السلام عليكم ورحمة الله وبركاتة: والله يا خواتي اني ضايقة فيني الدنيا وابي حل للمشكله اللي عندي: انا عندي ولد وبنت ولدي عمرة 5 سنوات وبنتي عمرها 3 سنوات المشكله ان اخو زوجي ما يحبني ولا زوجتة علشان جذية ما يحبون عيالي عادي عندي مو لازم يحبون عيالي قبل شهر ولدي يلعب مع ولدة نفس العمر وعلى ما اظن ان الجهال تهاوشوا عادي عندي لانهم دايما يتهاوشون ويتراضون بس راح عم ولدي وطقه ويجي ولدي عندي ويبجي وخدودة حيل حمرا قلت لزوجي وتدخل ولما كلمه قالة ليش يطق ولدي هو شوي عقلة عقل جهال بس الحين ولدي صارله اكثر من شهر ما ينزل ولا يطلع من غرفتي لو شنو يصير الا معاي او مع ابوه يخاف من عمه لما اقوله انزل والله مايجيك يقول لا اخاف بنتي نفس اخوها نفس السالفة قبل تنزل الحين ماينزلون كلش بنتي عمها اهو نفسة اللي ضرب ولدي ضرب بنتي طراقين نفس السالفه كل شي سويته بس ما كو فايده موراضين ينزلون قبل يطلعون للمطعم الحين لا ما ادري شفيهم تكفون قولولي وش اسوي اذا شافوه كانهم شايفين جني الله يرحم والديكم ردوا علي لا تقولون طلعي بيت لان زوجي مو راضي.......................:emoticon_U:
الله يهديه بس احد يمد ايده على اطفال ويحط عقله بعقول اطفال مالج غير تنزلين معاهم جم مره لين يتعودون ينزلون مثل قبل وانا راح ادعي لج يا عمري الله يكون بعونج
مشكوره ياقلبي الله يوفقج هذا انا انزل معاهم بس لا شافوه يجون يركضون يقعدون عندي واذا راح همن يقعدون يقولون نخاف يجينه الله يهداهم ويوخر عنهم التفكير وينسون
الله يتمم علينا العقل هذا الرجال اللي يخلي عقله عقل بزر لاتواخذينه لانه مسكين وناااااااااااااااااقص عقل شجعي عيالش وقولي اللي ينزل ومايخاف بعطيه هديه والله يكون بعونش على هالعم المصدوع
الله يكووون بعووونج ويرفع عنج ولا يبلااانااااااااا .. عيااالج مو لازم ينزلوون خليهم ويااج وخليهم يتجمعوون الجهاال عندج .. انا ولدي عشاان افكه من الهيااته وانا افتك من الحجي موصله له البلاي ستيشن واي وقت يبيه بس يشغلهاا وينادي ربعه يقعدوون عنده وانا اسوي لهم خرابيط واروح عنهم واخليهم بس شنو اقفل المطبخ والغرف لان التعرفين الجهال وحوستهم اخلي حوستهم بس بالصاله وكل شوي اطرش خدامتي تشيك عليهم والا انا ادش عليهم .. وهم بنتي اذا ماتبي تنزل تعلب بغرفتهاا ويا البنات بس اسم الله عليهم عيالي معودتهم اذا شفت وصخ والا حوووسه مااخلي الجهال عندكم .. وبجذي افتك من حجي الناااس وعيااالي يستانسوون ..
اختي الغاليه حاولي اذا نزلتي تحت مع عيالج كلمي حماج بادب وخلي عيالج يمج يسمعون علشان يتشجعون ومايخافون وكلميه قولي له الله يهديك شفيك على الجهال مو راضيين ينزلون يخافون منك ليش تخرعهم ترضى انه زوجي يطق عيالك ولا يخرعهم حاولي تكلمينه باستلطاف اذا مع الجهال ماراعى شعورهم والله يكون بعونج يا قلبي
الله يكون بعونج انا انصحج لا تنزلينهم الا معاج او مع ابوهم انا نفس حالتج بس الفرق حماتى مو حماي . مسكينه بتى مخرعتها عمتها لدرجت لما اقول انزلى العبى مع البنات تسكر الباب وتقول مابى واذا اذت ابوها قالها ترا اوديج عند عمتج تخاف على طول تبجى وتقول خلاص اقعد عاقله . هذى هى اذا كرهوج كرهو عيالج
هلا قلبو عادي هاذي السوالف تصير لكل طفل حاولي انج تحاورين معاه وتشوفين شنو اللي مضايقه.. بعدين ابو العيال يكلم اخوه اللي هو عمه ويقوله عشان يراضيه وتنحل المشكله واذا ما نفع علمي ولدج فنون القتال خخخخخ اتغشمر معج بس اللي قلته احسن حل واذا ماعجبج شوفي ردود البنات
هلا يا الغاليه 000 بصراحه عم عيالج هذا مايستحي جهال ينطقون ليش ؟ وليش مايحبج ومايحب عيالج شمسوين لهم الحمدلله على نعمه العقل المفروض تكلمين زوجج انه مايمد ايده على عيالج وفهميه 000 عيالج خليهم لاينزلون بروحهم احسن خليهم معاج يروحون ويردون ماله داعي وحاولي انه تكلمين عيالج انه المفروض مايخافون من احد بس من الله وامهم وابوهم 000 وحاولي بكلامج شيلي الخوف منهم ياحياتي قلبي يعورني عليهم الله يحفظهم لج يارب000
