السلام عليكم ورحمة الله وبركاته بنات انا دخلت شهري التاسع صارلي اسبوع ,وهذا اول حمل لي , ودي استفسر انا صارلي جم يوم تنزل معاي افرازات مره عزكم الله لونها اصفر تكون لزجه ومره لونها ابيض وتكون مثل الماي بس شوي لزجه , انا ما معاي الم ولا شي بس مرات لما اقعد من النوم احس بنقزات باسفل الحوض , بنات هل هذا من علامات الطلق والولاده ؟؟ انا اول ما دخلت التاسع رحت مراجعتي قالت ما فيج شي بس ماي البيبي شوي ناقص اي شي ينزل معاج اي بلل تجينا على طول , بس انا نزل علي افرازات مو بلل اروح لها والا لا؟؟ وعزكم الله بين فتره وفتره يجيني مثل المغص وشوية اسهال , انا ودي افتك من الثقل والتعب الي فيني بس بنفس الوقت خايفه من الولاده وتعقدت من القصص اللي قريتهم عن آلام الولاده , الله يسهل علي يارب وعلى كل حامل , اتمنى تفيدوني .
هلا حياتي 00000 ماعليج شر ان شاء الله والله يسهل عليج يارب بس روحي للدكتورتج احسن يمكن علامات طلق وانتي ماتدرين ودربالج لانج بجر وبعدين انتي اول اشبوع بالتاسع هذا وقت حلوو للوالاده000 الله يسهل عليج000
الله يسهل عليج الولادة يارب بس الافضل تروحين واذا انتي بتولدين بمستشفي خاص لا تحاتين ولا تخافين حبيبتي كلش ما راح تحسين باي شي والله يقومج بالسلامة
هلا اختي . . . ربي يسر اموروج ووولادتج يااارب . . . الافرازات اذا بنية معناتها عنق الرحم قاعد يتوسع . . . والتغزات اللي تحسين فيها هذا رأس الجنين يضغط ع المنطقة اللي تحت . . . وانتي كل ما تحسين بمغص والام بالظهر مثل الام الدورة الشهرية لكن مضاااعفة هذا اهو الطلق . . .
لاتحاتين هذي كلها من علامات الولاده انا كنت نفسج وكان وايد ينزل علي افرازات وقمت امشي علا تراب البحر وزادت الافرازات وقام ينزل معاها دم شويه ولمن رحت المستشفى قالي الدكتور مفتوحه 3 سم
لاتخافين حبيبتي الامرطبيعي ومايبيله خوف والله يسهل عليج ان شاءالله ويقول المثل ياطلقت المنسيه الله يردج عليه هههههههه
جزاكم الله خير ,, انا رحت للدكتور وقلتله نزل علي ماي ,, اخذ عينه وطلع بالمختبر انه مو ماي البيبي!! قالولي هذي افرازات ! اكو افرازات توصل للارض ؟؟ انا شفته وشميته ماااي نظيف , وما اخذو علي سونار قالو ماراح يبين منسوب الماي بالسونار العادي ! لازم سونار دقيق, يعني ابو كاميره , انا خفت وزوجي رفض عشان اللي يسوي هالسونار كان رجال وبما ان المختبر قال انه مو ماي البيبي , فقالو ماله داعي تسوين سونار دقيق عشان تجيكين على كمية الماي لان اللي نزل عليج مجرد افرازات انا بدخل العاشر تعبت
