كل وحدة ولدت تقولنا قصتها بتفصيل من طق طق لي السلام عليكم ووين ولدت واي وقت واي مستشفى وشنو بدايات الألم وشنو جابت واتمنى الردود الكثيرة وانشالله الموضوع يعجبكم والوحيدة بالمنزل تعالي شاركينا طفي غسالتج وتعالي اوكي؟ يالله انا انطركم خاصة الوحيده في المنزل
ربي يقومج بالسلامة يااارب وتبشريناااا بولادتج وتقولين لنا احداث الولادة ولمسات الحنونة لممرضات العدان . . .
هههههههههههههههههههه اي عاد العدان ولمساتهم الحنونه والسحرية الي مالي غنى عنهم ولا تنسين المعارك الي بتصير مع السسترات والدكاتره والدم الي راج يسيل لي الركب والذبح والمذابح
هااي... انا راح اكون اول وحده اكتب قصتي اول مادخلت التاسع كنت انطر بأي وقت اول وكان عندي موعد عند الدكتورة رحت لها ولاتقولي انتي مفتوحة 2ونص سم روحي البيت واذا ياج عوار او نزل عليج ماي تعالي المستشفى وقالت لي انها راح تسافر بعد اسبوع وضاق خلقي قلت لها ابيج تولديني دكتورتي فاطمة الكندري وكانت راح تولدني خالدة المجيبيل لانهم يبدلون مرضاهم مع بعض و تعرفون اذا تعودتي وارتحتي على دكتورة وبوقت الولادة تتغير المهم رديت البيت كان التا ريخ 28-6 رديت البيت قلت حق ريلي يلا خنروح نمشي على البحر قالي لا عندي لعب كرة المهم زعلت وانا نفسيتي تعبانه وانا وانا قمت ازعل قالي باجر نروح معنى ترى قبل 3 ايام كنا نروح نمشي على البحر جان اقول خندق على اختي اروح اتمشي بالافنيوز المهم صارت الساعه7 المغرب جان تقول اختي وينج قلت لها لابس مالي مزااج اروح تعالولي انتي وامي ,, قالو اووكي يووني وريلي خلص مباراة ويانا وعقب راحت امي ورحت بنام الساعه كانت 1ونص منسدحه وريلي كان منسدح وماسك اللاب توب ولا احس بشي ينزل جنة دم الدورة بغزاره قمت قلت بروح الحمام تكرمون بس وقفت ولا حنفية تصب والله يابناات مت من الخرعه وقمت ارجف لانه اول حمل وريلي مسكين توتر قام يطلع لي ملابس وانا بروح الحمام موقادره مرتين غيرت وعصبت على ريلي لاتوترني وانا قاعده ادور شي البسه ريلي يقولي من صجج وطلعنا طيااري على رويااال حيااة كانت الساعه 2 الفير وريلي داايس ولفات رونق سايد وانا يتني اللوعه من سياقة ريلي دخلوني وانا اقولهم نزل علي مااي واايد ابي دكتورتي بلييز دقو عليها ولاتقولي دكتورة الطوارئ لازم افحصج عقب ندق عليها كنت مفتوحة 3ونص سم وكان فيه طلق قالولي ولادة وعطوني وانا مادري شنو بيصير وعطون كمام صرااحه عجيب حسيت نفسي قمت اهلوس وكل مااقعد اشوف ريلي وامي اقولهم انا نمت شكثر انا شنو قلت لاتقصون علي لايكون خربطت بالحجي وكل شي يفحصون لين وصلت دكتورتي ارتحت اللي اذكره قلتلها دكتورة بلييز تعباانه ابي اوولد قالت لي انشالله بروح البس واييي ومسكيينه امي عورت قلبي ماسكة القران وتقرا وعيونها تدمع وانا اطالعها وانا من نوعي مااصارخ ولا شي امسك نفسي وتدمع عيني وبس اقولهم تعبااانه وريلي مسكيين ماخلاني واقف على راسي وعقب ماصحيت الا اسمع الدكتورة تقولي وخري الكمام ماكو ابيج تساعديني يلا ضغطي ويمي السسترااات صراحه خوش سسترات اللي تمسح عليج واللي تقرا قران لمن صحيت قبل لا اولد قلت لهم ريلي يطلع برااااا ولادكتورتي تقول طلعناه بعد شيشووف ولا اسمع واه واه واه وبس ماحسيت الا حاطينه على صدري وعقبها ماحسيت بشي طبعا انا ولدت الساعه 5,25 وصحيت الساعه 7 الصبح ويبت عبووودي الله يحفظه قبل امس كمل شهر ادري طولت عليكم ويلا نسمع قصصكم
قصتج حلو ة و مشوقة عشت الاجواء والله شكرا للمشاركه والفال لي وناطرة قصصكم يا جماعه وخصوصا الوحيده في المنزل
توني خلصت غسيل والحين اقولج قصة ولادتي اول شي بعد ما خذيت 19 يوم من التاسع كنت في بيت اهلي كان يوم الخميس يوم جمعتنا بعد ما كل واحد راح بيته وانتي بعد رحتي بيتج كان ولد عمتي مسوي حليب مع زنجبيل كان بحديقة بيتنا مع عماني انا شربت قلاص واحد لاني اشتهيته بعد ما جابه لي عمي وبعدها شربته وبعد فتره بسيطه حسيت بعوار غريب فبطني عاد وقتها كنت بكر ما اعرف اذا عوار ولاده ولا لا قلت ادق على زوجي واقوله يوديني المستشفى بس خفت وبطلت وبعد تقريبا نص ساعه جا زوجي واخذني وقلتله عن العوار وقالي اوديج المستشفى بس انا ما رضيت وقلتله عوار خفيف مو قوي علشان اروح بس هو اصر ان يوديني لان استانس لان حس ان ولاده وبعد ما رحت المستشفى طبعا العدان قالولي مفتوح 3 سانتي تعالي لما يزيد العوار ورحت بيتي وزجي طبعا طاير من الفرحه وانا ميته خوف وقلتله كله من قلاص الزنجبيل قالي انا بشكر اللي سوه الزنجبيل وراح هو وجابلي قلاص ثاني وقالي اشربيه قلت مستحيل علشان يزيد العوار قالي هذا المطلوب علشان تولدين وطبعا ما شربته الا بطلعت الروح وزاد العوار وقمت ابكي كانت الساعه 10 الصبح على ما زاد العوار وبعدين وداني مره ثانيه وقالولي دخول وضليت لين الساعه 4 العصر وما ولدت وكنت للحين 3 سانتي وصعدوني الجناح دقيت على زوجي علشان يجيبلي ملابس حسيت من صوته ان تضايق لان كان وده اني اولد يعني يافرحه ما تمت واول ما رجعت على السرير والعوار زاد حيل قمت اصارخ يا سستر وكانت في وحده جمبي هنديه سمعتني اصارخ قالتلي يعور صح قلتلها ناديلي السستر بسرعه ونادولي الدكتور علشان يفحصني قالي 5 سانتي ولاده ودخلوني مره ثانيه وكنت طالبه ابرة الظهر ودقوا على زوجي علشان يوقع اني اخذها وهو طار من الفرحه لما درى اني راح اولد خلاص وطبعا ما عطوني ابرة الظهر الا بعد ما قهروني ما جابوها الا بعد ما راح صوتي من الصراخ لانهم كانوا يقولولي بس يجي دكتور التخدير نعطيج وطلعوا روحي على ما عطوني اياها والسسترات الله يهديهم لا معامله زينه لا كلام زين بس يصارخون ويهاوشون وانا من القهر ما سكت قعدت اسب فيهم وحتى لما اناديهم ما يردون علي مع انهم واقفين عند الباب يسولفون ويضحكون ومطنشيني صج عانيت منهم معاناه والساعه 9 بالليل ولدت وجبت بنتي الحلوه فرحت حيل فيها وابوها بعد حيل فرح فيها كانت اول مولوده لنا الله يخليها لي ولأبوها وابرة الظهر يا حلوها حلواه تجنن من اول ما خذيتها ما حسيت بشي ولا كأني قاعده اولد وانا الحين حامل و ولادتي بشهر تسعه وزوجي قالي بولدج بمستشفى بطيبه لان العدان طلعوا روحي وجننوني وانا حيل فرحانه لاني ما راح اولد بالعدان وبس هذي قصة ولادتي وان شاء الله تكون اعجبتكم واسفه على الأطاله وترقبوا قصة ولادتي الثانيه
محد طلب منج تكتبين قصة ولادتج مو كافي كل ما تجين بيت اهلي تقوليلي اياها حفظتها حتى بدال لا اقول قصة ولادتي قمت اقول قصتج لا ومسمية نفسها الوحيدة بالمنزل يعني مظلومة قلت لج تعالي تغدي عندنا باجر عشان ما تصيرين وحيدة بالمنزل يالعيارة
قصة ولادتج حلوه اول مره اسمعها مع انه انتي تجين عندنا بس ما سمعتها ولا مرة خوش قصة احسنتي يا الوحيده في المنزل لازم يعطونج جائزة نوبل مثل هو دونغ وانا اترقب قصة ولادتج
يمه منج كل شوي تقولين انطر قصصكم خصوصا الوحيده في المنزل وتقولين قولي قصتج ومدري شنو اخر شي تقولين منو طلب منج تقولين قصة ولادتج هين ثاني مره ماراح ارد على مواضيعج وما راح اجي اتغدى عندكم عقاب لج اقعد فبيتي احسلي
اون جي شكرا وتصدقين توني ادري انج ما تعرفين قصة ولادتي خلاص لي ولدت مره ثانيه انتي اول وحده راح اقولج قصتي وخلي ام غازي تستريح ما اقولها ولا شي
كوماوايو الوحيده في المنزل آيغاتوه غوزايماشتا اراسو لا تعالي تغدي عندنا ولا تزعلين يا اختي العزيزة اذا ما تجين راح اخلي كيوبن يجيبج هههههههههههههههههه
هههيهيهيهيهيهاي كوريا واليابان احلا لغتين عندي واحلا بلاد عند مستحيل ابطل اتكلم كوري و ياباني بس الحين كيوبن يزعل وهانول ما ترضى تبي تضل مع كانغ جي فألله يعينج هههههههههههههه
له له له ليش محد تفاعل مع موضوع اختي الوحيده في المنزل اتمنى منكم انكم تتفاعلون علشان نرسم البسه بوجه الوحيده في المنزل وشكرا
انا ان شالله ولادتي 3 فبراير 2012 ودكتورتي فاطمة الكندري وكنت بعرف اشلون خياطها التجميل حق عقب الولاده لان ولادتي قبل كانت بالصباح والخياط الله لايوريكم وتعبت وايد بولادتي قعدت 17 ساعة الله يعلم بحالي مع ان الدكتورة كانت تحاول تساعدني بس ماكو ولا شي خفف العوار ومع الكمام ينزل ضغطي ويشيلون الكمام بصراحة تعبت وايد والله يارب يسهل علي وتكون ولاده سهلة واتمنا الخياط يكون عدل
انا ولدت الحمد لله لي عشرين يوم كانت ولادتي قيصريه لاني خلصت التاسع ولا جاتني اي اعراض ولادة والرحم مسسسسسسسكر حدهـ عقبها قالت لي الدكتورة انتي متاكدة من تاريخ اخر دورة قلت لها متاكدة استغربت تقولي السونار يعطيني عمر اصغر للجنين من التاريخ اللي قلتيلي وقالت لو ما جاتك ولادة تعالي بعد اسبوع وخلال هالاسبوع كل يوم ارووح للممشى و بالبيت امشي ولافي فايدة نهههههههيييي وكل ما زعلت على زوجي اقوله هين لو تعبت راح ادق على اهلي واخلي لحظه الولادة تطوفك خخخخخخخ وهو كل ما طلع يوصيني لو حسيتي باي شي دقي على طوالي وطاف اسبوع لا حسيت بشي و لا جاني اي وجع نههههههي رحت للدكتورة سويت سونار والا المشيمه متكلسه سوت لي فحص والا الرحم مسسسسسكر وقالت لي ما ينفع معاج الطلق الصناعي لان الرحم كووولش موفاتح لو نص سم وبحالتك تكون الولادة قيصريه قلت لها انا موخايفه من القيصريه بس لو صبرت شوي ممكن اولد طبيعي قالت لا ما ابي اجازف فيج بتتعبين ع الفاضي وانا قلت لها ما ابي اجازف بالبيبي لان البيبي اهم شي عندي وولدت وجبت بنوته
