شي براسه : بتوقف السياره لما نوصل للمكان ..

شهد وهي حابسه دموعها وماكانت تتوقع راح يصير كذا : قل.. قلت لك وقف السياره ابي ارجع للبيت واي مكان الا تتكلم عنه وشو تخربط انت.. وقف السياره وقفهاا
ونزلت دموعها الا كانت حابستها من اول ما ركبت وقامت تنوح وتصيح مثل الاطفال : ابي ارجع .. لا خلاص ماابي اعرف رجعني للبيت .. ماابي الله يخليك ابي ارجع مابي الله يخليك مابي منك شي ودني البيت ..
فجأه وقف ياسر السياره ومبين عليه الرجوله ونزل منها وهو معصب وماله خلق صياح وفتح باب شهد وقال لها وهو يصارخ: يالله انزلي ورينا بتوصليين للبيت ..
وخرت شهد يدينها عن عيونها الا كانت مليانه دموع وتطالع حولها.. كان شارع وبالجوانب شويه تراب توحي انهم بعدوا عن الشارع العام وبيروحون مكان داخل البر او مكان شبه معزول عن العالم ..
عصبت شهد ومسكت شنطتها وكأنها طلعت كل حره الايام والحزن والا كان بقلبها ورمت الشنطه على وجه ياسر وقالت له بصراخ : انت وين موديني ماكو احد هني شلون برجع للبيت وقح حقير غبي .. مجنون ..رجعني البيت الحين ..الحين .. رجعني لااا.. رجعني.. ابي ارجع للبيت !​

​

ببيت الخاله ابتسام ..بالتحديد الكرسيين الا يطلون على الدور الا تحت ..
شهد وهي واقفه ومستغربه من الا قاله ياسر وهي تقول مره ثانيه: امي ؟! بش شلون ومن متى هالوصيه .. وليه مالي خبر فيها ؟
ابتسم ياسر ابتسامه خفيفه وكأنه شهد قاطعته وهو يتكلم بالسالفه ..حست شهد انه سكوتها تبرأ منها بهاللحظه .. جلست شهد وهي مستحيه ونزلت راسها وقالت : اسفه قاطعتك ..ايه كمل سالفه الوصيه ..ياسر وهو يكمل: بعد ماشفت خالتج امس تبجي ..جلست جنبها وانا اسالها .. وقالت لي عن الوصيه وانها لازم تنفذها لانها ماتضمن حياتها بعد عمر طويل انشاء الله .. وعمليتها مو هينه الله يعافيها .. شهد وهي زعلانه: اامين ..طيب الحين ماقلت لي شنو مكتوب بالوصيه ؟
رفع ياسر راسه وقال:امج ماكانت توثق بابوج باخر ايامها الله يرحمها كان دايم يضربها وراعي سوالف وكان حتى قليل يتواجد بالبيت..فعشان جذي كتبت بالوصيه انه خالتج ابتسام تربيج مع عيالها وماتخلي احد يضرج او يضايقج ..بس الوصيه كانت موجوده عند خوالج وخالتج ابتسام ماكانت تدري فيها ابداا..وكتبت امج انها حاطه لج مبلغ بالنك يكفيج تعيشين حياه بدون تدخل ابوج .. وشرطت انج لازم تكونين مع خالتج وعيالها ..
وللاسف امس خالتج لما قرت الوصيه انصدمت لانها خلتج كل هالسنين مع ابوج وتعذيبه ..
قاطعت شهد ياسر ودموعها تنزل وهي ماتدري ..وبسرعه قالت:انا ما احتاج احد ..خلاص انا افهم وعاقله واقدر اعيش بحالي وماني ناقصه اي مشاكل بحياتي للان فيني الا مكفيني ...
وبعد ماسكتت شوي وهي تمسح دموعها بكم مريولها: لو سمحت ابي ارجع البيت وسلم لي على خالتي ..
ياسر وهو مقدر وضع شهد وما قدر يجادلها بهالموضوع وقال لها بصوت خشن شوي: طيب يالله نروح...

نرجع للاوضاع ببيت نوره..بس قبل هذا كله راح نوضح خلفيه حلوه لنوره وعائلتها ..نوره بنت مهبوله.. مو شكلا بس طبعها سريع وتصرفاتها تصرفات صغار مع انه شكلها ووجهها يوحي بالهدوء .. اما عن امها فهي ربه بيت ..وابوها محامي معروف بالكويت وناجح بعمله ولله الحمد ..
(عبد الرحمن) اخو نوره الكبير بثالث جامعه قسم علوم طبيه ..يحب نوره وايد ويحسها اقرب اخوانه له ..حتى اقرب من ابوه ودايم يدلعها (غناتي)..وآخر العنقود( حمد) اذكى واحد بالعائله عمره 10 سنوات.. ونبيه لكل شي ويحب يحقق ويحوس مع الناس ومايحب احد ينادينه او يحسسه انه صغير ويكون غالبا مع الا اكبر منه ودايم يراقب نوره وعبد الرحمن وعلى اصغر الاشياء يقول لامه كل الا يصير بالبيت ..
كانت نوره جالسه بغرفتها وحاطه الهيدفون(السماعات) وتسمع بالاب توب والسيديات منثره بكل مكان وغرفتها حوسه حدها .. دخل عبد الرحمن وهو يضحك على شكل نوره منسدحه عالسرير وشعرها كشه بس كانت كول بجميع احوالها :انتي هييي .. تسمعيني ؟
فتحت نوره الهيدفون وقالت: نعم انت ليش تدخل وما تطق الباب يمكن انا عندي شي خاص مابيك تشوفه ..
عبد الرحمن وهو يضحك: ليش انا قصرت مثلا.. انكسرت ايدي وانتي ماحسيتي ..
نوره وهي تصرف ومالها خلق:اييه .. المهم ادخل بالموضوع بدون مقدمات.. عبد الرحمن: اوف شكلج بتطرديني الحين .. ماعلينا المهم امي تقولج اعزمي شهد صديقتج عندنا باجر من زمان ماشافتها ..
نوره وهي تطنش الموضوع وقالت مع نفسها:هي خل ترد بالاول .. قالت وهي تدف عبد الرحمن بره غرفتها: المهم قول لامي اني بقولها تيي.. يالله مع السلامه ..
وسكرت الباب وراحت على طول لسريرها وهي تقول بصوت حزين :وينج ياشهد ..

لما اذن العصر ..كانت توها شهد توصل للبيت ولما جت بتطلع من السياره ..مد يده ياسر ومسك شنطه شهد قبل لا تطلع ..حست شهد فيه ولفت وجهها وهي مستحيه: شنو ؟ ..تبي شي ؟
ابتسم ياسر ابتسامه حلوه وقال: لا ابد .. بس كنت بذكرج بشي.. انه خالتج حالتها الصحيه ما تسمح لصدمات حاده .. فأنصحج تكونين معاها بالهوقت الصعب مثل ماكانت هي مع امج وضحت بحياتها وتربيه عيالها وكانت ويا امج والحين هي تبيج تكونين بحضنها ..
وودها باسرع وقت تسوي عمليتها وترجع وتشوفج ببيتها ..فكري زين الخيار لج بس اختيارج بيكون سبب لموت احد او بيكون سبب لسعاده احد ..
طلعت شهد من السياره وكلمات ياسر تتردد بافكارها .. هبت نسمه خفيفه ولفت شهد وجهها وقالت: مثل ماقلت لازم افكر وانا احتاج وقت .. واهتمامك بخالتي شي حلو بس خلك بعيد عن عايلتنا..
ياسر وهو يبتسم: حلو ..عندج بكره وبعده ..وانا بكون هنا بعد يومين عند باب بيتكم بالوقت الا حددته ..شهد وبستغراب:ومنو انت عشان تنتظرني وبعدين انا اقدر اوصل لكم بأي طريقه بعد يومين ..
ابتسم ياسر ابتسامه ولبس نظاراته الشمسيه وقال:انا اسوي واجبي لبنت خالتي الحلوه ..وعلى فكره لون شنطتج عاجبني..وسكر شباك السياره وقال لها:تشاوز ..وراح ..
الصدمه كانت بوجه شهد وانقلب لونه احمر وهي تكلم نفسها:ياسر ولد خالتي ابتسام !!
قطع افكارها صوت الاقامه بالمسجد وقال وهي تدخل البيت: يوو نسيت اصلي ..!
دخلت شهد غرفتها وغيرت ملابسها واتجهت للحمام وتوضت ..وبدأت تصلي .. وبعد ماخلصت كان اهتمامها الوحيد انها ترتاح وتنام ..
ورمت نفسها على السرير وضمت المخده وقالت مع نفسها وهي محتاره: ياربي شهالمشكله انا شسوي ..اذا مارحت بخسر خالتي وحبها وعيب علي اني ما اكون معاها مثل ماكانت مع امي وقاومت كل خوالي عشان امي ..بس اذا رحت هناك .. ما راح اقدر اتكيف مع الوضع ..ويمكن عيال خالتي يضايقهم تواجدي وياهم ..
ياربي تساعدني انا مالي غيرك.. سهل علي ..
واستسلمت شهد بعد هالافكار واليوم الصعب للنوم العميق ..


لما اشرقت الشمس باليوم التالي ..بالتحديد الساعه 6 الصبح وببيت نوره ..
جا ابو نوره وهو يفتح باب غرفتها ودخل بهدوء وجلس عند حافه سريرها ..نوره نايمه بعمق وفاتحه فمها وتتقلب ..فجأه حست انه في شي برجلها يدغدغها ..وقامت تتحرك وتحاول تشيل هالشي برجلها الثانيه..ولما ماقدرت عصبت وقامت وقال:يووو وشو هذا ..ولما شافت ابوها قدامها استغربت ..كان هو الا يدغدغها ويبيها تقوم عشان المدرسه ..ابتسم نوره وقالت:صباح الخير يا احلى ابو ..
ابو نوره وهو يبادلها الابتسامه :صباح الورد يا احلى الورد ..وقام من السرير وهو يقول :يالله بابا امج مجهزه الفطور تجهزي وانزلي ..
وطلع وسكر الغرفه .. قامت نوره وهي تتمغط بيدينها وراحت للحمام ..وبعدها لبست ملابسها ونزلت لطاوله الاكل ..لقت عبد الرحمن وحمد موجودين ..نوره وهي مسرعه لكرسيها:صباحو جميعا ً..رد عبد الرحمن وهو يبتسم:صباحو غناتي ..
حمد وهو معصب: ماما ..وين الكورن فليكس انا جوعان؟! عبد الرحمن وهو يحط يده على الطاوله ويحرك ملعقته الا بالحليب:مخلص اخر مره شفت علبته بالزباله ..حمد :لالا امس ابوي اشترى جديد ..
الام وهي تجي من المطبخ وبيدها علبه الكورن فليكس:هذا هو الجديد تفضل يا أمور .. قلب حمد وجهه وهو معصب: يماا ..انا مو أمور انا حمد ..
ابتسمت نوره وعبد الرحمن والام وهي تضحك: خلاص ولا تزعل.. يا حمد ..^^ ..
وبعد مده مو طويله وصل الباص لبيت نوره وركبت نوره ..ووصلت للمدرسه
مسكت شنطتها الخفيفه ووقفت عند العمود الا دايم هي وشهد يتفسحون فيه وهي متحمسه تتكلم مع شهد وتفهم الا صاير..
بعد مده من وصولها حوالي دقيقتين طالعت نوره ساعتها وهي تقول مع نفسها:يااربي تأخرت شهيدو وينها ..
وجلست تنتظر وتنتظر وهي على اعصابها وحدها متحمسه ..الى ان صفرت وبدأت الطالبات يروحون فصولهم ..
نوره للان جالسه وتنتظر شهد ..وبدا عدد البنات يقل بالساحه والكل يروح فصله ..وجت الاستاذه المصريه من وراء نوره وقالت:يالله للفصل يابنت.. قلبت نوره وجههاى وقالت: حاضر استاذه ..
دخلت نوره للفصل ووجهها معبس وزعلانه لأن شهد ماجت للان ويمكن تغيب اليوم وهي ماعلمت نوره ..
حطت شنطتها تحت الطاوله وجلست عالكرسي وهي تمد رجولها و لحالها ومتضايقه وتطالع كرسي شهد الفاضي وهي تحاتيها وتقول مع نفسها: ياربي وينج ؟ !
..وبعد مده جت الاستاذه وبدأو البنات يطلعون كتبهم وبدأت الاستاذه الدرس ..

ببيت شهد تحديدا غرفتها الساعه 9 ونص الفجر..كانت مسكره الستاره وجالسه بظلمه الغرفه المخيفه ..
ومنسدحه على ظهرها بالسرير وعيونها تدمع دموع ماكانت حزم او فرح كانت دموع حيره وودها تشرح لاي احد احساسها ومشاعرها الا كاتمتها من زمن وودها احد يسمعها ..وهي تطالع سقف الغرفه وتمسح دموعها وتقول مع نفسها:ليت عندي شي املكه وغالي علي وما افارقه ابد .. وسكتت شوي ..وكملت كلامها وهي تقول: مثل ام ..ابو ..اخوان ..خوات..
ماطلبت شي مستحيل بس ماراح يتحقق انا عارفه ..مثل نوره ..وبنات المدرسه ..ابي احد يحسسني بالحب ..او الامان ..شي يفهمني قبل لا اتكلم

..شي يحبني ~


نرجع للمدرسه بالحصه السابعه قبل الطلعه : كانت استاذه الرياضيات تحدد الواجب للطالبات بعد ماخلصت شرح ..نوره جالسه بمكانها ومتضايقه وترسم عالطاوله حرف s ..
بعد ماطلعت الاستاذه و هي تقول: محد يطلع من الفصل الا لما تصفر ..من بعيد كانت حصه الغثيثه وصديقاتها رحاب ودانه يتكلمون عن شهد وكان صوتهم مسموع بالنسبه لنوره..
حصه:شفتوها امس مدري شكلها انهبلت.. راحت وركبت مع البوي الكشخه ..رحاب وهي تضحك بصوت عالي:ههههه يمكن حبيبها هههههههه..دانه بنحاسه وتبي نوره تسمع: اسألو نوره تعرف مين هو ..
نوره بعصبيه وهي كانت سامعه كل كلمه .. ووقفت من كرسيها وهي شايله شنطتها وقالت: ما اسمح لكم تتكلمون جذي عن شهد واصلا هي شريفه وماعندها هالحركات ..والا امس كان قريبها على فكره ..
حصه وهي تبتسم: طيب فهمينها وانتي هاديه.. وشو فيج صرتي كأنج بركان وانفجر..
نوره وهي تطالعهم بنص عين:استغفر الله ..صج من قال كل من يرى الناس بعين طبعه ..
وصفرت الحصه وطلعوا البنات ..وطلعت نوره اولهم

بعد ما وصلوا البنات للشارع وكل وحده تنتظر اهلها او السواق وبعضهم بالباص ..
ماكانت نوره مشتهيه تركب الباص وكانت متضايقه وبهاللحظه كرهت نفسها ..بعد ماسمعت البنات الا تكرههم يتشمتون بأعز صديقاتها..حطت يدينها بجيبها
..استسلمت وقامت تتمشى من الطفش ..كان بيتهم مو مره بعيد عن المدرسه واكثر الاحيان كان عادي عندها تتمشى عشان توصل للبيت ..
كان الشارع هدوء .. كالعاده المحلات مفتوحه وكانت نوره تتلفت وتطالع الناس ..الخباز يترزق الله ويبيع الخبز عالناس .. والعمال يشتغلون .. وبالمطاعم زوجين سعيدين بحياتهم والرجال يوكل زوجته من ايده الاكل والابتسامه مرسومه على وجوههم وكأنهم يبون يوصلون للناس ( احنا سعيدين) ..

رفعت نوره راسها وهي تتمشى وتطالع السما ..كان الجو جداا حلو ونسمات الهوا خفيفه ..
الصيف قرب ينتهي وآثار الخريف بدت تطلع ..
الشمس مو حاره وايد كانت حلوه ..شافت نوره سرب من الحمام كان جاي من فوق عماره منظره كان خلاب وجميل مثل الافلام ..كأنه احد كان حابس هالحمام وصعد فوق بالعماره وفتح عليهم القفص وطاروا بحريه وبسرعه وكانهم يعيشون من جد وجديد ..ابتسمت نوره للمنظر ..

كانت الحياه بنظره نوره حلوه وكانت عارفه انه في يوم بيجيها يضيق خلقها وتتمنى شي يفرحها مثل اليوم ..ويوم بيكون حلو وبيفرجها الله ..مثل ماهي تنتظر هاليوم وتتمنى تكون شهد بخير واحساسها ما يخطأ..
فجأه وهي رافعه راسها .. ما تحس الا وكأنها صادمه بشي قوي ..
مدري هي ماحست او انها كانت سرحانه مع افكارها ..لما نزلت راسها كانت صادمه برجال كان مشبوه لها ..
طالعته نوره وهي مستغربه وقالت بصوت خفيف:انت؟!
قال الشخص: اهلين نوره ..حبيت اتكلم وياج اذا ماعندج اي مانع ..
مسكت نوره شنطتها وقالت وهي تبتعد شوي: انا ماعندي كلام معاك ..
وبعدت عن الطريق وراحت من الجهه الثانيه.. فجأه مسكها الشخص من طرف يدها ..لفت وججها وبعدت يدها بسرعه وقالت :انت شفيك .. شلون تتجرأ تمسكني قلت لك انا ماعندي كلام وياك ..ماتفهم !
عيون الشخص كانت توحي انه يبي يكلم نوره بموضوع مهم ..طالعته نوره وقالت وهي مستغربه:شفيك تطالعني جذي ؟
قال الشخص بصوت خشن :انا لازم اتكلم وياج ..لو سمحتي .. ​

بين نسمات الهواء الخفيفه ..كانت نوره واقفه وتتأمل الشخص بوجه مستغرب..قال لها بصوت حاد:انا لازم اكلمج .. بعد ما حست انه في موضوع غريب وانه وقفتهم غلط بالشارع..عرفت تتصرف بهالموقف وقالت وهي تتوجه لجهه المطعم العام: طيب تراني اسمع فهمت انك بتكلمني..بس موحلوه نتكلم هنا تعال نشرب اي شي وقول الا تبيه ..
جلست نوره وحطت شنطتها ورا الكرسي وحطت رجل على رجل وقالت وكأنها مالها خلق تشوف خلقه هالشخص :طيب اجلس ليش واقف مو عندك شي مهم..الشخص وهو يبتسم ابتسامه جذابه وفصخ نظارته الشمسيه وقال بوثوق:ايه ..طبعا انا بجلس ..
نوره بوجه عبيط وتستغبي قالت :لالا ..بلييز حطمتني اموت على عيونك انا ..
الشخص وهو يبتسم وقال: انتي ماشفتييني لما اوقف بالشمس عيوني تصير زرق ..نوره ومالها خلق تتهاوش: اوه منك ..انت فاضي انا ماعندي وقت اهلي بيحاتوني اذا تأخرت عنهم قول الا عندك وخلصني..قال الشخص وهو بيبدأ الحوار وقال:اولا بعرفج انا ياسر ..نوره وبكل سخافه:ادري الا سرقت صديقتي ..ياسر وهو يستغبي:سرقتها .. ومين قال هذي هي ببيتهم .. نوره وهي تعدل جلستها:اصلا هي من بعد ماشافت خلقتك ..انا ماشفتها ولما ادق عليها ماترد ..ياسر وهو مستغرب: يعني ماجت للمدرسه اليوم؟
نوره وهي متضايقه: لا ما جت ..اصلا هي متغيره من بعد ماشافتك شسويت لها انت ..شكلك ضايقتها وجاي تكمل هبالك علي انا مو ناقصه ..قامت نوره من الطاوله واخذت شنطتها..مد ياسر يده ومسك شعر نوره الطويل الا كانت فاتحته.. لفت نوره وجهها وقالت: هيي انت هد شعري صار لي ساعه امشطه الصبح ..ياسر وهو يبتسم: طيب انتي وافقتي تسمعين الا بقوله ..ها انتي رحتي قبل لا ابدا بشي ..
نوره وهي تستسلم للأمر الواقع :هففف ..طيب بسمعك بس قول الا عندك باختصار ..
ياسر وهو يفرد جسمه ويرتاح بجلسته وقال بصوت رجولي: ماتبين نطلب شي ..نوره بعصبيه :اوهوو انت شنو انسان والا قرد ماتفهم ترى طلعت لي قرون ..انا قلت لك اختصر ومابي اشرب شي وياك ..
ياسر وهو يضحك:طيب شفيج عصبتي ببدأ بالسالفه خلاص ..
نوره: عدل ..جذي نقدر نتفاهم ..قول .. ياسر وهو يتكلم: انا اعرف انج صديقه شهد العزيزه وما تقدر تفارقج ابد ..وتقدرين تأثرين عليها بسرعه وهي تثق فيج اكيد وتدري انه اختياراتج دايم بتكون خير لها بعون الله ..
نوره : اكيد انا احب شهد وما ارضى الا الخير لها ..ياسر: انا داري وعارف ..بس بغيت منج شغله انا بقولج تفاصيلها وابيج تقنعين شهد فيها..
نوره وهي مستغربه :اذا الشغله كانت لمصلحه شهد اكيد بقنعها بس انا ما اوعدك الا لما اعرف شنو هي ..
ياسر : تمام للحين احنا متفقين ..انا بقولج .. قبل ايام وصلت لامي وصيه ..وامي تصير خاله شهد يعني هي بنت خالتي .. وامي لما قرت الوصيه كانت من ام شهد قبل لا تتوفى الله يرحمها .. وكان فيها انه امي تربي شهد بعد عين خالتي .. وكانت امها معارضه انه شهد تكون مع ابوها .. وامي تبي شهد باجر تجيب اغراضها وتعيش عندها .. لان امي باجر بتروح تسوي عمليه خطره بره الكويت .. وتبي تتطمن انها نفذت الوصيه وانتي تعرفين لازم تتنفذ وصيه الميت .. وامي خايفه انها تتوفى بعد عمر طويل بالعمليه ..وامنتني اني ما ارد للبيت باجر الا وياي شهد واغراضها ..
نوره وهي تقاطعه: سوري قاطعتك .. بس شهد تدري ؟ .. ياسر: اي تدري وانا عطيتها اليوم وباجر تفكر وانا خايف انها ما توافق ..وامي ماراح ترضى علي ووصيه خالتي ماتنفذت ..
نوره وهي تهمهم وتفكر: همممم... خلني اتكتك السالفه .. انت تبيني اقول لشهد واقنعها انها تعيش ببيت خالتها ..ياسر وهو يبتسم: بالضبط..
فجأه اتصل جوال نوره وقطع الحوار..فتحت نوره شنطتها وردت: الو .. هلا يما .. اي اي انا قاعده مع وحده زميله .. طيب برد الحين ..يالله باي ..
نوره وهي تمسك شنطتها وتوقف وهي مبتسمه: اوك انا ماراح اقدر اطول.. انا بتولى السالفه بس لا تصدق عمرك عاد ترى مو عشانك بس لمصلحه شهد بقنعها ..وغمزت غمزه خفيفه ..وراحت مسرعه..
ابتسم ياسر وقال: مجنونه ..

ببيت نوره .. وصلت نوره للبيت وتغدت ..الحين الساعه 3 العصر قبل الاذان ..
كانت نوره جالسه بالصاله وحمد وعبد الرحمن يلعبون ورق ..
صرخ حمد وهو معصب: غشششش .. انت غشاش كله تفوز مايصير غش ..ضحك عبد الرحمن وقال: اييه الحين غش وتو لما فزت اشوفك فزت بالعدل والا بالغش ..
قام حمد معصب ..ووقف على طوله .. كان بوي كيوت حده شعره بني غامق على اشقر.. وهو قصير وهذا احلى مافيه عيونه كبار وحاط بريسز ( تقويم اسنان) ونحيف ..كان لابس شورت اصفر وبلوزه عليها بباي رجل البحار لونها اصفر نص كم ..كان بالنسبه للكل (sweet boy) .. صرخ حمد وهو يقول: طيب انا اراويك .. تقول عني غشاش والله لاعلم امي عن الا امس .. قام عبد الرحمن وقال: حمييييد شرايك تسكت وخلنا نكمل اللعب ..
نوره وتطالع فيهم وتبتسم بخباثه وهي حاطه الكوشايه بحضنها وجالسه على الكنيه وقالت: اييه صرف الموضوع .. شنو الا امس ..
عبد الرحمن وهو معصب : اقول مالت عليكم انتوا واللعبه .. اذا سأل ابوي عني قولوا راح ويا نواف.. وطلع من الباب وقال: يالله باي ..
كان عبد الرحمن معصب وماله خلق.. شاب مملوح وقلبه ابيض وهذا احسن مافيه .. ويحب اخوانه وايد ولا يسمح لاحد يضايقهم..وجهه بيضاوي الشكل ولون وجهه قمحي فاتح.. شعره ناعم بس قصير يحب يلبس ثوب وغتره ..انسان نظيف وانيق وتحس له هيبه لما يمشي ..
والكل يحبه ويعتبرونه اليد اليمين لهم ..

بعد دقايق صعدت نوره لغرفه امها وابوها ..لقت امها موجوده وجالسه ترتب التسريحه ..وابوها كان طالع للعمل ..نوره قالت بهدوء: هلا يماا ..الام بحنان: هلا حبيبتي ..نوره : يما عادي اروح لبيت شهد ؟ ..الام: خير انشاء الله ..شهد فيها شي ؟ ..نوره: لالا بس اليوم غايبه بروح اشوفها واتطمن عليها .. الام: زين ماتسوين .. وسلمي عليها .. نوره: مشكوره يما .. اوك بوصل سلامج ..وطلعت من الغرفه بسرعه وراحت تجهز نفسها..

ببيت الخاله ابتسام ..
كانت فاطمه الصغيره بالمطبخ جالسه تلحس ملعقه الشوكولاته بعد ماخلصت الخدامه من عجينه الكيك..
ياسر يمد يدينه ويتمغط ويتثاوب وهو جاي للمطبخ : الحلوه شتسوي ؟ ..فاطمه بابتسامه عريضه :قاعده الحس ملعقه الشوكولاته .. ميري تسوي كيكه تبي تذوق؟
ياسر وهو يفتح فمه وينزل جسمه عشان يصير قريب من فاطمه ..مدت فاطمه يدها وخلته يلحس الا باقي من الشكولاته بالملعقه .. طالع ياسر فاطمه .. وابتسموا لبعض ..
كانت فطوم بنوته صغنونه ودلوعه جسمها صغنون وملامح وجهها حلوه عيونها عاديه ..ورموشها كثيره ولما تبتسم يطلع فيها غمازات صغيره عند فمها .. شعرها ناعم ويوصل لكتفها لونه بني غامق على اسود..اخوها الوحيد ياسر ودايم تحب تكون وياه وتسمع كلامه بكل صغيره وكبيره ..
بعد ماطلع ياسر من المطبخ وهو يمسح بقايا الشكولاه من اطراف فمه ..صعد لغرفه امه ولقاها جالسه تقرا قرآن ..
حست فيه ابتسام وسكرت القرآن وقالت: صدق الله العظيم .. تفضل يا وليدي ..
جلس ياسر على طرف السرير وهو يبتسم ابتسامه هادئه: شخبارج الحين يالغاليه .. ابتسمت ابتسام: بخير يا وليدي .. ماقلت لي بتجي شهد بكره ؟
قام ياسر من طرف السرير وقرب من امه ومسك يدها وقال: يالغاليه انا مو بس اجيب شهد .. اذا بغيتي القمر اجيبه لج ..
ابتسمت ابتسام ودمعت عيونها دمعات خفيفه : يابعد قلبي ..حط ياسر يده على عيون امه ومسح الدموع قبل لا تنزل على خدها وقال: ماحب اشوفج تبجين .. بتروحين تسوين العمليه وترجعين انشاء الله وبتكون شهد هنا وكل الا تبينه يصير .. بس لا تبجين ..
ابتسمت ابتسام بهدوء وقالت: انشاء الله ..

اما بالنسبه لنوره ...
بعد مالبست نوره ملابسها .. وراحت لشهد ووصلت للبيت ..دخلتها شهد وجلسوا بغرفه شهد ..
كان هدوء وكلهم ساكتين ..قالت نوره وهي تبتسم: اليوم تعبانه ؟ ..شهد : لا عادي .. نوره : طيب ليش غايبه وماقلتي لي ؟ ..
شهد وهي تلف وجهها : كان ضايق خلقي ونسيت ادق عليج ... نوره : اها .. شهد وهي تبتسم ابتسامه صغيره: اسفه لاني ما قلت لج ..نوره وهي تضحك : ههههه .. لا عادي انتي شايله همي ..ياحظي ..شهد بوجه عبيط: اكيد مو شايله همج .. بس شايله هم بنات الفصل اكيد هبلتيهم ..نوره وهي تضحك: وييه ..حدج فاضيه ..
شهد وهي تقوم: ماقلتي شتشربين ؟ ..نوره : اقعدي بس .. انا ماجايه اشرب شي ..عندي موضوع بكلمج فيه ..
شهد وهي تقعد ومستغربه : موضوع ! ..عسى ما شر ؟
نوره : ماشر بس كنت بكلمج عن موضوع خالتج ..شهد وهي تقلب وجهها : اي موضوع مافي شي عشان نقوله ..نوره : وروحه البيت ماهي موضوع ؟
شهد وهي متضايقه ووقفت : اي روحه .. ومين الا بيروح ..؟ .. نوره وهي تبتسم: لا تتغيشمين (تستغبين) ..انتي بكره بتروحين بيت خالتج وتعيشين هناك فهمتي .. شهد وهي تبي تطلع من الغرفه: اصلا مين قال اني بعيش هناك .. ماراح استقر هناك مااقدر.. نوره وقفت ومسكت يد شهد وطالعتها بنظره انسانه عاقله : احلفي لي انج مستقره هني ؟ ..شهد نزلت عيونها بالارض: انا .. انا ... وسكتت.. نوره وهي تبتسم: شرايج اقول انه السكوت علامه الرضى .. شهد وهي مستسلمه: نوره انتي ماراح .. وقاطعتها نوره: انتي جربي هذي وصيه امج ومو زين ماتتنفذ وخالتج تبيج تعيشين عندها خلاص ماعندج حل .. يالله جهزي اغراضج باجر بتروحين ..
شهد نزلت راسها وقالت: طيب .. انا بروح عشان خاطرج وعشان ما اضايق امي بقبرها وراح انفذ الوصيه بس اذا ما ارتحت برجع هني ..​

​

اليوم التالي ..
قامت شهد مسرعه من السرير .. شافت الساعه 6 ونص .. بسرعه لبست ملابسها .. ونزلت تتنظر الباص يوصل ..
بعد مده مو طويله ..لاحظت شهد انه اولاد الجيران مالهم صوت او حتى المأجرين..
وانه الباص تأخر .. قالت يمكن ساعتي خربانه بروح اتأكد .. وصعدت غرفتها وشافت انه الساعه صح ..ولفت انتباها على الطرف التقويم ..والا تشوف انه اليوم الجمعه .. ( معلومه / عطله الكويت الجمعه والسبت) وانسدحت عالسرير وقامت تضحك على روحها وقالت مع نفسها: وييه لو انا رايحه المدرسه لحالي والله نكته كشخه ..
غيرت ملابسها ولبست بجامتها ..وفتحت القرآن وقرت لها نص ساعه .. وبعدها حست بالزهق وفتحت الاب توب حقها ..ودخلت المسن وتطالع مين اون لاين عندها ..وقعدت تحوس بالمواقع .. وانسدحت على ظهرها وفجأه رن الجوال من تحت الغطا .. وردت شهد: الو .. ومحد يتكلم ... شهد بعصبيه: الوو مين ؟؟ .. وتسكر الخط بوجه شهد .. شهد باستغراب: منو هذا الا بيدق الحين لا والرقم غريب بعد ..المهم ماعلي بروح اخذ لي شور اصحصح فيه ..

اما ببيت نوره الساعه 9 ونص الصبح ..
نوره تصارخ ومعاها الكوشايه .. ومن الجهه الثانيه حمد المشاغب يركض ومعاه جوال نوره وياه ( طبعا سارقه) نوره وهي تركض وراه: يادب ياسراق بترجعه والا شنو ؟ .. حمد وهو يضحك ويكمل ركض: مااني مرجعه الا وتعلميني منو الولد الا كنتي تكلمينه .. نوره ووقفت وصرخت: حميدووووووو .. رد الجوال لا اشنقك ..
ومن الجهه الثانيه عبد الرحمن توه يقوم من النوم ويطلع من غرفته وهو يحك شعره ويتثاوب.. ولابس بجامه بيضه .. بلوزه حفر مع بنطلون البجامه ابيض وفيه دوائر زرق .. وهو يتثاوب: يعني الانسان بهالبيت مايعرف ينام ؟ .. نوره شوي وبتصيح وبوجه برئ: دحوم .. شوفه اخذ جوالي على باله اغازل والله الرجال امس دق علي بالغلط..وهو بيقول لابوي وامي اني اغازل وبيتهمني وانا مظلومه >_<..
دحوم ويسوي روحه بطل ويجي صوب حمد: اقول رد الجوال انت ليش ملقوف ؟ .. حمد عدل وقفته وحط يده على خصره: اقول وانت شدخلك .. روح الله يرحم والديك غير بجامتك النوم كأنك جحا ..والا واحد من الاقزام السبعه ..لف عبد الرحمن وجهه على نوره وهو بيروح للحمام: مافي امل غناتي .. انتي استرجعيه بطريقه ثانيه .. انا بروح اغسل ..
نوره وهي بتصيح: ياربي ..حمييد رده لي ..
فجأه رن الجرس .. نوره بعصبيه اتجهت ترد .. رفعت السماعه وسكتت ..فجأه قال الشخص وكان رجال : مين ؟ .. قالت نوره بسرعه : انا نوره ..
طلع عبد الرحمن من الحمام وهو ينشف وجهه : لا كملي اسمج ياذكيه ..
وسحب السماعه وقال: مين .. قال الشخص: انا عبد الحليم جايب اوراق للعم ناصر .. قال عبد الرحمن: اوك انا نازل اخذهم .. وسكر السماعه وطالع نوره وقال بسخافه وهو يقلد صوتها: انا نوره .. ضحك حمد على تعليقه وبدأ يركض مره ثانيه .. ونوره بعصبيه: اوهووووو وبعدين يعني .. ردوا لي جوالي !!!!


وبعد صلاه الظهر والخطبتين ..
نرجع لشهد الا كانت تتصل على المطعم .. شهد: اي اي تشيكن فرايز وياه .. اي رقم الاشتراك 890 .. وسكرت الخط ..
راحت شهد تطلع لها فلوس من بوكها ..طلعت شهد الفلوس وقالت مع نفسها: ياربي المصروف بيخلص والشهر مطول , ومحد ارسل لي فلوس شسوي ! ..لازم ما اشتري كل شي بحاول اقلل انشاء الله ..
فجأه زن الجرس .. قالت شهد: غريبه برجر كينج مو بهالسرعه يوصلون نازل عليهم الوحي اليوم خخخخ ..
وراحت صوب الباب .. ولما فتحته .. تفاجأت اول شي بعدين قالت بصوت مرتبك: انت .. انت شتسوي هني ؟ ..كان الشخص ياسر .. ابتسم وقال: هذي الضيافه قولي تفضل عالاقل ! .. استحت شهد وعبست ونزلت راسها: تفضل ..
دخلت شهد وكان وراها ياسر .. واتجهوا للصاله الا بالبيت وجلسوا ..لحظه صمت كانت بالبدايه .. وكان ياسر يتأمل شهد ويبتسم..
شهد بنوته كيوت حدها حركاتها مرات تكون صبيانيه من اول نظره تشوفها بتحس انها انسانه مميزه عن الباقي بحركاتها وبكلماتها ..طبعها عنيد وماتحب احد ينرفزها .. جسمها حلو والكل كان يتمنى مثله ..
شعرها ناعم و لونه يميل للاسود بس مو مره داكن .. يوصل لكتفها و مدرج وطبقاته كثيره وقصيره وخصلها ناعمه ومع درجات الشعر ..
كانت رابطته فكان شكلها مرتب ولانه طبقاته كثيره كانت الطبقه الاخيره هي الا تنربط بس والطبقات الثانيه تطيح .. عيونها كبار ومايل لونها للرصاصي .. ولما كانت صغيره كانوا يسمونها ضفدع عشان عيونها كبار وكانت تزعل .. بس لما كبرت كانت عيونها اجمل مافيها ومن علامات جمالها الفاتن ..
وكانت حاطه تقويم اسنان لونه رصاصي ..
وكانت لابسه بجامه نوم برمودا لونه موف .. وعليها بلوزه نص كم موفيه وعليها بينك بانثر ..
كان ياسر يتأمل فيها بتعمق ويبتسم .. قالت شهد وهي حاطه يدها على خدها ومتركيه على الكنبه : ايه .. شبغيت عسى ماشر ؟
ياسر وهو يفرد جسمه ويرتاح بجلسته: لا ابد ..بس مر يومين والا نسيتي ؟
شهد: لا مانسيت .. واخذت قراري .. ياسر وهو هادئ: ووشو الا اخترتيه ؟ .. شهد بوثوق وقامت من الكرسي : اني اعيش عند خالتي .. فجأه رن الجرس وراحت شهد للباب .. وما فتحته كان الطلب الا طلبته من المطعم ..
شهد وهي تبتسم: thank`s .. وسكرت الباب .. لما لفت تبي تروح للمطبخ ..فزت وصرخت من الخرعه .. كان ياسر واقف وراها وهي تاخذ الطلب وخافت لما شافته قريب منها هالكثر ..
ارتبكت وبعدت .. واتجهت للمطبخ .. ابتسم ياسر وعرف انها استحت قام يبي يزيد الطين بله .. لما جت تدخل للمطبخ .. مسك شعرها المربوط القصير بقوه .. صرخت وقالت: اآآاااي شفيك انت ..!
ضحك ياسر وترك شعرها واتجهه للباب وقال: بمر عليج العشاء جهزي اغراضج بعد الصلاه يالله ..تشاو ^^
.. وطلع ..

لما اذن العصر ..ببيت الخاله ابتسام ..
كانت فاطمه نايمه بغرفتها .. وياسر يودي شناط امه بالسياره ولما ركبت امه بالسياره ..وكان ياسر بيسكر الباب
قالت امه وهي تبتسم: سلم على شهد لما تجي طيب ..
ابتسم ياسر وحزنه ماليه: انشاء الله انتي بترجعين وبتشوفينها وتسلمين عليها بنفسج ..
ابتسمت ابتسام وقالت: انشاء الله ..
وبدت السياره تبتعد عن عيون ياسر وهو وده مايفارق الغاليه الا بالسياره بس ما بيده حيله ..وقال بصوت حزين وهو رافع راسه للسماء: ترجعين بالسلامه يا بعد قلبي ..
ولما مر الوقت وبدت الساعات تمشي ..الى ان صارت الساعه 8 ونص .. كانت شهد واقفه عند باب الشارع حق البيت وهي تطالع اولاد المأجرين يلعبون كره بالشارع ..كانت متركيه (حاطه جسما) على الباب وماسكه شنطتها .. وبعد مده مو طويله ..
شافت سياره ياسر وهي جايه من بعيد ووجها كان عادي بس ملامحه ماتخلو من الحزن .. طلع ياسر من السياره والكل كان هادئ واخذ من شهد شنطتها ..وبدت تمشي خطواتها عشان تركب السياره .. بس قبل لا تركب..
من بعيد اولاد الجيران بدأو يلوحون بيدينهم وهم يقولون: ترجعين بالسلامه شهد ويبتسمون ..
كانت لحظات الوداع عند شهد اصعب شي فنزلت دمعاتها وهي ماتحس فيهم مع انها ماكانت تعرف اولاد المأجرين وايد بس ماتدري ليه قامت تصيح .. يمكن لانها بتفارق البيت او انها خايفه من الا بيصير بالمستقبل ..
ابتسمت وعيونها مليانه دموع وقالت : مع السلامه ..​

​

يعطيج العافية
انكسرت رقبتي وانا اقرا القصة
بس وين التكملة؟؟؟

الله يعافيج يالغلا .. :smile:
وان شاء الله بجيبلج القصه كامله ومختصره فديتج :smile:

وين التكمله خالتها شصار عليهاااا

http://www.e-alqalam.com/vb/showthread.php?t=3012
هذا الرابط فيه القصه كامله ومختصرة :smile:

واااااااو
يسلموو قلبوو
امووت في الروايات
الحين عاد لا للمذاكرة
بقعد اقراها لين اخلصها
تسلميين :smile:

من صجج خلاص انا اعتزلت الروايات ليما تخلصين دراستج :smile:

لا لا لا
يبه شنو اعتزال ما اعتزال
كملي كملي
وانا وراج :wink_smile:

فديت قلبج يا بعد روح روحي :smile:

مشكوورين ع روااايه مرررررررررره رووعه بس وين التكمله ياااحلوووووين

العفوووووووو يا بعد قلبي
وهذا الرابط فيه القصه كااااامله
شهد وياسر روايه رومانسيه كويتيه / تهبل الكل بينسجم - إبداع القلم

مشكووووورره حبيبتــــي بشوووره ع ردك واهتمااامك...بس انا دخلت الرابط بس مافي التكمله ..بليززززز حياااتي ابي اعرف النهاايه

ابشري من عيووووووووووووووووووني :smile:

مشكوووووووووووووووووورة
فدييييييييييييتج
بس وين التكملة نبغي شو اللي الصاااااااااااااااار
بعدهااااااااااااااا:sad_smile::emoticon_U:

دشييييييييييت الراااااااااااااابط بس نفسج الشي ما في تكملة لين يوم عرفت شهد بالوصية ووقفت من الكرسي لما عرفت من أمهاااااااااااااااااا
ابعي تكملتهااااااااااااااااااااا
بليييييييييييييييز حياااااااااااااااااااااااااااااااتوووووووووووووووو