معاناتي مع الحبوب بعد الحف

السلام عليكم

خواتي انا بقولكم مشكلتي اللي عاني منها من ست شهور والله تعبت من هالمشكله متعبتني والله كل ما اطالع في المرايه واتذكر وجهي قبل اتحسر واتحسف على كثر عدد شعر راسي قبل انا بشرتي كانت صافيه ونضيفه واشحلاتها والكل يسألني شتسوين فيها اقول ولا شي والله العظيم ما كنت اسوي فيها شي بس اغسلها بصابونة دوف بس قبل العيد قلت بحف وجهي لان كان في شعر بس مو واجد خفيف وحفيته وياليتني ما حفيته نفر وجهي وشب علي حراره وطول ست الشهور وهو محبب ولا خفت الحبه وراحت طلعت غيرها في مكان ثاني وابتلشت في هالحبوب هاذي تخف والثانيه تطلع من الصوب الثاني وقلت لخواتي انا لازم اراجع دكتور كلهم صارخوا عليي وهبوا في وجهي ويقولون وين بتروحين بيلعبون بشرتج وانتي غلطانه رحتي حفيتي وحنا قلنالج لا تحفين والحين طبخن طبختيه يالرفله اكليه والله تعبت والحين خفت الحبوب بس ترد مره ثانيه بس مو واجد والمشكله الحين اثار الحبوب اشلون تروح في اثار بقع سود وفي اثار حفر صغيره وحتى لون بشرتي غمج مو نفس قبل احس لونها شاحب وداكنه مو نفس قيل بيضه وتلمع الحين مدري شلون والله ما قمت احب اطالع بنفسي بالمرايه واحس تتقشر من عند منطقه اللي تحت الحاجب واللي فوق العييون ياليت تساعدوني وتقولون لي شسوي وين اروح واذا في دكتور زين ياليت تذكرونه علشان الكل يستفيد واذا في خلطات وماسكات اذكروهم والفايده مو لي بروحي للألف وحده غيري واذا حفيت وجهي شنو اسوي علشان ما تطلع الحبوب انا حطيت ماي ورد بعد ما حفيته بس ما نفع معاي ابي شي ما يطلع لي الحبوب ياليت تنصحوني شسوي علشان احف وما تطلع لي الحبوب

حبيبتي انا لما احف احط كريم اسمه كنيكومب لمده 3 ايام تحطينه وبعدين غسول البابونج زين للحبوب وفي بعد كريم ماادري وش اسمه بس مشهور باابو اسد مضاد للجراثيم مره حلو روحي الصيدليه واسالي بيقلك وش الكريم اللي بعد الحف وان شالله اكون افدتك

تسلمين يا بعد عمري على هالحلول

حبيبتي اخت وعزيزه

مرحبا يالغاليه .. انتى تقريبا نفس حالتي .. انا رحت عن دكتور جلديه خاص .. عيادة كويت لندن كلينك .. بقولج عن اللي وصفلي اياه .. بعد الحف استعملى كريم اسمه ( Fucicort) >> معروف اسمه ابو الاسد .. تحطي على اي مكان تحفيه يطلع حبوب ,, رووووعه هالكريم ,, وبالنسبه للحبوب واثارها .. استخدمى محلول اسمه ( Dalacin T) >> تحطيه على مكان الحبوب والاثار وبعدين حطي كريم لونه برتقالى اسمه ( Skinoren) >> وكريم اسمه (الفاكورت ).. الحين اخذي كميات متساويه من الكريم البرتقالى والفاكورت حطيه مكان الحبه ومكان الاثار .. طبعا عقب ما حطيتي المحلول على المكان الحبوب واثارها .. اقسم بالله يالغاليه انا مجربته والله انسى شي اسمه حبوب واثار كله بيروح .. واستمري عليه 3 ايام وبتلاحظى النتيجه .. وطريقه الاستعمال .. اغسلي وجهك بصابون دوف وحطيه .. بالليل .. وصبح اغسليه بالصابون دوف المرطب .. واتمنى انك تستفيدي .. وبعدها كيف اذا بتحفي حطي على طوووووول ورا الحف الكريم ابو الاسد ما يطلع حبوب .. واذا كان شعر وجهك خفيفي انصحك بالتشقير رووووعه .. مع الاستمرار عليه يفتح البشرة بعد .. وشكرا لج

حبيبتي اخلطي الكريم البرتقالي مع الفاكورت بكميات متساويه وحطيه على الحبوب واثارها ..وشكرا .. ادعي لي بالستر والزوج الصالح .. وربي يعوضي خير

حبيبتي اخلطي الكريم البرتقالي مع الفاكورت بكميات متساويه وحطيه على الحبوب واثارها ..وشكرا .. ادعي لي بالستر والزوج الصالح .. وربي يعوضي خير

اول شي سلامات حبيبتي وهذي عين مو من الحف الله يعينج....
اقري على نفسج قبل كل شي وفي كريمات من الصيدلية انا استخدمها بعد الحف وايد حلوة وماتحبب الويه....الفاكورت مثل ما اذكرت الاخت اللي قبلي بس فيه كريم ومرهم انتي قولي للصيدلي انه حق بعد الحف...وسودو كريم تلاقينه بالصيدلية ومذركير هذا صج عجيييييب
واتنى اكون افدتج............

شوفى حبيبتى انا اذا استعملت شى وجاب معاى نتيجة ما اقعد لين الكل يدرى واجيب اى موضوع علشان الكل يدرى فيه .


انا مثلج لما احف وجهى يقب كل وجهى حب من ثانى يوم وبالصدفة بنتى طلع بيدينها كل حب شكبره من البق اللى يقرص . ورحت الصيدلية ( كنت بالخبر بالسعودية ) واعطانى كريم لها واستعملته لبنتى وسبحان الله من الله ثم الكريم راح من بنتى من ثانى يوم .

بعدها كنت تونى حافه وجهى وقلت بجربه وتخيلى يومين وما فى ولا حبة .

والحين اذا حفيت احط الكريم بعد الحف وثانى يوم وما شفت ولا حبة طالعة بوجهى .

اسم الكريم (مومينتا ) من شركة جمجوم اكيد موجود بالكويت بالصيدليات .

وهذى صورته نفس اللى عندى .

راجعي الدكتور

غسلي وجهج بماي منقوع المر مسحيه بقطنه


لان لمره مضاد حيوي طبيعي

ويعالج الحبوب


ان شاء الله يفيدج

حبوبه انا عندي كريم بعد الحف

كله اعشاب وسعره بدينارين ونص بس

يايبته من ايران وراح يفيدج وايد

رقم بالتوقيع

مرحبا ياعسل
شوفي بقولج عن شغله اسويها انا وخواتي بعد الحف
ومن بعد الله وبعد هالخلطه والحبوب ماقامت تطلع بعد الحف ولله الحمد
اختي بعد ماتحفين وجهج وتخلصين
زهبي ماي وسكر وخلي السكر يذوب بالماي ولازم تكونين مكثره السكر
وحطي على وجهج ساعه وبعدها غسليه بماي وحطي فازلين
وباذن الواحد الاحد ماراح يطلع لج حبوب

اتمنى اني افدج حبوبه

انا اعاني من هالمشكلة بجرب ابو اسد ان شاء الله ينفع مشكورة ياقلبي

وي مثلي بالضبظ جنج قاعده تتكلمين عندي حفيت ويهي قبل عرس اخوي وبعدين طلعي حبوب بويهي مو طبيعه

عليج بالمره ترا وايد زينه

يعني لما تحفين ويهج حطي مرّه على طول مرت عمي تمدحها وايد

​

آنا مع أرنوبه .. أتوقع والله أعلم انها عيـــن والحف سبب
لان الحف ما يسوي كل اللي تقولين عنه.. وبنفس الطريقه
ممكن يوم يومين وهذا اذا كان الشعر تقيل وكثيف على الوجه مو مثل ما تقولين انه خفيف وبشرتج اتينن ! والله أعلم

الشاهد .. اللي باضيفه .. انا اللي استخدمه للزباين بالصالون كريم البرافين .. هذا واااايد حلو وزين والزباين دايما يسئلون عنه وانا ما ابيعه .. بس أوفره للي تبيه .. سعره دينار ونص وموجود بعد بمحلات العناية بالبشرة والصالونات ..قوليلهم انج تدرين ان سعره بدينار ونص لا يقصون عليج .. حجم كريم السنفرة مال المشمش المعروف نفس الحجم بس .. بس الماركة غير .. دقي على الصالون اذا تبين واخذي اسمه من البنات والله لو عندي بالبيت جان كتبت لج اسمه الحين .. بس حددده عجيب لبعد الحف أو تنظيف البشرة .. وماي الورد يا بنات ترى بس يشد ما يسوي شي .. ولااازم يكون بارد والله يوفق الكل :]

صراحه انا استفدت من الموضوع

وجزاكم الله خير ....

والله يشفيج اختي ويشفينا بصراحه الحبوب صارلها الحين اربع شهور مو راضيه تروح وبكان واحد ما اخلص من هالحبه تطلع مكان ثاني حبه << شكلها السالفه معاند هههههههه