والله مادري شسوي باختي

السلام عليكم ورحمة الله وبركاته
خواتي اللي عندها طولت بال وحل لمشكلتي تقرا اللي بكتبه الحين

انا ترتيبي بالعيله الكريمه الثانيه واللي اكبر مني بنت واللي اصغر مني ولد وكلنا متزوجين ولله الحمد
انا عمري 27 واختي 28 واخوي 26 يعني ورا بعض
المهم
مشكلتي انه اختي الكبيره مادري شفيها هالفتره حاطه دوبها دوبي يعني خل اوصف لكم وضعها هي متزوجه وعندها 3 عيال الحين مشالله والحين صارلها 10 ايام نفاس بالثالث وزوجها بدون بس مومقصر معاها بشي مع انها تدري ومتاكده انه يكلم وحده ثانيه بس كل شي يوفره لها ومايغلط عليها ولا يهينها
اما وضعي انا الحمدالله عندي بنت وولد وحامل الحين بالسادس وزوجي سعودي والحمدالله قولوا مشالله (((مشالله))) زوجي مايثني معاي الكلمه يعني مايردلي طلب الا نااااااادرا وعلى شغلات تافهه وماعنده خرابيط ولله الحمد
اما وضع اخوي متزوج صارله سنتين ومرته الحين حامل الله يتمم لها على خير
المشكله


اختي لما كانت في المستشفى كنت انا والوالده عندها لين ولدت ومن كثر التعب اللي حسينا فيه انا والوالده صار فينا هبوط بالضغط بسبب قلة النوم وماكنا ناكل عدل والحين هي طلعت من المستشفى وفي بيت اهلي تنفس
انا هالسنه بسافر مع اهلي بنصيف برا بس انا بروح معاهم وبرد بعد اسبوعين وبخلي عيالي وخدامتي عند خالتي ام زوجي وكنا ناويين نسافر بطياره بس عقب ماتقعد امي 10 ايام عند اختي وبعدها نمشي المهم كل يومين ترتفع اسعار التذاكر لين صارت للذهاب بس 180 دينار وكان واحد من خواني متكفل انه يدفع لي تذكرة الطياره
بس لما ارتفعت اسعار التذاكر قامت اختي المصونه وشيشت اخوي المصون علي وانا ليلت اللي شيشت اخوي كنت مطرشه لها مسج لما كنت في بيتي انه زوجي بدل مايعطيني المبلغ اللي يكفيني للسفره زاده بعد 100 جان تقول حق اخوي اني رحت البيت مع زوجي بس عشان احده يزيدني فلوس وانا الحمدالله ماني محتاجه زياده بس هو من كيفه زاد ويوم وصلت البيت عند اهلي ثاني يوم الا واخوي يهاوشني ويقولي محد راح يدفع تذكرتج الا انتي من فلوسج مع ان اخوي من ابوي قالي بيدفعلي التذكره واخوي الحين نظرته لي اني انا مارحت لبيتي الا عشان اذا بغى زوجي ينام معاي اقوله اول شي يزيدني انتوا فهمتو علي يعني انا بنظر اخوي انام مع زوجي بفلوس مع اني حلاله وقالت له المسج اللي انا طرشته لها ويوم حلف اخوي اني ماراح اسافر مع انه مو بكيفه لانه امري بيد زوجي وبس امي حلفت انها ماتمشي الا وانا معاها لانها تدري اني انظلمت بالسالفه كلها ويومها لوتشوفوني شلون طبني انهيار عصبي والحين اخوي قرر انه هو اللي يودينا بسيارته والليله انشالله بنمشي واختي الحين انا ما اكلمها ولا حتى هي تكلمني مع انها هي الغلطانه وتقط علي نغزات بس اللي قاهرها ومولع بقلبها النار اني بسافر ومومهتمه ولا باي كلمه تقولها ولا ارد على كلامها وهذي مو اول مره تسوي هالمواضيع لانها قبل كانت مستلمه خواتي البنات بالبيت واذا جا يوم الزواره والله انه خواتي تضيق فيهم الدنيا وكل وحده تروح دارها لانها من تدخل البيت تبدا المشاكل وتبدا تشيش امي على خواتي وانا امي جبريت بسرعه تشب


ادري اني كتبت روايه بس تكفون ابي الحل والله تعبت منها

حبيبتي هذي اختج ولاااااااازم تتحملينها وبعدين انتي لاتكبرين الموضوع دام انج بتسافرين وزوجج مايرد لج طلب بصراحه اهو المفروض يتحمل سفرتج اذا ماكنتي موظفة ...

ولاتخلين نفسج بحاجة احد عندج المبلغ اللي يكفيج روحي واذا لأ عيالج اولى تقعدين معاهم اوتسافرين انتي وزوجج وعيالج ,,,,,,,,,

وبعدين انتو بتروحون بسيارة يعني مصاريفج اقل

عسى ربي يوفقج وتردين بالسلامة ولاتنسين صوغتي وصوغة اختج وترى عمر الدم مايصير ماي
الزوج بداله عشرين واحد بس الاهل ؟؟؟؟؟؟؟مايتعوضون

الله يعينج حبيبة قلبي

اختج تتعامل معاج من ناتج ظروفها ....يعني لما تقولين انه زوجها يكلم وحده غيرها ولايهينها هني نوقف شوي....اشلون يكلم غيرها ومايهينها؟هذي بروحها بلوه وربي يعينها
هي تصرفاتها نتيجة الظغط عليها
انتي مرتاحه وريلج معاج وبتسافرين وهي ريلها يخونها ومجابله الياهل بنفاس

اختج مو قادره تواجهه زوجها علشان جذيه قاعده تطلع حرتها فيج.....اقري الكلمه مره ثانيه..حرتها..يعني اختج محتره وقهوره...ومو ناقصه قهر زياده...احتويها وكلميها ولاتقاطعينها وهذي اختج اول وتالي وفهميها انج تحبينها ...ماعلي قدري ظروفها وراح تشوفين النتيجه

انتي طبعا حليتي مشكلتج واللي هو سفرج مع الوالده بالسياره وهني راح تقل المصاريف وخلاص

مع الايام كل شي راح ينحل وتتعدل الاوضاع بس لاتشدون عليها صدقيني دايما الخوات يقارنون بين رياييلهم وهذا شي متعب لان اللي ريلها اقل لو بشي قليل من الثانيه بتنقلب الدنيا

ربي يسعدج ويسعد اختج ولاتنسين صوغتها مع اليهال

صدقيني اختج اولئ فيكم تقعدون
معااااه مووو تسااافرون وتخلونهااا
وهي نفاااس الله لايفرقكم والتسااامح
ينفع بهالموااقف الله يهدي بالـكم

الله يعينج الخوات ما قصروا بالرد بس هم الخوان عمرهم ما يتناجرون انا لو تناجرت مع اخواني ثاني يوم نتيمع ولا كأن في شي صاير يعني انا مع رفيجتي ما احط بقلبي لي صار بيني وبينها موقف هالمره اشيل على خواني اعتقد انها مو حلوه ان تصير قلوبنا سوده على اي احد بالاخص مع الخوان وتذكروا الابتسامه ترى تراضي حتى العدو وعمر الضفر ما يطلع من الحم وبالخير مالكم الا بعض والله يهيديكم كلكم

انا حاااسه فيج و كلامج هذا لانج مقهووورة انوو اختج سوت لج مشكله

حبوووبه عادي حنا يالحريم نغااار من كل شي و على كل شي حتى حنا يالخوات

وهذا عادي بطبيعتنااا حنا يالحريم واللي ما تغار مووو مرة

انتي لا تااخذين الامر بحسااسية لانها اختج واذا انتي شاايفه انوو عندهااا ظروووف

الحق عليج سااعديهااا على ظرووفهاااا لو بكلمة حلوة موو تخلينهااا كييذا تلعب فيهاا الغيرة

مثلا قووليلهااا بتكفل بطلعة نفاااسج من لبس و تزين وكل شي أخليج غير غير غير

و أشتريهاااا بدله و قميص و شوي حركااات وربي تستااانس لأنهاااا ماخذة تفكيرج

مو انتي تفكرين بنفسج وبس يعني حسسيهااا انج تفكرين برااحتها وجمالهااا وكشختهااا

عوضيييهاااا عن النقص اللي توااجهه من زوجهااا

وبالأخير أقوولج حبوووبه ترى الوضع عادي عادي عادي لا تتحسسين او تزعلين من اختج