لقصتي حكايه ... قصتي انا وربي

لقصتي حكايه ... (والله العظيم أني ماجذبت ولا بكلمه بس الأسامي غيرتها )


هنا أبدي حديثي عن قصة حياتي كلها والألام التي واجهتها منذ طفولتي . رغم أنني لاأملك مهارة اللغه العربية لكنني أملك عواطف ومشاعر لي رغبه بأستخراجها بكتابتي بكلمات...

فأنا عندما كنت طفله كانت حياتي سعيده لأن لدي أخت أكبر مني بسنتين أسمها مشاعل وكانت حياتي كلها لعب وضحك فعندما أبحث عن السعاده أناديها فتأتي فسرعان مانلعب لأنها أكثر وحده قريبه إلي فهي ملكت حياتي .. فعندما دخلت أول سنه بالدراسه كنت خايفه أول سنه لي ماذا أفعل لكنه أختي كانت تجرأني وتمسك بيدي لين تعودت على الأجواء لكني كنت دائماّ بقربها ألحقها وين ماتروح ...

يوم من الأيام كنت بالصف الأول المتوسط تهاوشت مع بنت بس أهيا كانت عريضه وانا ضعيفه ماحسيت اله البنت سطرتني ماصار دقايق اله اختي جت ومعطت شعرها وشالتها عني ريحتني عاد منها قمت أحس أنه أختي عزوتي بالحياة ماأقدر أستغنى عنها وكل هوشه أتهاوش فيها تجي أهيا تفزع عني وتقلب الهوشه عليها ومرات تنفصل بسببي ...

من كثر تعلقي فيها أذارديت من الدوام أسألها تبين أتغدين تقول لا أنا ماأتغدى وأذا تغدت أتغدى واذا نامت أنام وأذا قعدت أقعد نروح الدوام مع بعض نرد مع بعض نمشي بالمدرسه مع بعض صارت توأمي بالحياة كثر ماقلت أني أحبها شويه ...

حتى أهلي لما ينادونا كانو ينادونا بأسم واحد مشاعل مها يعني وحده منكم تجي ..

أما غرفتنا كلها صور صوري وصور أختي بس اهيا أكثر مني لأنها تحب التصوير

وبالعيد لازم نروح أنصور أثنينه لأن أحنا نفس اللبس كل عيد كل عرس كل مناسبه نفس الشي حتى بعيد ميلادي نحتفل أثنينا جنا ولدنا بيوم واحد ...

حتى خواتي المتزوجات لما يسيرون علينا ماننزلهم نقعد فوق انا واختي ندرس نرقص نلعب نسولف أي شي نسويه المهم مالنا خلق لأحد ...

لين وصلنا الثانويه كنا بالمقررات أثنينا واهيا كانت ساقطه برابعه أبتدائي فكان بينا بس سنه انا أوله ثانوي واهيا ثاني ثنوي وكان يصادف ناخذ مواد انا واهيا نفس الشي بس مو نفس الفصل فكنا ندرس بعض ونسابق بعض ونسمع لبعض الأسئله. والله كان البنات يقولون انتم وناسه جنكم مو خوات جنكم رفيجات كله مع بعض ماتملون .

وبهاسنه اهيا سافرت مع أختي وانا ضليت والله كله أبجي واهيا كله تدق علي تبجي تقولي مشتاقتلج وانا فاطسه من البجي أقولها ياحقيره ليش رحتي وخليتيني ماأقدر أنام بدونج والله أقعد الليل كله أبجي وأشوف صورج بالغرفه وأقعد أبجي يالله تعالي وتقعد تهديني ...


مرت الأيام وصرت انا ثانيه ثانوي واهيا ثالثه ثانوي فكان اونس سنه بحياتي والله وانا قاعده أكتب القصه أبجي كانت حياتي وناسه قمه بالفرح هذي السنه كبرت وتعلقت حيل بأختي وكنا أنجمع نقاط بالدراسه علشان ندش الجامعه وكنا نفكر نصير محاميات وكانت دايماً تقولي اذا تزوجت بسمي أسمي عليج مها وأنا كنت أقولها لا أنا بسمي أسم بنتي حلو أسم جديد أنتي أسمج قديم للأسف أعذريني ونقعد نضحك ..

بنات اذا تبوني أكمل قولولي بس وربي كل اللي أقوله صارلي

هلا أختي . . .

كملي بانتظار البقية . . .

يلا كملي

قطعتي قلبي والله الله لا يفرقكم عن بعض

^
^ بالانتظار

امبيييه حلوه حدي اندمجت

اتمنى تكملين قلبي ...

بالانتظار ..​

فديتكم صج في ناس تحس فيني .....

تكمله...

وبهالسنه مر أحلى عيد شرينا بدلات رسميه روعه ورحنا المصور صورنا وكان شكلنا روعه طول بعض نشابه بعض بس اهيا بيضه وانا حنطاويه ...

وبهالسنه كانت مستانسه كانت تقولي أنا السنه الجايه يصير عمري 18 باخذ الجنسيه وانتي للحينج بدون جنسيه وتحرني وتقول بتقص ليسن وتقول السنه الجايه أخر سنه رابعه ثانوي بتخرج وبتصير محاميه ومن هالسوالف

وأبوي والله حييييييييييييل يحبها هالبنت حبوبه بهالبيت وكان يستانس لما تقوله انها بتصير محاميه ...

ولما بدت أخر أيام هذي السنه ققررنا أننا أنسافر فكنت أقول لرفيجاتي شتبون أجيبلكم هدايا وكل بنت تقول شي ....

وجا اليوم اللي بنسافر فيه ولما جينا بنسافر...أحنا دايما أنسافر بسيارتين أبوي سياره واخوي الأكبر واحد هم سياره بس طلعلنا ظرف أنه الخدامه فيزتها منتهيه ومادري شنو وانه ابوي بيقعدبالكويت لين تخلص فيزتها فقالت أمي انا بقعد مع أبوكم مايصير اسافر مع أنها دايماً أمي تركب مع أخوي ...

وأهني قال أخوي الجبير أنا أبي أسافر ماأبي أنطر منو بيسافر معاي بسرعه رفعنا ايدينا أنا وأختي مشاعل قلنا أحنا بنروح معاك .. قال يالله جهزو بسرعه باجر بنسافر بالسياره

يااااااااو يااااااااو كانت لحظات حلوه طلعنا انا وأختي الملابس الجديده اللي شريناها حق السفر وجهزنا الجنطه وانا ماأعرف أرتب الملابس عدل أختي رتبتهم وبعدها رحنا لأخوي الجبياد عاد هذا أخوي يشبهني حيلال المهم جهزنا أغراضه وكنا أنسولف ونضحك ونقول قصص له وجبنا طاري جوجو وماجوجو فخاف اخوي قال يمه خوفتوني شهالسوالف يالله خلصو الجنطه وطلعو فخلصنا جنطته ورحنا غرفتنا قعدنا أنقرقر انا واختي لين نمنا ..

قعدنا يوم الثاني اليوم اللي بنسافر فيه دقيت على كل رفيجاتي ودعتهم وقتلهم بدق عليكم بالسفره واختي كذلك دقت على رفيجاتها ودعتهم ...

وقبل مانطلع من البيت ودعت أهلي وأختي ودعتهم وهم أخوي ودعهم واهوا يبتسم وأختي ودعت أختنا الجبيره كذا مره وتضحك ...

وأول ماركبنا السياره قال أخوي حافضين دعاء السفر قلنا لا جان يقوله وأحنا نقول وراه ...
ومشينا لين وصلنا الجوازات الكويت وضايق خلقنا لأننا ماودعنا واحد من أخواننا فبالجوازات دقينا على أخوي فأختي كلمته ولا تقعد تبجي جان تعطيني التليفون وودعناه قلناله ليش ماودعتنا قال كنت قاعد أسحبلكم فلوس علشان تاخذونه معاكم وسكرنا منه...

وبالطريج أنا حطيت سماعات الهتفون أغاني حطيتها بأذني ونمت

قعدت من النوم ولا أنا بالمستشفى بالسعوديه وفي ناس جدامي ماأعرفهم يبجون بجي بجي أقولهم شنو صاير ماأدري عن شي أهما يقولولي قومي ويصير خير أقعد أبجي أقول أبي أهلي وأرد أنام ..

بعدها أقعد ألقى الحريم أصيح أقول شصاير أشوف رجلي مكسوره معلقه وأيدي ماأحركها أقولهم شصاير يقعدون يبجون ويروحون الحمام كلهم وكانو أكثار حريم كبار وصغارو أنا أرد أنام ...

قعدت من النوم ولا ألقى أخوي الصغير جدامي يقعد يبجي أنصدمت هذا بالكويت أشجابه أقوله شصاير يقولي كلمي أهلي بالتليفون كلمت أمي وأبوي الناس تبجي وكلمت خواتي وأخواني وبنات خالتي وبنات عمي أقولهم أجدعوه شالتجمع أشصاير بس كلهم يكلموني أله أختي مشاعل وأخوي الجبيروأذا سألت عنهم يطلعولي أعذار...

وأقعد ساعات أكلم البنات اللي عندي السعوديات يضحكون معاي ويقولولي أحنا ودنا أنتعرف على الكويتيات صج صج جزاهم ربي ألف خير
وأنا مو بوعيي يعني أقول كلمه وأنام لأنه أنا بالعنايه المركزه وكنت بغيبوبه 7 أيام ...

وكله أصيح ابي أهلي أبي أمي أبي أبوي شصار لييييين قالي أخوي انتي طحتي من بانشي ومنها سكت ...


وبعدها أرسلني أمير من السعوديه بطيارته الخاصه الى الكويت وأستقبلوني أهلي الكل اللي يشوفني يبجي محاد سلم علي وأخوي اللي ودعته بالتليفون عند الجوازات ماقدر يبوسني من شافني قعد يبجي وطلع من الغرفه ...

وجدامي واقفين بنات خالتي وبنات عمي يبجون حيل أقولهم لا تبجون أنا مافيني شي وماكنت أدري أنه وجهي متفوخ ولونه أزرق يخرع شكلي حيييييييييييييل وشعري مايتمشط لأنه قعدت بالسعوديه حوالي 15 يوم بدون مايتمشط ...

وخواتي حمل يكسرون الخاطر يقعدون بالأرض يبجون أقولهم ليش تبجون الحمدالله مافيني شي (وماكنت أدري أنه حياتي صارت جحيم )

أنا كان فيني كسر بالراس وبالرجل وأيدي كانت ماتحرك يعني جنبي الأيسر كله كسر صج صج عانيت كل شي يعورني كله أصيح أبي أنام ماأقدر كله أحذ حبوب
وكنت أقول لهلي الكل عندي بس أختي مشاعل وينها وبعد وين أخوي الجبير وأنا اذكر أننا سافرنا شصار

أهما يقولولي ( طبعاً يجذبون ) يووووو رديتو لأنه جواز أخونا منتهى وأنتي كنتي تبجين ودج تسافرين أقولهم زين وين أخواني يقولولي سافرو مع أختي الجبيره ( مع أنه أختي الجبيره سافرت نفس اليوم اللي سافرنا فيه ) بس أنا مو بوعيي فصدقتهم وسكت ...

وتمر الأيام وأشتاق لأختي أقول لأمي أبي مشاعل وأبي اخوي ليش مايكلموني بالتليفون معقوله مشاعل ماتشتاقلي أمي تقعد أطلعلي الأعذار وقمت أشك فيها بس مايطري أفبالي شي ثاني

(اكمل أذا شفت ردود حلوه أبي أحس أنكم حاسين فيني )

الله يسامج ياقلبي حدي مندمجه ليش تقطعينها انا بنام اللحين واذا صحيت من انشاءالله القاج مكمله الباجي والله عورتي قلبي ..........

فديت اللي ردو

بس يابنات مراح أكمل أله أشوف في ردوووووووووووووووووووود

افا جنه مو عاجبينج ...

امبيه كملي يلااااااااااااا انا ندمجت حدي ومجهزه الدموع واقول بقلبي الله يستر


اختج مشاعل واخوج الي سافرتي وياه شلونهم موجودين ؟؟؟؟؟؟؟

لاااااا أجدعوه أنتم تكفون وتوفون فديتكم...

بكمل...

ومريت ثلاث شهور وأنا أسأل عن أخواني أبي أكلمهم مايعطوني ولما يكلمون أختي المسافره أختي مسافره تعالج ولدها الله لايعيد هالمرض عاد أقول لأمي قوليلها أبي أخواني ماتعطيني لين تودعها تقولها مع السلامه وتسكر أختي.. بعدين تقولها شلون أخوانج أهما طالعين خلاص يالله مع السلامه

أهني دريت أنها جذبه أمي تجذب ليش وين اخواني شصار فيهم أبي مشاعل ابي أخوي الجبير وينهم أقعد أصيح وأبجي قولولي وينهم

لما قعدت أحن عليهم أله يقولولي وين أخواني قالت وحده من خواتي على أساس أنها تبي تهون علي لأنه الدكتور قالهم لحاد يقولها شي يضايقها لأنه كان فيني نزيف بالمخ فمو زين علي ... المهم قالت أنتم سويتي حادث بالطريج وأخواني يعالجون بالخارج

والله أهيا قالت جذي قمت أشوف الدنيا ضلمه قعدت أصيح وأنا كنت يالله يالله أوقف على رجلي فلما قالت طحت على الأرض وأبجي أقول لأمي يمه قولي الصج ... أختي من الخرعه قامت تقول والله أجذب عليج يمه شقولها هذي . وقامو يبجون جدامي وأنا أصيح أقولهم قولولي ليمتى خلاص ماقمت أتحمل أنتم قاعدين تموتوني ..

ياربي أهني قالي أخوي وأهوا يبجي والله دموعه ورى بعض قالي:

أنتم سويتو حادث يالطريج ومشاعل وأخوي الجبير بسرعه توفو وأنتي قعدتي بغيبوبه ..

أنا أهني والله ماأقدر أوصف حالتي ماأصدق أقول لأمي يمه أثنينهم أخواني أثنينهم ماتو يمه شلون يمه أنا كنت معاهم كنا نسولف نضحك بالسياره

الكل قاعد يحضني بس أحس أنها تمثيليه شلون مشاعل وأخوي الجبير راحو شلون بعيش شلون بكمل حياتي ماني مستوعبه يعني شلون بعيش حياتي بدونها والله ماني مصدقه ولا أبي أصدق

والمشكله شلون ماكنت أذكر شي من الحادث شاللي صار خربط حياتي انا صج عانيت بالمستشفى قعدت فوق الشهر فيه بس شلون أتحمل أني أعاني العمر كله أحلامنا كلها راحت منهذا اليوم والله

حياتي كلها بجي اقعد بالساعات بغرفتي أشوف صورها أهلي خافو أني أنجن أقعد أشوف صور أخوي أجي لين أدوخ وأنام

أعوذو بالله قمت أقول لو ميته معاهم أحسن لي بس لما أشوف أهلي شلون أستانسو أني أنا حييت صار همهم أني أقوم من الغيبوبه بعدها أني أمشي بعدها أني أحرك أيدي فسبحان الله ربي خلاني علشان أهون احزانهم
والله حتى ليتات بيتنا مانبطلها صج عانينا بفرقاهم ..

يقولي أخوي اللي كلمته بالجوازات يقول ماقمت أتحمل البيت انتم الثنتين كنتم شمعة بيتنا نحب نشوفكم مستانسين مع بعض وأخوي الجبير تمنينا نشوف اعياله

ويتذكر لما ودعتها ويقعد يبجي
وأستمريت على حالتي سنوات لين سبحان الله تزوجت قلت يمكن الزواج بيفرح قلبي ويهون علي حياتي

جبت بنت وسميتها مشاعل على أختي وسبحان الله حتى بالزواج مالي حظ صارلي مشاكل والحين أنا طالبه الطلاق ...اللهم لاأعتراض بس الحمدالله على كل حال

بنات أمانه اللي تقرى قصتي ترد علي بدعاء يفرج كربتي صج تعبانه 

اللله يفرج كربج وينور دربج ويسعدج طول العمر ويخليلج مشاعل

أمييييييييييييين ياحواجه الله يسمع منج.. مشكوره

وين الردود يارب كل وحده تقرى الموضوع وماترد يخرب جهازها لووووووووووووول

الله يفرج كربتج يارب وتسلميين ياقلبي وهذي بنوتج معاج افرحي فيها وانسي الهموم

أسعدني مرورج يادياري والله يخليلج زوجج

اللهم اجرني في مصيبتي واخلف لي خيرا منها

سبحان الله يمكن خيره

ادعي من الله ان يفرج همج يارب عاجل غير أجل بأذن الرحمن

ويهدي الامور

رب يفرج عنج كل هم ويريح بالج ويهدي سرج وما تشوفين إلا اللي يفرحج قولي آآآمين

والله قطعتي قلبي

ربي يفرج كل الهموم ويسهل دربج


والله قطعتي قلبي عس ربي لايحرمج من بنتج مشاعل

الله يهون عليج يا قلبي

الله يهون عليج

والله قطعتي قلبي

وانشالله ربي يرحمهاا هي واخوج