كافي صدماات بحياتي.قصة كويتية واقعية لأميرة البجع

كمممممممممممممممممممممممملي

ياحياتي الله يسهل عليج يارب ويوفقج بدراستج والله شبكت عشانج اليوم يمعت اهلي ولا ادري عن تلفوني توني جيكت ولا واصلني على الاميل رساله خاصة منج قمت وشبكت عشان انزلها لج وتقرين نهايتها عشان تدرسين ​

من عيوني يا ام صلوحي :wink_smile:​

البارت الأربعين والأخير
*************

تهاني كانت بالبيت مع حسين وجراح

جراح (قاعد يلعب مع ولده): كربوووونه ولد البابا.. كربووونه حبيب الماما

تهاني: ههههههههههههه خله ينام شوي يا ريال.. لا بالليل يتعسر علينا

جراح: مابي مابي.. مشتاقله بلعب معاه

تهاني: اي الحين بلعب معاه.. وبالليل شوي وتحذفنا من الدريشة آنا وولدي

جراح: ههههههههههههه انتي ممكن بس حسووووووون لا مستحييييييل

تهاني: انزين ييبه خل أعطيه حق الخدامة تنومه شوي

جراح (يعطيها حسين): هااج.. وتعالي بسرعة أبيج بموضوع

تهاني: هههههههههه اعرف مواضيعك ما عندك سالفة

جراح: رووووووحي انتي الحين وتعالي بسرعة

تهاني ودت الياهل حق الخادم ودشت عند جراح.. قعدو يسولفون شوب.. والا يرن تليفون تهاني

تهاني(مبتسمة): أوووه هاذي أمي.. ألووووووو

هناء (صوتها ميته من البجي ومقطع): تهاني لحقيني.. لحقييييني

تهاني (مستغربة الرقم رقم امها والصوت صوت هاجر): منو انتي؟

هناء: آنا امج تهاااااني تعالي بسرعة تعااالي

تهاني (قامت قعدت عدل على السرير وطقت على صدرها وقامت تصارخ): يمااااا شفيج شصاااااااير؟

جراح (عدل قعدته اهو بعد): شفيج.. شفيها عمتي؟

هناء تتكلم بس حجيها مو مفهوم

تهاني: شفييييييييييج؟؟ يما وضحي كلامج

جراح (سحب منها التليفون): عطيني.. ألووو هلا عمتي خير شصاير؟

تهاني (تطقه تبيه يطالعها):شصاير.. جراح قوولي

جراح (يأشر لها يعني صبري): لالا حول ولا قوة الا بالله العلي العظيم

تهاني (قامت تصارخ): منو قولي منو؟

جراح(ماسكها): يلا عمتي كاننا يايين الحين مع السلامة

جراح (مسك تهاني من جتوفها.. وبدال لا يكحلها عماها): تهاني لا تبجين.. أختج هاجر ماتت

تهاني (قامت تتطامر على السرير): لالالالالالالالالا جراح لا تقووول.. هاجر مافيها شي.. لا تقووول ماتت

قامت تركض بالغرفة ماتدري شيتسوي.. تتطامر وتطيح على الأرض تبجي: لالالالا تقووول جراح تكفى لا تقول

جراح (يحاول يهديها ويلمها بس مو قادر): حبيبتي لا تسوين بعمرج جذي.. خلاص الله خذا أمانته

تهاني (صارخت زيادة وتبوس ريوله): لالالالالا جراح ابوس ريولك لا تقول جذي اختي ما ماتت.. هاجر ماراحت

جراح (يحاول يقومها): قومي حبيبتي الله كريم.. خل نروح امج تقول نييب عبير من البيت ونروح المستشفى

تهاني حاولت توقف ولبست على السريع.. جراح دق على امه وقالها وطلب منها تيي تاخذ حسين عندها

جراح وتهاني طارو حق عبير بالبيت

تهاني دقت على عبير.. وعطت التليفون حق جراح عشان يتكلم

جراح: يلا عبير نزلي

عبير (نزلت وركبت معاهم واهي ميتة من البجي): قولولي صج هاجر ماتت؟؟

تهاني: لا ان شاء الله الله لايقول الله لايقول

جراح: لاحول ولا قوة الا بالله العلي العظيم
*********************


بالمستشفى قبل ساعة

الدكتورة طلعت من غرفة العمليات والكل راح صوبها

بدر: طمنينا دكتورة

الدكتورة (منزلة راسها): زوجتك ولدت يابت ولد الحمدلله بصة بس يحتاج الحضانة شوي

بدر: الحمدلله على كل حال.. انزين دكنورة وزوجتي؟

الدكتورة سكتت ماعرفت شيتقول

بدر: دكتورة مرتي فيها شي؟

الدكتورة: آنا ادري انكم ناس مؤمنين بقضاء الله وقدره.. زوجتك ارتفع عندها الضغط.. وصار فيها نزيف داخلي.. وماقدرنا ننقذها.. اطلبولها الرحمة وشدو حيلكم

هناء من سمعت الخبر طاحت من طولها.. وبوحسين طاح عالأرض يبجي

بدرانصدم ولما استوعب حجيها ركض دش الغرفة

بدر (قرب من السرير اللي نايمة عليه هاجر.. يطالعها وحابس دموعه ابتسم): كاهي حبيبتي.. شلون يقولون ميته؟؟ كاهي نايمة

الممرضين درو ان هذا الريال اللي واقف زوج المتوفاة.. ياله ممرض: شد حيلك يالأخو.. اطلبلها الرحمة

بدر (وخر ايده ما يبي يصدق): وخر انت ما تعرف شي.. هاجر هاجر.. حبيبتي قومي.. هاجر يبتي نصور.. قومي شوفيه

قام يهزها بقوة: حبيبتي قومي.. الله يخليج فتحي عيونج.. قومي خل نروح نشوف ولدنا.. هااجر.. هااااااااااجر

بدر (شالها من الفراش. ولمها على صدره.. وقام يبجي): لالالا هاجر لا تخليني.. لا تحرميني .. منج.. هاجر بعدنا ما عشنا بسعادة.. بعدنا ماربينا ولدنا.. بعدج ما يبتيله اخوان وخوات

هاااجر لا تخليني.. قومي قوليلي شنو تبين؟؟ تبين فلوووس؟؟ تبين نغير الشقة؟؟ تبين تسافرين؟؟ شنو تبيين؟؟ قوليلي.. آمريني خل أسوي اللي تبين

حبيبتي قومي آنا أسف بعد ما ازعلج.. قومي عاقبيني قومي طقيني بس لا تموتين .. لالالالالالالا تموووتيييييين هاجر .. هاااااااجر.. لالالالالالالالالالا

التمو عليه الدكاترة واللممرضين وبالغصب قدرو يوخرونه


تهاني وعبير.. قامو يركضون ورا جراح وهم يبجووون.. يدورون على غرفة العمليات بويههم شافتهم مرة.. وحست انه عندهم حالة وفاة من شكلهم

المرة (مسكينه على ويهها): عظم الله أجركم

تهاني وعبير (التفتو عليها وصرخو بويهها): لالالالالالالا تقوووووولين جذيييييي

مسكينة المرة اخترعت ومشت بدربها

جراح: خلوها خلوها.. امشووو.. وصلنا

تهاني و عبير شافو أمها على الرض تبجي .. وأبوها يبي يمها

وبدر مقعدينه على الكرسي يبجي بحرقة

قامو يصارخون: لالا تقولون هاجر راحت.. هاجر ماراحت..

وبلحظة انترست المستشفى من اهلهم.. يت مريم وعالية.. الكل قام يبجي بهستيرية ومو مصدقين

وصارت ضجة ولوية وصراخ

وبوحسين طلب من جراح والرياييل انهم يودون الحريم بيت بو حسين

وبالغصب الحريم وافقو يروحون

بعد ما كملو الاجراءات.. ودوها للمقبرة.. غسلوها.. وثاني يوم الصبح كان الدفان

وبعد مادفنوها .. طاح بدر على قبرها ما يبي يروح.. يحاولون يقومونه

بدر: خلوني.. خلوني.. بقعد عندها.. بقعد عند حبيبتي.. مابي أروح

جراح: اذكر ربك. قول لااله الا الله.. يلا قوم يا بدر.. الحريم بييون يقرون الفاتحة عند القبر

وأخيرا قام بدر.. ويو أمها وخواتها وعماتها وخالاتها

وطاحو على القبر

تهاني(تبجي. وتمسح تراب القبر بويهها): هجوووورة.. حبيبتي هجووورة لا تخلينا

عبير: هاجر يا عمري .. احبج أحبج.. ماراح أنساج.. حللينا وسامحينا.. هجووورة ردي علينا


العزا كان في بيت بو حسين.. وكان كئيب والكلمة ماكانت تطلع من احد

محد كان ياكل ولا كان يشرب

أم بدر أكثر وحدة كانت متأثرة.. وتحسفت وايد انها سوت في هاجر اللي سوته.. ودرت ان الدنيا صج قصيرة وما تسوى

وبدر بعد حالته حاله الله يكون بعونه.. بس يبجي.. حده منقهر من نفسه على اللي سواه بهاجر.. صج كان يحبها.. بس ما عبرلها الا آخر فترة.. وكانت قصيرة 7 شهور بس
*************************


عقب ثلاث سنوات كانو الخطاطيب اييون حق مريم وترفضهم.. متأملة ان أحمد اييلها

لكن هالمرة الشاب كان كامل والكامل الله.. كان ممتاز من كل النواحي.. وقعدت معاه وارتاحتله

دشت غرفتها وفكرت " آنا ليه متى جذي؟؟ ليه متى بنطره؟؟ خل أدق عليه وأقوله؟"

دقت عليه.. وبعد جم رنه شاله

أحمد: ألووو

مريم: ألوو السلام

أحمد: وعليكم السلام هلا حبيبتي.. شلونج؟

مريم: الحمدلله.. أحمد بسألك

أحمد: آمريني

مريم: احنا متى بنتزوج؟

أحمد: ليش هالسؤال الحين؟

مريم: بس جاوبني وأقولك

أحمد: مادري.. انتي تدرين اني الحين مافكر بالزواج

مريم: أحمد آنا خطبني شاب.. واحس انه ملائم من كل الجهات.. واذا ما قررت متى نتزوج راح أوافق عليه.. لا تقولين انتي تضغطين علي. والا انتي تحديني.. لا احنا صارلنا ست سنين مع بعض وانت ما تحركت ولا شعره.. وانا من حقي اكون أسرة وأبي عيال

أحمد (انصدم من كلامها.. بس حس ان الحقيقة.. واهو مو مال زواج): مريم انتي مرتاحة منه؟

مريم (ودها تبجي): اي احس ان زين

أحمد (خنقته العبرة): الله يوفقج حبيبتي والله أتمنالج كل خير

مريم (قامت تبجي): أحمد ليش جذي؟؟ ليش ما نتزوج؟

أحمد (يبجي بس بصمت عشان لا تحس.. بس اهي حست من صوته): حبيبتي والله أحبج.. بس ماقدر اتزوجج.. آنا مو مال زواج.. الله يه*** ويوفقج

مريم (تحبه بس خلاص ما تقدر تنطره العمر كله.. فقامت تبجي بصوت عالي): والله أحبك.. بس ليه متى؟؟ عطني موعد وانطرك

أحمد: مافي موعد روحي بنصيبج الله يوفقج

مريم: عيل أحمد هاذي آخر مرة تسمع فيها صوتي.. مع السلامة

وسكرت التليفون.. قامت تبجي على أحمد.. على حبها.. على سنينها اللي ضاعت

بس بالأخير مسحت دموعها ونزلت تحت عند امها

مريم: يما

أم خالد: هلا حبيبتي

مريم: يما آنا موافقة
***********

تهاني وجراح: للحين عايشين مع بعض.. وعندهم ولد وبنتين

بدر: ما تصدقون اذا أقولكم للحين عايش على ذكرى هاجر.. ومو ناوي يتزوج.. والحين ساكن في بيت أهله.. وولده عنده.. بس بين فترة وفترة يروح ينام بيت يده ابو هاجر

مريم: تزوجت والحمدلله حياتها مستقرة والحين حامل.. وماتدري اي شي عن أحمد.. بس قبل فترة دقت عليها بنت خالها وقالتلها انها شافت أحمد وسأل عنها وان يسلم عليها.. بس مريم طلبت من بنت خالها انها ما تقولها أي شي عن أحمد حتى و كان صدفة

أحمد: الحين عمره 38 وللحين مو متزوج
*****************

وبجذي خلصت روايتي.. وان شاء الله تعجبكم
بنات وايد ناس كانو يسألوني منو يقرا الرواية ومنو ما يقرا
ومابغيت أقول ان هاجر الله يرحمها ما تقرا الرواية عشان لا تستنتجون شي
اللي يقرا الرواية
تهاني وجراح ومريم فقط لا غير
طبعا.. اعتقد ان الكل فهم المغزى من روايتي
والمغزي ان الحب مو كل شي بالدنيا.. ولازم كل بنت تحافظ على نفسها
وصدقوني الحب اللي ايي بعد الزواج اهو الحب الحقيقي

وتسلموووووووون الله يعطيكم العافية.. تعبتكم معاي.. وطولت عليكم.. وسامحوني اذا هاذي مو النهاية اللي بغيتوها
**********************

طبعا نقلت لكم القصه كمااااا هي بدون زياده اونقصان والله الشاهد على

وان شاءالله عقب يومين راح انزل قصه يديده حق نفس الاخت أميرة البجع

وأنا استاذنكم يلا تصبحون على خير جميعا

حرام عليج بجيتيني البارت هذا واللي قبله يبجون والله بجيت حيل انا ابجي وصلوحي يبجي ماكو شغل لووووووووووووووووول

حبي القصه روعه
ومشكوووووره وايد وايد وايد على التعب وصج الله يعطيج العافيه عالمجهود كلج ذووق


وبنتظار القصه اليديده حبي

وناسة وناسة القصة وايد حلوة



يعطيج العاافية حيااتي ومشكوورة وايد وايد

من صجج والله لووول انا لدموع اربع اربع وريلي يضحك على :teeth_smile:

ولاتبجين جدام ولدج لووووول ترا والله صج البيبي يبجي مع امه قبل جم يوم لمن امي دخلت المستشفى مت بجي وولدي يبجي معاي من قمت راسه وريلي يترجاني اسكت عشان نشوف شنو فيه سكت ولا يسكت معاي وهم لمن بجيت بعدين بجى معاي فلاتبجين جدامه حرام :sad_smile:

العفوو حبيبتي والله يعافيج يارب ويخليج وتسلمين حبيبتي

وان شاءالله باجر انزلها وراح انزل بس بارت لووول باليوم عشان الكل يشارك ^_^​

ياحياتي الله يسهل عليج يارب يلا يلا فصلي لووول روحي درسي :wink_smile:

والله يعافيج ويخليج والعفو لوووو

وان شاءالله اشوف مشاركتج بالقصه اليديده باجر ان شاءالله :teeth_smile:​