لنتعلم الفوتوشوب من الالف الى الياء ..

السلام عليكم و الرحمة و الاكرام

اشلونكم خواتي شخباركم

حبيت افيدكم بخبرتي المتواضعة بالفوتوشوب

و طبعا شغلي حصري لمدرستي و منتديات سيدات الكويت لوول

انشالله تقريبا بين فترة و فترة راح احط درس يديد

و طبعا لو شفت تفاعل راح احط دروس اكثر انشالله

راح ابدي من ابسط شي بالفوتوشوب لي الاشياء الاحترافية

و انشالله راح اختصر عليكم الطريج و ادورلكم الدروس اللي ما اعرفها و احطلكم اياها :teeth_smile:

و اي استفسار سألوا :smile:

و اذا بغيتوا شي انا حاضرة بالخدمة و باللي اقدر عليه

و اي ملاحظة عندكم قولولي عنها

و انشالله الكل يستفيد و انشالله الشرح يكون وافي ..

و سامحوني خواتي اذا كان الشرح دقيق حيل و شوي شوي لان انا احب اشرح جذي بالتفصيل :smile:




نبدي باول درس و اهوه : اشلون انسوي صورة بسيطة بالفوتوشوب ؟

1. نبطل البرنامج
2. نطق على قائمة file امر new
3. راح يطلع صندوق حوار نختار المقاس اللي نبيه .. و كبداية راح تكون الصورة ذو حجم عادي بالمستطيل الاول نحط 640 و بالثاني انحط 480 و بالنسبة لي انا احب اتعامل مع وحدة البكسل
4. راح تتبطل لوحة بيضة .. نطق على اداة اللي على شكل فرشه و فوق تحت القوائم الاصلية راح تطلع ازرار يدية خاصة بالفرشة انطق على الزر الثاني من اليسار و انقي الفرشة اللي نبيها
5. نضغط على اللوحة البيضة بالمكان اللي نبيه عشان تطبع الفرشة على اللوحة و طبعا تقدرون اتغيرون الفرشة مثل ما تبون .. و عشان انغير اللون انطق على المربع اللي مكانه ثالث زر من تحت من الازرار الرئيسية بالبرنامج و انقي اللون اللي نبيه
6. نروح عند قائمة file و نختار امر save as او save و راح يطلع صندوق محاورة
7. نختار المكان اللي بنحفظ فيه الصورة و نغير اسمها على حسب ما نبي و انطق ok

الفرق بين save و save as
بالبداية ماكو فرق بس اذا حفظناها و غيرنا فيها يبين الفرق بينهم
ان save راح يحفظ التغيرات على نفس الصورة
اما save as راح يحفظها كصورة ثانية و اذا كتبنا نفس الاسم راح يقولنا ان في صورة بهالاسم تبين تحفظين عليها ولا لاء

و بكلا الحالتين اهوه راح تكون صيغة الحفظ تلقائية بشكل ملف فوتوشوب

هذا تقريبا ابسط درس يعلمنا اشلون نتعامل مع الازرار الاساسية

انشالله يكون الدارس واضح و اي سؤال انا حاضرة :teeth_smile:

و ياريت اشوف تطبيقاتكم خواتي

نسألكم الدعاء :smile:​

​

مجهود تشكرين عليه حبيبتي . . .​

تطبيقي ع الدرس الأول :
http://www.herosh.com/up/73952/691124365.psd​

العفو ولو اختي هذا واجبنا :smile:

اي صج سوري نسيت .. لمن بتحفظين الصورة اهوه تلقائيا راح يحفظلج اياها كملف فوتوشوب .. بس انتي لازم اتغيرينه لي صيغة JPG او JPEG عشان اتكون صورة عادية و اذا بتبطلينها ما يحتاي برنامج الفوتوشوب

لانها راح تنحفظ كصورة عادية

و بالنسبة لتطبيقج اختي ام عبدالله.. وايد حلو ماشالله و شكرا :$

ياريت بس ما عليج امر اتردين تحفظينه كصورة عادية بهالطريقة:

1. لمن يطلع صندوق المحاورة مال الحفظ تحت المكان اللي تغيرين فيه الاسم مكان فيه اختيارات وايد
2. اختاري الصيغة اللي قلت عنها
3. راح يطلعلج بعدها صندوق محاورة صغير خليه maximum يعني سحبي اللي بالنص لي اخر شي و طقي اوكي

مشكورةةةةةةةةةةةة حبيبتي من العجلة ما حولت الملف إلى صيغة صورة :red_smile:

عادي اختي انا وايد اتصير معاي :teeth_smile:

و يعطيج العافية على التطبيق ماشالله حلو و بادرة حلوة منج اختي ام عبدالله مشكورة :$

بس هالنقطة فيها ميزة حلوة

ان بعدين انشالله لمن نبدي انركب صور و جذي راح نحتاج حق الملف اللي بصيغة الفوتوشوب عشان اذا بغينا نعدل فيه

لان اهوه ينحفظ على شكل مشروع يعني حتى لو حفظناه على شكل صورة بعدين

هم نقدر انبطل ملف الفوتوشوب مرة ثانية و انعدل و انغير فيه

مشكورة اختي على اهتمامج بالموضوع و انشالله كلنا نوصل لمرحلة الاحترافية مع بعض :smile:

اوكي عيل كيفكم خواتي ..

انا راح اكمل

الدرس الثاني : اشلون انحط صورة على اللوحة مالت الفوتوشوب و انحددها بروحها ؟؟

1. نبطل البرنامج و انبطل لوحة يديدة و بنفس مقاس الدرس الاول
2. اذا نبي انلونها كلها بلون واحد من قائمة Edit امر Fill و راح يطلعلنا صندوق محاورة الاختيار الاول يعني راح تلون اللوحة باللون الامامي ( المربع الثالث من تحت من منطقة الازرار الرئيسية بالبرنامج) و الاختيار الثاني اهوه اللون الخلفي بالمربع اللي ورى و الاختيار الثالث اهوه لون انتي تختارينه لان راح يطلعلج صندوق الالوان بعدين طقي ok و راح تتلون اللوحة
3. من قائمة file امر open راح يطلع صندوق محاورة اختاري الصورة اللي تبينها و طقي ok و راح تتبطل بلوحة بروحها غير اللوحة اللي احنا لوناها
4. راح اتكون فعالة بروحها و اذا ما كانت طقي عليها مرة وحدة (لمن الاطار الازرق اللي فوق الصورة يكون باهت يعني مو فعالة) من الادوات الاساسية للبرنامج انطق على اداة التحديد ثاني وحدة من فوق و انحدد الجزء اللي نبيه او انحددها كلها ( انا اذا بحدد الصورة اطق ctrl + A) و بعدين تنسخينها و في طريقتين للنسخ: من قائمة edit امر copy او بالكيبورد (مثل ما انا احب ) ctrl+C
5. انخلي لوحتنا اللي لوناها فعالة بالضغط عليها مرة وحدة و نلزق الصورة اللي نسخناها هم في طريقتين: من قائمة edit امر paste او من الكيبورد ctrl+V راح تتلزق بالنص بالضبط
6. اذا كان في حولين الصورة اشياء زايدة بالمساحة مسحي اللي حولينها (يعني مثلا صورة ياهل و تبين صورته بروحه مسحي اللي حولينه) و المساحة موجودة بقائمة الازرار الرئيسية للبرنامج 11 من فوق
7 نختار الاداة الاولى و انغير مكان الصورة و انخليها اي مكان نبي
8. نحفظ شغلنا بالصيغتين كصورة عادية JPG و بالصيغة التلقائية للفوتوشوب عشان راح انغير فيها بعدين انشالله بالدروس الياية

و نفس الشي انسوي لو بنضيف اكثر من صورة

واي سؤال انا حاضرة

و انشالله يكون الدرس مفهوم

و بانتظار اشوف تطبيقاتكم

بالتوفيق للكل

اشدعوا خواتي ولا وحدة منكم تبي تتعلم الفوتوشوب ؟؟

والله حلو الفوتوشوب .. يخدمنا باشياء وايد

و نقدر نسوي فيه وايد اشياء و تطلع روعة

يعطيج الف عافيه اختي ايمي على الدروس .. انا الصراحة ودي اسوي لي توقيع بالمنتديات يكون من شغلي انا ,,,, بس تحمليني لاني راح اتعبج معاي شوي .. قبل لا ابدي بتطبيق الدروس اكتشفت ان جهازي ما فيه البرنامج .. من وين انزله وشنو احسن برنامج للفوتوشوب .. يعني كم رقمه ,,
ويعطيج الف عافيه

الله يعافيج و مشكورة عالمرور الطيب

لا عادي افا عليج ما فيها تعب السالفة .. تعبج راحة اختي :smile:

ولا تحاتين انا انشالله راح اخليه سهل و مبسط يعني ماراح تلقين فيه صعوبة انشالله

البرنامج الله يسلمج انا عندي النسخة الثالثة

و انشالله يضبط معاج

مشكوووره ايمي على المعلومات والدروس .. بالنسبة لي انتهيت من الدرس الاول ... وبكمل معاج الدروس كلها .. وكل درس انتهي منه راح اعلمج
يعطيج الف عافيه .. ايموووووومه

الله يعافيج اختي

بس ما عليج امر يا ريت اتحطين تطبيقاتج اشوفهم

و بالتوفيق انشالله

ايمي ... توهق البطل ... ههههه
انا الحين بالدرس الثاني ... وشكلي متوهقه فيه .... بس سؤال لو سمحتي ... شنو تقصدين بالادوات الاساسيه للبرنامج ... اهم المربعات اللي على جنب ... على اليمين .... والا اللي باليساار اللي فيهم رسمة الفرشه والسهم والمربعات ؟؟؟؟

اييي هذولي اهما

اللي عاليسار فيهم الفرشة و المساحة

الادوات الرئيسية <<< من تسميتي :tongue_smile:

انا سميتهم جذي لان يكونون موجودين على طول ما يحتاي اتطلعينهم او شي :teeth_smile:

يعطيج الف عافيه ..اختي ايمي

بانتظار .. الدرس الثالث

اوكي .. نبدي الدرس الثالث ..

اضافة style للصورة و اشلون انسوي الستايل المناسب اللي نبيه

1. نفتح ملف الدرس الثاني من قائمة file امر open و راح يطلع صندوق محاورة انقي الملف و نطق ok و راح يتبطل تطبيقنا
2. من صندوق الليرات ( إذا ما كان طالع .. من قائمة windows نختار layers) نطق مرتين على طبقة الكلام اللي كتبناه بالدرس الثاني
3. راح يطلع لنا صندوق محاورة فيه اختيارات وايد على اليسار .. نطق على المربع عشان نطبقها و جربيهم كلهم و اللي يعجبج خليه و اذا تبين اتغيرين منه طقي على الكلمة نفسها راح تتغير المنطقة اللي على اليمين و بعدين طقي على المربع اللي يمها و عدلي بالخيارات على حسب ما تبين
4. على اليمين كلش بصندوق المحاورة اللي طلع في 3 ازرار .. اخر زر اسمه new style طقي عليه و سيفي الستايل

ملاحظة: انا جذي نقيت الكلام انتي تقدرين اتطبقين الخطوات على اي لاير تبين

5. من قائمة windows نطق على style عشان انطلع صندوق الستايلات
6. طقي على اللاير اللي تبينه من صندوق اللايرات او طقي بالزر الايسر على اللاير اللي تبينه بالتطبيق نفسه و راح تطلعلج قائمة فرعية صغيرة طقي على اسم اللاير اللي تبينه
7. و من صندوق الستايلات طقي على اي ستايل تبينه و بعد ما اتنقين واحد و خلاص ما تبينه .. تحت بنفس الصندوق في زر شكله دائرة و فيها خط مايل هالزر راح يشيل الستايل
8. و فوق بالزاوية اليمنى بنفس الصندوق سهم صغير طقي عليه و اخر القائمة الفرعية في اسماء مجموعات ستايلات اهي اصلا موجودة مع البرنامج .. نقي اللي تبينه و راح يطلعلج صندوق محاورة طقي على append لان راح يضيفه على الموجودين و تنقين على راحتج

انشالله يكون الشرح وافي

و اي استفسار انا حاظرة ​

​

​

اختي ايمي .. عندي سؤال ... انا طلعت الليرات .. بس وين طبقة الكلام اللي نطق عليه ؟؟
انا بالدرس الاول والثاني ... بس حطيت صوره ما كتبت شي ؟؟

شوفي الصوره اللي طبقتها بالدرس الاول ولاثاني


هذي اللي لقيتها ... عشان تجربه بس .

اختي بالنسبة لي طبقة الكلام

1. في زر بالازرار الاساسية شكله على حرف t طقي عليه
2. و باللوحة اللي احنا انطبق عليها نضغط على الزر الايسر و نسحب لي الحجم اللي نبيه و انهد
3. نكتب اللي نبيه و بعدين نقدر نتحكم بالنص من خلال ازراره الخاصة فوق تحت القوائم

بس اختي هالصورة ما طبقتي عليها شي

و على راحتج اختي اذا بتضيفين كلام او لاء

بس انا يبته كمثال

يعني هالحجي يتطبق على اي لاير تبينه

حتى لو حطيتي طبعة تقدرين اتضيفين لها ستايل و راح تطلع وايد حلوة​