سعودية طالبة الفزعة من خواتها الكويتيات

السلام عليكم ورحمة الله وبركاتة
خواتى مثل مو بالعنوان انا ذقت اكلة عند زوجة صديق زوجى وهى كويتية و البنت والله حبوبة بس استحيت اسألها عن طريقة الاكلة دوبى متعرفة عليها
ف طلبى منكم اذا امون عليكم هو طريقتها
الاكلة مثل ماسمتها مرق سبزى وهى عبارة عن لوبيا باللحم لكن والله ماذقت الذ منها فيا ريت تعلمونى طريقتها والبهارات اللى توضع عليها بالتفصيل لانى حسيت فيها طعم هيل وشبت وبهارات ثانية والزيت هل هو زيت ذرة او زيت زيتون
وفية اكلة ثانية اسمها حميس عبارة عن لحم مع خضار ابغا طريقتها
ملاحظة انا سعودية حجازية يعنى يمكن مسميات البهارات يكون غيرنا ف من هالحين استعدوا لكثرة الاسئلة الله يعينكم علية
ومشكورين سلف
ويالله بشوف الفزعات اللى تفرح القلب وبدعيلكم ترانى قريبة من الحرمين (موقع استراتيجى )هههههه
ودمتم بود

افا كل هالمشاهدات ولا رد ترى بزعل

حبوبه انا ما اعرف بالمطبخ شي انشاء الله خواتي يساعدونج

والله حبيبتي كان ودي اساعدج بس للاسف مااعرف الطريقه لكن السبزي اهي اكله ايرانيه وهي مو بس شبنت لكن محموعه خضروات ورقيه هذا اللي اعرفه ومنج السموحه

بعد عمري ولا يهمج بس ترا هذي يبيلها طولة بال وصبر لأن يبيلها تحمسين الخضره واجد واجد اول شي نبتدي باللحم تييبين لحم مال مرق قولي للحام ابيك تقصصه لي للمرق وتفوحينه مه بهارات وتخلين الماي ماله لا تقطينه بعدين عندج مقادير الخضره وهيا المهمه طبعا شبنت -كزبره-سلق-بقدونس-طبعا تكثرين السلق شوي عن باجي الخضار وتيبين جدرج وطبعا لا تنين البصل والثوم والخضار هذي لازم تيبين منها وايد لأن مع الحماس بالقدر راح تذبل وتصير شويه وتيبين القدر مالك لي بتحمسين فيه وتحطين جميع هذي الخضار بعد فرمها ناعم وتحمين بشوي دهن وتحمسين وتحمسين لما طلع مايعها عدل عدل عدل وتذبل خلاص تحطين بهاراتج الفلفل الاسود والكمون شوي والملح ولا تنسين الليمون الاسود كثري منه شوي شوي مو وايد على شان ماتصير مره وتحطين الفاصوليا البيضه بعد ماتفوحينها وتحمسين عدل وبعدها تضيفين اللحم وتحمسينه مع البهارات لمدة دقيقه وبعدها تضيفين الماي لي فحتي في اللحم وبالهنا والشفا

وانا حاضره لاي سؤال حياج الله

اول مرة اسمع فيها بس سهلة مايبيلها شي
يعطيج العافية حبوبة

مشكورين حبايبى لا خلا ولا عدم
ام مشموش الله يجزاك خير ويرزقك بر مشموش واخوانة انا بقولك اللى فهمتة وانتى صححيلى
هالحين اسلق اللحم مع بهارات حب وغيرة معروفة ثم اصفى المرق واحتفظ فية
بعدين اكشن بصل واحط علية الخضار الورقية واحمسهم زين ثم احط اللوبيا و المرق والبهارات المطحونة واخليها تطبخ اذا قربت تستوى اضيف اللحم
هل هذة هى الطريقة؟
طيب اللوبيا اكون منقعتها من الليل كم بتاخذ طبخ؟
ولك الف شكر

وباقى الحميس من عندة فكرة عن طريقتة ؟

ودي اني افيدج...بس الشبزي يختلف طعمه على حسب الخضار اللي تغير النكهة/وأنا لو منك اسئلي بالضبط صاحبة الشبزي مادام انها حبوبة واخذي مقاديرها بالضبط.....ولاتنسين نزليها لنا بالمنتدى

يعطيكم العافية جميعا
غلا حبيبتى المرة قابلتها مرة وحدة صحيح عندى رقمها بس مو معقول ادق عليها عشان اسألها عن طبخة
وانا فى الحجاز وهى فى الشمال حتى ماقدر اعزمها
بس الغريبة انة مافية ردود شكل الاكلة غريبة حتى عندكم

انشاء الله البنات يفيدونج

ياحبيبتي مافيها شي تتصلي فيها وتسلمي عليها وبالمرة جيبي طاري طبختها وامدحيها واسئلي شنو مكوناتها +طريقتها=ولاتنسين جهزي بإيدك ورقة وقلم عشان تسجلي كل شي